Gymnast Ruivivar swak sa 2024 Paris Olympics

ni GA / VA / Clyde Mariano @Sports | April 22, 2024

Tatlo na ang mga Filipinong gymnasts na kakatawan sa Pilipinas sa darating na Paris Olympics matapos mag-qualify ni Levi Jung-Ruivivar makaraan nitong magwagi ng silver medal sa women’s uneven bars event ng Doha, Qatar leg ng FIG Artistic Gymnastics World Cup Series noong Biyernes.

Muntik pang di umabot ng finals pagkaraang tumapos na pangwalo at huling qualifier sa naturang event, nakakuha ng iskor na 13.633 ang Fil-Am gymnast na nagbigay sa kanya ng una niyang World Cup medal gayundin ng minimithing Olympics berth.

Base sa panuntunan, tanging ang top 2 gymnasts lamang sa bawat apparatus pagkaraan ng apat na World Cup legs ang uusad sa Paris.

Nakamit ni Jung-Ruivivar ang kanyang Olympic seat nang pumangalawa ito sa uneven bars rankings sa natipon niyang 62 puntos. 

Bago ang Doha leg, nasa ikalimang puwesto si Jung-Ruivivar na may 44 na puntos mula sa nakolekta nyang 14 puntos sa Cairo, Egypt leg, 12 puntos sa Cottbus, Germany, at 18 puntos sa Baku, Azerbaijan. Nadagdagan ang kanyang puntos at tumaas sa 62  matapos magwagi ng silver medal na may katumbas na 30 puntos.

Si Kaylia Nemour ng Algeria ang nagwagi ng gold sa nakuha nitong iskor na 15.366 puntos.

Gayunman, hindi siya binigyan ng ranking points dahil qualified na siya sa Paris Games matapos magwagi sa World Artistic Gymnastics Championships noong isang taon.

Bago ang Doha leg, nasa ilalim si Jung-Ruivivar nina Jennifer Williams ng Sweden at Vanesa Masova ng Czech Republic na kapwa may tig-48 puntos gayundin ng Isa pang Swedish na si Nathalie Westlund na mayroon namang 47 puntos.

Sa naunang tatlong World Cup legs, hindi tataas sa 8th place ang naitalang pagtatapos ni Jung-Ruivivar. Pumuwesto syang pang-13 sa Cairo, 12th sa Cottbus at pang-8 sa Baku.

Ito na ang pinakamaraming bilang ng gymnasts na sasabak sa Olympics para sa Pilipinas makalipas ang halos anim na dekada nang katawanin nina Norman Henson at Ernesto Beren ang bansa sa 1968 Mexico City Games.                      

Pro boxer Laurente isasabak sa Bangkok last Olympic Q'fying

ni VA @Sports |  April 2, 2024

Isang professional boxer ang nakatakdang makasama ng national boxing team sa gagawin nilang pagsabak sa huling boxing qualifying tournament para sa Paris Olympics na gaganapin sa Bangkok sa susunod na buwan.

Inimbita ng Association of Boxing Alliances in the Philippines (ABAP) si Criztian Pitt Laurente sa isang box para sa men’s 63.5-kg division kung saan nanaig siya kontra kay Mark Ashley Fajardo na nauna nang nabigo na magkamit ng tiket para makasama sa Paris matapos ang round-of-16 exit sa nakaraang Busto Arsizio qualifier noong Pebrero sa Italya. “Tinanggap ko 'yung offer kasi isang malaking oportunidad ito para sa akin," pahayag ng 5-foot-8 na si Laurente na may malinis na rekord na 12-0, panalo-talo kabilang na ang 7 knockouts sa loob ng apat na taon niyang pagiging pro. Dating ABAP boxer noong 2015-2019, makakasama ng 24-anyos at tubong General Santos City sa pagsabak sa huling qualifier sa Bangkok sa Mayo 23- Hunyo 3 sina Tokyo Olympics flyweight silver medalist Carlo Paalam, women’s middleweight Hergie Bacyadan at flyweight Rogen Ladon.

Tatangkain nilang mapahanay sa mga nauna nang nag-qualify na sina men’s light heavyweight Eumir Felix Marcial, women’s featherweight Nesthy Petecio at women’s flyweight Aira Villegas sa Paris. Naging gold medalist sa 2016 Children of Asia tournament sa Yakutsk, Russia si Laurente at bronze medalist sa 2018 Asian Boxing Confederation Youth Championship sa Bangkok. Nagwagi rin siya ng gold medal noong 2012 at 2014 Palarong Pambansa gayundin sa 2016 Philippine National Games.

Ang huli niyang laban ay noong Marso 2023 sa South Korea kung saan tinalo niya ang Mongolian na si Munkhdalai Batochir sa isang non-title fight. Samantala, maliban sa kanyang ama na si Cristino, suportado rin si Laurente ng kanyang promoter na si Gerry Peñalosa sa pag-abot sa kanyang pangarap na makalaban sa Olympics.

Diaz-Naranjo hihirit sa last Olympic Q'fying

ni VA @Sports | March 28, 2024

Umalis kahapon -Miyerkules Santo si Hidilyn Diaz-Naranjo patungong Phuket, Thailand para sa misyong makakuha ng target na Olympics berth sa idaraos na pang-anim at huling qualifier para sa Paris Games- ang International Weightlifting Federation (IWF) World Cup na magsisimula sa Lunes- Abril 1-11.

Makakasama ng Tokyo Olympics women’s -56 kgs gold medalist na makikipagsapalaran sina Vanessa Sarno, Rosegie Ramos at John Febuar Ceniza gayundin ang Tokyo Olympian na si Erleen Ann Ando na sasabak din sa women's -59 kgs class kung saan sasalang si Diaz-Naranjo. “They have to give their best in this tournament because this is mandatory and it’s the most important of the qualifiers,” Samahang Weightlifting ng Pilipinas pahayag ng kanilang trainer at coach na si Antonio Agustin.

Kinakailangang pasok sina Diaz-Naranjo sa top 10 ng kani-kanilang weight classes para mag-qualify sa Paris.

Isa lamang kina Diaz-Naranjo na kasalukuyang ranked No. 8 at Ando na nasa 10th spot ang makalahok sa Paris dahil ayon sa panuntunan ng Olympics, isang atleta lamang kada weight class ang maaaring kumatawan sa kanilang bansa.

Bukod kina Ramos at Sarno na sasalang sa Lunes, Ceniza na sasabak sa Martes at Diaz-Naranjo na lalaban sa Miyerkules, lalahok din sa torneo si Kristel Macrohon sa women’s 71 kgs na huling sasalang sa Abril 7.