Pinoy galing India, bawal na rin sa ‘Pinas

ni Mary Gutierrez Almirañez | April 28, 2021

Hinimok ni Senator Risa Hontiveros ang Department of Health (DOH) at Inter-Agency Task Force on Emerging Infectious Diseases (IATF) na maglabas ng guidelines hinggil sa ‘automatic travel ban’ na ipinatutupad ng bansa sa mga biyaherong galing India dahil sa lumalaganap na kaso ng COVID-19.

Aniya, “Kesa mangolekta tayo ng COVID-19 variants, dapat matagal nang naglatag ng protocols at guidelines ang IATF sa pag-impose ng mga automatic travel ban base sa mga findings ng ibang bansa na available naman sa publiko.”

Dagdag pa niya, “Laging napakabagal kundi last minute ang desisyon. Kaya lahat na ng COVID variants sa mundo ay kumakalat na rito sa Pilipinas. 'Wag naman tayong maging welcoming committee ng bagong variants.”

Kaugnay ito sa pagbabawal ng ‘Pinas na makapasok sa bansa ang mga biyaherong galing India, buhat nang maitala sa nasabing bansa ang 350,000 na nagpositibo sa COVID-19 sa loob lamang ng isang araw, kung saan maging ang Indian variant ay laganap na rin sa halos 17 na bansa.

“Walang kalaban-kalaban ang mga bata sa double-mutation na ito, ni hindi sila puwedeng mabakunahan. May mga taong nakahiga na sa daan sa labas ng ospital. Are these not concerning to the Health Secretary? Hihintayin pa ba natin matulad sa India?” dagdag ni Hontiveros.

Sabi pa niya, “We should have learned from the very first COVID-19 cases of 2020, who were all travelers from China, that travel bans make all the difference. As long as COVID-19 is around, we have to remain vigilant and act fast.”

Samantala, maging ang mga Pinoy galing India ay pinagbabawalan na ring makapasok sa bansa, ayon kay Department of Health (DOH) Undersecretary Maria Rosario Vergeire.

Paliwanag pa ni Vergeire, “Napagdesisyunan that even our fellow Filipinos, hindi muna natin papapasukin for this temporary period. This is just so that we can be able to ensure na ma-guard natin ‘yung borders natin.”

Sa ngayon ay lumagpas na sa isang milyon ang kaso ng COVID-19 sa bansa, kung saan 71,675 ang active cases mula sa 7,204 na nagpositibo kahapon.

DOH, aminadong wa' epek pa rin ang istayl kontra-COVID

ni Mary Gutierrez Almirañez | April 27, 2021

Dodoblehin na ng Department of Health (DOH) ang kanilang ginagawa upang masugpo ang banta ng COVID-19 sa bansa dahil lumagpas na ito sa 1 million, batay sa kabuuang bilang na naitala kahapon, Abril 26.

Giit ni DOH Undersecretary Maria Rosario Vergeire, "We're doubling our efforts. Whatever we have been doing in the past, we are intensifying… Nakikita natin na effective ‘yung mga ginawa natin pero kulang pa po para tayo ay talagang makapagpababa ng mga kaso, so tuluy-tuloy pa po dapat ang mga ginagawa natin."

Ayon pa sa DOH, umabot na sa 1,006,428 ang kabuuang kaso ng COVID-19, kung saan ang 74,623 ay nananatiling active cases, mula sa 8,929 na nagpositibo.

Aminado naman ang DOH na kulang sa resources at healthcare workers ang ‘Pinas na itinuturong dahilan kaya nahihirapan ang bansa na matugunan ang pandemya. Dulot nu’n, iyon ang pagtutuunan nila ng pansin ngayon.

Paliwanag pa ni Vergeire, "Since the start of the response, we have been trying to ramp up everything in the health system, ‘yun nga lang po ang resources na nakikita natin, kailangang bigyang tuon ang lahat ng sektor.”

Nauna nang nanawagan sa DOH ang Filipino Nurses United (FNU) para sa karagdagang 1 nurse kada barangay at para sa maayos na healthcare system.

Ngayon ay umaasa sila na matutugunan na ang nu'ng nakaraang taon pa nilang inihihirit sa pamahalaan.

Biyaherong galing India, bawal sa ‘Pinas

ni Mary Gutierrez Almirañez | April 26, 2021

Napagkasunduan ng Department of Foreign Affairs (DFA) at Department of Health (DOH) na pagbawalang makapasok sa ‘Pinas ang mga biyaherong galing India upang maiwasan ang banta ng COVID-19, ayon kay DOH Undersecretary Maria Rosario Vergeire ngayong araw, Abril 26.

Aniya, “Pinag-uusapan na po namin ngayon with DFA so that we can recommend to IATF if ever we will find that cause para po talagang i-ban muna temporarily just for us to prevent further spread of the disease here in the country.”

Kahapon ay naging record breaking ang naitalang 349,691 na nagpositibo sa India sa loob lamang ng 24 oras.

Lumalaganap na rin sa iba’t ibang bansa ang Indian variant ng COVID-19 kaya upang mapigilan ang pagpasok nito sa ‘Pinas ay inirerekomenda na ng DOH at DFA ang travel restriction na inaasahang sasang-ayunan ng Inter-Agency Task Force (IATF).

Giit pa ni Vergeire, “Up until now, we can say that we still have not detected it here although we are still looking at our records, baka meron tayong nakita before.”

Sa ngayon ay United Kingdom variant, South African variant, Brazilian variant at P.3 variant ng COVID-19 pa lamang ang mga nade-detect sa bansa.