Pagmamay-ari ng isang dual citizen ng mass media, naungkat sa hearing ng ABS-CBN franchise

Naungkat ang isyu ng legalidad ng pagmamay-ari ng isang dual citizen ng mass media sa Pilipinas sa pagpapatuloy ng pagdinig ng joint committee on Legislative Franchises at Good Government sa inihihirit na prangkisa ng ABS-CBN.

Sa pagdinig kahapon ay kinumpirma ni Atty. Ayo Bautista, ang legal counsel ni Eugenio Lopez III, ang dual citizenship ni ABS-CBN Chairman Emeritus Eugenio Lopez III na isang Pilipino at isa ring Amerikano.

Tinanong ni Ako Bicol Partylist Rep. Alfredo Garbin, Jr., kung pupuwedeng magmay-ari ng mass media ang hindi purong Pilipino o dual citizen tulad ni Lopez na sinagot naman ni Atty. Bautista na hindi malinaw na isinaad sa Konstitusyon na bawal ang dual citizen sa pagmamay-ari.

“Kasi nakalagay sa Constitution, dapat Pilipino ka. Wala namang nakalagay doon na dapat Pilipino ka lang,” ayon kay Atty. Bautista.

Iginigiit din ni Sagip Partylist Rep. Rodante Marcoleta na dapat ay Pilipino ang humawak ng mass media ownership ngunit sinagot ito nina Lopez at Bautista na nananatiling Pilipino ang chairman emeritus ng ABS-CBN.

Wala rin umano sa record ng Department of Justice na nag-renounce o itinakwil ni Lopez ang pagka-Pilipino bagamat ipinanganak sa Amerika.

“Wala pong ebidensiya pang napipresenta para ipakita na naging naturalized American siya, na ni-renounce niya ang kanyang Filipino citizenship. So ang kanyang Filipino citizenship ay nananatili,” pahayag ni Justice Undersecretary Emmeline Aglipay-Villar.

Isa sa mga argumento o isyu laban sa pagbibigay ng prangkisa sa ABS-CBN ay ang citizenship ni Lopez nang pangasiwaan nito ang broadcast network noong 1996.

“All my life I have considered myself a Filipino citizen. I grew up in the Philippines. We are 7 generations of Lopezes living in the Philippines,” ani Lopez.

Ipagpapatuloy ang hearing ng joint committee sa Lunes, Hunyo 8.

19,748 positibo sa COVID-19 — DOH

Umakyat na sa 19,748 ang kabuuang bilang ng covid-19 cases na naitala sa bansa.

Batay sa datos ng Department of Health, ito ay matapos silang may maitalang 751 na karagdagan pang kaso. Pero sa bilang na ito ay 221 lamang ang fresh cases habang 530 naman ang late cases.

Sa mga fresh cases na ito, 68 ang mula sa National Capital Region, 102 sa Region 7, ang 51 naman ay mula sa iba pang lugar sa bansa.

Sa mga late cases naman, ang 174 ay mula sa NCR, 240 naman sa Region 7, 105 naman sa iba pang lugar sa bansa habang 11 naman ay mula sa hanay ng mga repatriate.

Ipinaliwanag naman ni Health Usec. Ma Rosario Vergeire na ang mataas na bilang ng late cases sa Region 7 ay dahil sa kahapon lamang nakapagsumite ng accomplishment report ang isa sa mga laboratoryo na lisensyadong magsagawa ng COVID test.

Ang laboratoryo na ito ay huling nakapagsumite noong Mayo 20.

"Ang mataas na late cases galing sa Region 7 ay dahil kahapon lang po nakapag-submit ng accomplishment report ang isa sa mga laboratoryo mula pa nu’ng May 20," paliwanag ni Vergeire.

May 90 namang naitala na bagong nakarekober mula sa covid-19.

Kaugnay nito, umakyat na sa 4,153 ang bilang ng mga pasyenteng gumaling mula sa virus. Habang may 8 namang naiulat pang nasawi dahil sa covid-19. Sa kabuuan, nasa 974 na ang bilang ng nasawi sa bansa dahil sa sakit.

Anti-terror bill, lusot na sa Kamara

Pasado na sa ikatlo at huling pagbasa ng Kamara ang Anti-terror bill.

Sa botohang 173 affirmative, 31 negative at 29 abstentions, naipasa na ang panukalang batas.

Ilan sa mga tinututulang probisyon nito ng mga kritiko ay ang aniya'y "malawak" na depenisyon ng terorismo, pagpapahintulot sa 14 hanggang 24 araw na pagkakakulong kahit walang warrant at 60 hanggang 90 araw na surveillance.

Una nang naipasa ang counterpart nitong panukala sa Senado sa katauhan ng Senate Bill 1093, na layong palitan ang Human Security Act of 2007.

Karaniwang nagsasagawa ng Bicameral Conference Committee upang pagtagpuin ang mga pagkakaiba ng Senate at House versions ng isang panukala.

Gayunpaman, pareho ang nilalaman ng anti-terrorism bill sa dalawang sangay ng Lehislatura matapos angkupin ng Kamara ang naunang bersyon ng Mataas na Kapulungan.

Ipadadala na ito kay Pangulong Rodrigo Duterte upang malagdaan at tuluyang maging batas.