P1 milyon para sa health workers na namatay sa COVID-19, oks na — DOH

Matatanggap na sa lalong madaling panahon ng pamilya ng mga healthcare workers na nasawi dahil sa covid-19 ang benepisyo para sa kanila mula sa pamahalaan.

Ayon kay Health Usec. Ma Rosario Vergeire, ito ay matapos na malagdaan na ang joint administrative order ng Department of Health, Department of Labor and Employment at Department of Budget and Management kung saan nakasaad ang para sa pagbibigay ng benepisyo sa mga health workers na namatay o nasa kritikal na kondisyon dahil sa COVID-19.

Kabilang sa 32 health workers na nasawi dahil sa covid-19 ay 26 na doktor, 4 na nurse at 2 non medical staff.

Ani Vergeire, sa oras na makumpleto na ng pamilya ang mga kinakailangang dokumento ay agad itong ipoproseso ng DOH upang mai-release ang tseke para sa kanila.

Sa ilalim ng Bayanihan to Heal as One Act, P1 milyon ang nakalaang benepisyo para sa mga public at private health workers na masasawi dahil sa covid-19 habang P100-K naman para sa health workers na magkakaroon ng severe covid-19 infection habang ginagampanan ang kanilang trabaho.

Kaugnay nito, binigyan lamang ng hanggang Martes ni Pangulong Rodrigo Duterte ang lahat ng mga kinauukulang ahensiya na ibigay na ang kompensasyon para sa mga nasabing healthcare workers.

Ito ang inilabas na direktiba ng Pangulo matapos malaman na wala pa ring healthcare workers ang nakatatanggap ng cash benefit ayon kay Presidential Spokesman Harry Roque.

Libreng dialysis sa mahihirap, lusot na sa Kamara

Aprubado na sa ikatlo at pinal na pagbasa ng Kamara ang House Bill 6803 o ang Comprehensive Renal Replacement Therapy Act na layong gawing libre ang dialysis para sa mahihirap na pasyente.

Sa botong 209 na pabor at walang tumutol sa panukalang batas, pinapalawig din nito ang coverage ng PhilHealth para maisama na ang komprehensibong renal replacement therapy at iba pang treatment para sa mga Pilipinong walang sapat na kakayahan na gastusan ito.

Sa ilalim ng panukala, oobligahin ang lahat ng mga ospital ng gobyerno — national, regional at provincial na magtatag ng dialysis service facility na kumpleto sa kagamitan, doktor, nurse at staff.

Paiiralin din ang no balance billing policy para sa mga indigent na pasyente.

Ang sinumang lalabag na pinuno, administrator o officer-in-charge ng ospital, dialysis center at health facility ay maaaring pagmultahin ng P50,000 hanggang P100,000.

Para naman sa mahuhuling nagbebenta ng libreng gamot o serbisyo na kanilang nakuha ay mahaharap sa parusang suspensiyon ng kanilang PhilHealth membership at sa anumang ayuda ng gobyerno sa loob ng anim na buwan.

Sa ngayon, umaabot ng P2,000 hanggang P2,500 ang bayad para sa bawat sesyon ng dialysis sa isang ospital ng gobyerno habang sa mga pribadong pasilidad ay nasa P4,000 kada sesyon.

Ayon kay Baguio City Rep. Mark Go, isa sa mga may-akda ng panukala, ang napakamahal na bayad sa dialysis ang dahilan kaya't maraming Pilipino ang tumatanggi nang magpagamot.

20,382 Positibo sa COVID-19

Umakyat na sa 20,382 ang kabuuang bilang ng covid-19 cases na naitala sa bansa.

Batay sa datos ng Department of Health, ito ay matapos silang may maitalang 634 na karagdagan pang kaso.

Pero sa bilang na ito ay 313 ang fresh cases habang 321 naman ang late cases.

Sa mga fresh cases na ito, 114 ang mula sa National Capital Region, 101 sa Region 7, ang 97 naman ay mula sa iba pang lugar sa bansa habang 1 naman ang mula sa hanay ng repatriate.

Sa mga late cases naman, ang 44 ay mula sa NCR, 37 naman sa Region 7, 177 naman sa iba pang lugar sa bansa habang 63 naman ay mula sa hanay ng mga repatriate.

May 95 namang naitala na bagong nakarekober mula sa covid-19.

Kaugnay nito, umakyat na sa 4,248 ang bilang ng mga pasyenteng gumaling mula sa virus. Habang may 10 namang naiulat pang nasawi dahil sa covid-19.

Sa kabuuan, nasa 984 na ang bilang ng nasawi sa bansa sa nasabing sakit.