P2 milyon pabuya sa makakapatay sa matataas na lider ng NPA — P-Duterte

Dalawang milyong pisong pabuya ang ipagkakaloob ni Pangulong Rodrigo Duterte sa sinumang makapagtuturo at mapatay ang matataas na lider ng New People's Army.

"'Pag nakapatay kayo ng commander o nakapagturo kayo kung saan natutulog 'yung commander o nakitulog, sabihin lang ninyo sa akin at P2 million, basta 'yung top commander,” sabi ni Pangulong Duterte sa kanyang public address.

“P2 million kung sino makaturo sa Army o police. Kung commander na mabigat, may hati ka d'yan sa pera,” ani Pangulong Duterte.

Isasailalim naman aniya sa Witness Protection Program ang sinumang indibidwal na makatatanggap ng pabuya at ilalayo sa kanilang lugar para sa seguridad ng mga ito.

“Alisin kita sa lugar mo. Kung taga-Abra ka, ihatid kita sa Mindanao. Sa mga Ilocano, bigyan kita ng lupa. Kasi kung hindi, papatayin ka talaga,” wika ng Pangulo.

“You will have a new identity, like you are under the Witness Protection Program (WPP). It need not be under the WPP, but I will order that you will be treated [as someone] under WPP," ani Pangulong Duterte.

Ipinunto pa ng Punong Ehekutibo na hindi rin aniya dapat magpatayan sa land reform dahil maraming mga lupa na magagamit.

“Putris na NPA ito. Marami ang lupa. Sige ako ng land reform, bigay ng lupa. 'Di kailangan magpatayan sa land reform,” dagdag ng Pangulo.

Mga nasa ilalim ng GCQ, huwag pasaway — P-Digong

Nagpaalala si Pangulong Rodrigo Duterte sa publiko na huwag balewalain ang mga health safety protocols sa mga lugar na naka-general community quarantine na at sa iba pa na isasailalim na rin sa GCQ.

Sinabi ni Pangulong Duterte na ang pagsusuot ng face mask at social distancing ay magiging bahagi na ng new normal hanga't wala pang gamot at bakuna na natutuklasan kontra COVID-19. Giit ng Pangulo, mahirap magkaroon ng panibagong wave ng COVID-19 kapag bahagyang luwagan ang mga restriction sa mga lugar na nasa ilalim ng ECQ.

"Dahan-dahan lang para hindi tayo madapa because we cannot afford a second or third wave na mangyari. Ito 'yung mga bago na mahawa na naman at rarami na naman dahil meron tayong rules na hindi sinunod," ani Pangulong Duterte sa public address.

Hindi umano nangangahulugan na kapag niluwagan na ang mga restrictions ay wala ng banta sa COVID-19.

Nilinaw din ng Punong Ehekutibo na ang mga lalabas na walang mask ay sisitahin ng pulis subalit, hindi naman ito huhulihin.

Desisyon sa ECQ, hindi nailahad sa public address ni P-Duterte

Photo File: Sen. Bong Go

Natapos ang 45 minutong public address ni Pangulong Rodrigo Duterte nang hindi natalakay kung anong naaprubahang rekomendasyon sa umiiral na enhanced community quarantine.

Gayunman, binanggit ng Pangulo na ang pagpapagaan sa restrictions ay hindi nangangahulugang nasawata na ng Pilipinas ang Coronavirus Disease 2019.

“For those who will be allowed to go out, at for those na hindi pa talaga puwede, remember na itong ‘pag ease up ng restrictions, hindi iyan ibig sabihin na wala na ang COVID,” ayon sa Pangulo.

Kaugnay nito, inatasan ni Pangulong Duterte ang Inter-Agency Task Force (IATF) na tiyaking mauunawaan ng mga ordinaryong indibidwal ang mga kategorya ng mga papayagan na at hindi pa papayagang lumabas-labas.

Si Presidential Spokesperson Sec. Harry Roque aniya ang maglalatag sa publiko ng mga napagkasunduan at gagamitin niya ang PTV-4 para ilahad ito.