Panukalang provisional franchise ng ABS-CBN, aprub na sa 2nd reading sa Kamara

Umusad na at inaprubahan sa ikalawang pagbasa sa plenaryo ng Kamara ang House Bill 6732 o ang panukalang batas na layong mabigyan ng provisional franchise ang ABS-CBN Corporation.

Sa ilalim ng House Bill 6732 na inihain ni Speaker Alan Peter Cayetano at ng iba pang mga kongresista, papayagan na makapag-operate ang ABS-CBN hanggang sa Oktubre 31, 2020.

Ito ay upang magkaroon ng sapat na panahon ang Kamara na mahimay ang hiwalay pang mga panukalang batas na layong magawaran ng prangkisa ang ABS-CBN na may bisang 25 taon.

Sa kanyang sponsorship speech, muling binanatan ni Cayetano ang National Telecommunications Commission (NTC) dahil sa pagpuwersa nito sa Kamara na aksyunan ang prangkisa ng ABS-CBN gayung may mga mahahalagang trabaho sila na kailangang tapusin lalo na ngayong may COVID-19 pandemic.

Una nang nangako ang NTC sa Kamara na bibigyan ng provisional authority ang ABS-CBN ngunit nang mapaso ang bisa ng prangkisa noong Mayo 4 ay nagpalabas ng cease and desist order ang komisyon.

"If only the NTC had said from the outset that they could not give the network a provisional authority to operate beyond the term of the franchise, then we would have not relied on their word," ani Cayetano.

"Their actions are not only an affront to the institution, it also delays the discussion and passage of crucial legislation that our people sorely need," dagdag nito.

Naniniwala pa si Cayetano na hindi dapat madaliin ang pag-apruba ng prangkisa ng ABS-CBN lalo na't maraming isyu ang ibinabato laban sa broadcast network.

"There will be no rush to judgement. Both the praise for and the charges against the network will be heard and will be put on public record," pahayag pa ni Cayetano.

"Whatever the outcome of these hearings will be, there will be reforms. There must be, not just a New, but a Better Normal. Not only for ABS-CBN, but for the entire media industry," ayon sa House Speaker.

Sakaling mapagtibay ngayon sa 2nd reading ay nakatakda na itong isalang sa 3rd at final reading na posibleng maikalendaryo sa sesyon sa susunod na linggo.

Kung tuluyang maaaprubahan sa Kamara ay iaakyat ang panukala sa Senado at kapag naipasa sa Mataas na Kapulungan ay idadaan pa rin sa pag-apruba ni Pangulong Rodrigo Duterte.

Babala sa pagluluwag ng restriksyon, mas delikado sa "second wave" ng covid-19

Nagdiwang kamakailan ang South Korea, ang dahilan nito, bumagsak ang bilang ng may Covid-19 sa bansa. Nagbalik-operasyon ang maraming negosyo. Nagbukas na ang mga bars. Subalit, dahil sa isang hindi sinasadyang 'party animal' nabalewala ang lahat ng kanilang nasimulan.

Lubhang nakahahawa talaga ang virus kaya itinuturing na itong global pandemic. Isang paalala sa lahat ng mga bansa, ang ginawa ng "superspreader" na naganap sa Seoul, kamakailan.

Gayundin, isang babala ito sa maaaring mangyari kapag nagsimula na ang pagluluwag sa lockdown at pagbabawas ng restriksyon sa iba't ibang panig ng mundo, tulad ng gagawin na rin ng Australia.

Ilang araw pa lang ang nakalipas, matapos magbukas ulit ang 2100 nightclubs at bars, kung saan ang capital ng South Korea ay nagbigay ng direktiba ng muling pagsasara ng mga ito. Halos 6000 venues sa kalapit na probinsya ay ipinasara na rin.

Nitong weekend, inireport ng health system ng naturang bansa ang biglaang pagtaas ng mahigit sa 40 bagong kaso ng coronavirus. Ito ang unang insidente na nagtala ng napakataas na kaso sa loob lamang ng isang buwan.

Agad na kumilos ang mga contact tracers dahil dito. Tanong tuloy ng marami, ano ang sanhi ng nakababahalang pangyayari?

Lumabas sa report, na ito ay dahil sa isang 29-taong-gulang na lalaki.

Desperado ang lalaki sa mahaba niyang buhok, matapos ang confinement o pananatili sa bahay ng matagal na panahon.

Nagpunta ang lalaki sa isang epic pub crawl upang mabawi raw ang mga nasayang na oras dahil sa pagtigil sa bahay.

Gayunman, tinatayang 12 kapwa partygoers ang na-infect ng lalaki. Ang 30 iba pang infected ay iniuugnay sa limang nightclubs na kanya ring binisita. Higit-kumulang 7,200 katao ang maaaring na-exposed sa virus.

Sa kasalukuyan, ang South Korea ay kumikilos na para sa mas mapanganib na "second wave" ng pandemic.

Birthday party ni NCRPO Chief Sinas sa gitna ng lockdown, imbestigahan — PNP

Iniutos na ni Philippine National Police (PNP) Chief Archie Gamboa sa Internal Affairs Service (IAS) ang pag-iimbestiga sa idinaos na birthday party ni National Capital Region Police Director Major General Debold Sinas sa gitna ng umiiral na enhanced community quarantine.

Partikular umanong aalamin sa pagsisiyasat ang posibleng paglabag ni Sinas at ng iba pang opisyal ng PNP sa quarantine protocols tulad ng pagpapairal ng social distancing at pagbabawal sa mass gatherings.

Una nang ibinihagi mismo sa social media page ng NCRPO Public Information Office ang mga larawan ng pagdiriwang ng ika-55 kaarawan ni Sinas noong Mayo 8 sa Camp Bagong Diwa, Taguig City.

Binura na ang nasabing mga larawan sa Facebook page ng NCRPO PIO.

Gayunman, itinanggi umano ni Sinas na mayroong party at agad na dumipensa si Gamboa para sa heneral.

“Una, walang party’ng nangyari ang sabi ni Gen. [Debold] Sinas. Probably nagkaroon ng mañanita pero doon sa mañanita ang sabi ni Gen. Sinas is that in-observe pa rin nila ‘yung mga social distancing. Now, I don't think na meron namang violation ito,” agad na depensa ni Gamboa sa isang virtual press conference.

Gayunman, sinabi ni Gamboa na hindi exempted ang mga matataas na opisyal ng PNP sa lockdown protocols.

“Alam naman natin napakahirap nu’ng trabaho niya sa NCRPO but nevertheless it is not an excuse for him not to follow simple health protocols,” dagdag pa ng PNP Chief.

Kamakailan lang ay sumailalim sa tatlong araw na lockdown ang Camp Karingal sa Quezon City matapos na magpositibo sa Coronavirus Disease 2019 ang 14 na miyembro ng Quezon City Police District (QCPD).

Samantala, ayon kay Sen. Francis Pangilinan, malinaw na lumabag sa mga batas ang nagsidalo sa nasabing party at dapat na panagutin.

"Kung seryoso sila sa pagpapatupad ng batas sa lahat, dapat sampahan ng kasong paglabag sa batas ang mga 'yan at ikulong kasama ang libu-libo na kinulong nila dahil sa quarantine violations," ani Pangilinan.