NTC, sumagot na sa show cause order ng Kamara

Nagpaliwanag na sa Kamara ang National Telecommunications Commission (NTC) patungkol sa pagpapalabas nito ng cease and desist order laban sa ABS-CBN Corporation.

Sa tatlong pahinang tugon na ipinadala kina Speaker Alan Peter Cayetano at House Committee on Legislative Franchises Chairman Rep. Franz Alvarez, ipinaliwanag ng NTC na kanilang masusing pinag-aralan noon at hinanapan ng legal na suporta ang pagpapalabas ng provisional authority sa ABS-CBN bago mapaso ang prangkisa nito noong Mayo 4.

"Through the past months, the NTC has rigously sifted through various legal arguments, opinions of legal luminaries, stakeholders, and concerns of other sectors, on how to legally support the issuance of a P.A," saad ng NTC.

Ikinonsidera rin ng NTC ang komento ng Office of the Solicitor General na kung magpapalabas ng provisional authority ay magkakaroon ito ng criminal liability dahill kontra ito sa Saligang Batas, mga batas at jurisprudence na nagbibigay ng solong mandato sa Kongreso na mag-apruba o mag-renew ng prangkisa.

Matapos umano ang kanilang collective assessment sa isinasaad ng Konstitusyon, mga batas at jurisprudence ay mayroong maituturing na malaking balakid para magbigay sila ng provisional authority sa broadcast network.

Ayon sa NTC, ang pagbibigay ng provisional authority sa ABS-CBN ay mangangahulugan ng pagsapaw sa eksklusibong kapangyarihan ng Kongreso.

"If the NTC were to issue a PA, it would have amounted to an encroachment into the exclusive domain of Congress," ayon pa sa komisyon.

Nasa Korte Suprema na rin aniya ang usapin at sila ay obligado na dumistansya sa pagresolba o pag-aksiyon sa mga isyu na nakasalang na sa korte.

Ipinaliwanag din ng NTC na pumayag sila noon at nangako sa Kongreso na magbigay ng provisional authority sa ABS-CBN dahil ito ang kanilang nakitang best possible solution sa mga panahon na iyon.

Humingi ng paumanhin ang NTC kung hindi agad nito naipabatid sa Kongreso ang kanilang desisyon na magpalabas ng cease and desist order laban sa ABS-CBN na nagbunga ng pagkagulat ng mga mambabatas.

Wala umano silang intensyon na bastusin ang mga mambabatas. Nakatakda namang pag-aralan ng komite ang paliwanag ng NTC para matukoy kung dapat itong ma-contempt o hindi.

Maliban sa Metro Manila, Laguna at Cebu City... Buong bansa, isasailalim na sa GCQ — Palasyo

Mananatili sa general community quarantine (GCQ) ang buong bansa maliban na lamang sa Metro Manila, Laguna at Cebu City.

Sinabi ni Presidential Spokesman Harry Roque na idedeklara ang GCQ sa Mayo 16 kasabay ng pagsasailalim sa Metro Manila, Cebu City at Laguna sa modified enhanced community quarantine (MECQ).

Ginawa umano ni Pangulong Rodrigo Duterte ang desisyon base na rin sa rekomendasyon ng Inter-Agency Task Force on Infectious Diseases.

"Lahat ng parte ng Pilipinas, maliban sa Metro Manila, Cebu City at Laguna ay mapapasailalim sa general community quarantine, base sa IATF Resolution No. 35-A. Ipatutupad ito simula May 16, kasabay ng modified enhanced community quarantine sa tatlong nahiwalay na mga lugar,” pahayag ni Roque.

Nabatid na ipinatutupad ang ECQ sa buong Luzon region hanggang May 15.

COVID-19 hindi na mawawala — WHO

Nagbabala ang World Health Organization (WHO) na maaaring manatili na ang covid-19 at hindi na mawala.

Ayon kay WHO emergencies director Dr. Mike Ryan, kahit makahanap pa ng bakuna laban sa virus ay hindi madali ang pagkontrol dito.

"It is important to put this on the table: this virus may become just another endemic virus in our communities, and this virus may never go away," pahayag ni Ryan sa isang virtual press conference.

Tinatayang aabot na sa halos 300 libo katao ang sinasabing nasawi sa buong mundo dahil sa covid-19 habang may 4.3 milyong kaso ng virus infection na ang naitala.

Inihalimbawa ni Ryan ang ilang sakit gaya ng tigdas na kahit may bakuna na ay hindi pa rin nawawala.

Gayunman, si WHO Director-General Tedros Adhanom Ghebreyesus naman ay iginiit na posible pa rin ang pagkontrol sa virus.

Binigyang-diin ng opisyal ang kahalagahan ng pagtulong ng lahat para matigil na ang covid pandemic na ito.

Nagpaalala rin si Tedros sa pamahalaan ng bawat bansa na tiyaking mataas pa rin ang alerto laban sa covid-19.

Nagpaalala rin ang WHO sa second wave ng virus infection kung hindi magiging maingat ang lahat

lalo na at may mga bansa ang nagbabawas ng restriction para unti-unti nang mabuksan ang kanilang ekonomiya.