COVID-19 patient na tumakas sa quarantine facility sa Davao, natagpuan na

Nakita na ang babaeng COVID-19 patient na tumakas sa isang quarantine facility sa Davao City noong wekeend.

Ayon sa Davao City Government, ang babae ay nahanap ngayong umaga, Mayo 15.

Una rito, inanunsiyo ni Davao City Mayor Sara Duterte na tumakas ang pasyente sa pamamagitan ng pagtalon sa bintana ng pasilidad noong Sabado.

Agad na iniutos ng alkalde na ito ay mahanap kasabay ang alok na pabuya.

Samantala, mas hinigpitan na ang seguridad sa mga health facility sa lungsod.

---

Naunang ulat: Magbibigay ng P5,000 na gantimpala si Davao City Mayor Sara Duterte Carpio sa sinumang makapagtuturo sa kinaroroonan ng COVID positive patient na tumakas mula sa kanyang isolation facility noong Mayo 9.

Ito ay upang mahanap si Arani Hajiba, nasa edad 20-24, residente ng Barangay 23-C, Davao City.

Nauna na ring nag-alok ng P5,000 ang barangay kapitan nito na si Wating Usman upang maibalik agad sa kanyang isolation facility ang naturang pasyente.

Dahil dito, P10,000 na ang kabuuang reward money para kay Hajiba.

Maiimbentong gamot sa COVID-19, dapat libre

Inihihirit ng ilang world leaders na gawing libre para sa lahat ang gamot sa Coronavirus Disease 2019.

Sa sulat na ipinadala sa World Health Assembly (WHA) ng ilang world leaders tulad nina South African President Cyril Ramaphosa at Pakistani Prime Minister Imran Khan, hiniling nila na gawing libre sa buong mundo ang gamot sa COVID-19 sakaling maimbento na ito.

Ang mabubuong bakuna ay dapat umanong hindi i-patent at ang siyensya sa likod nito ay dapat na ibahagi rin sa buong mundo.

"Governments and international partners must unite around a global guarantee which ensures that, when a safe and effective vaccine is developed, it is produced rapidly at scale and made available for all people, in all countries, free of charge," nakasaad pa sa sulat.

Una nang sinabi ng Sanofi, isang pharmaceutical company na ire-reserve nila ang unang batch ng gamot sa COVID-19 para sa United States kapag naging matagumpay ang kanilang vaccine research dahil malaking pondo umano ang ibinigay ng US sa kanila para rito.

Bagyong Ambo, nag-landfall sa Eastern Samar

Tumama na sa kalupaan ng San Policarpio, Eastern Samar ang Bagyong Ambo alas-12:15 ng tanghali.

Sa ipinalabas na severe weather bulletin ng Philippine Atmospheric, Geophysical and Astronomical Services Administration (PAGASA) ngayong alas-2:00 ng hapon, patuloy na kumikilos ang Bagyong Ambo patungong hilagang bahagi ng Samar province at inaasahang magbubuhos ng matinding pag-ulan at malakas na hangin.

Ayon pa sa PAGASA, maaapektuhan ng eyewall ng bagyo sa mga susunod na oras ang northern portion ng Samar at southern portion ng Northern Samar.

Sa pagtataya pa ng weather bureau, asahan ang matinding pag-ulan sa buong Samar Provinces, Masbate, Sorsogon at Catanduanes.

Katamtaman hanggang malakas na ulan naman sa Albay, Camarines Sur at nalalabing bahagi ng Eastern Visayas.

Kaninang ala-1:00 ng hapon, huling namataan ang mata ng Bagyong Ambo sa bisinidad ng Oras, Eastern Samar.

Taglay nito ang lakas ng hangin na 155 kilometro kada oras at pagbugsong hanggang 190 kph. Nakataas ang Tropical Cyclone Wind Signal No. 3 sa Sorsogon, Albay, Masbate kasama ang Ticao at Burias Islands, Catanduanes at southern portion ng Camarines Sur (Cabusao, Libmanan, Pasacao, Pamplona, Canaman, Magarao, Bombon, Calabanga, Camaligan, Gainza, San Fernando, Milaor, Naga, Tinambac, Siruma, Pili, Goa, Lagonoy, Garchitorena, Minalabac, Caramoan, Presentacion, Bula, Ocampo, Tigaon, San Jose, Balatan, Nabua, Baao, Sagnay, Bato, Nabua, Iriga, Buhi), Northern Samar, northern portion ng Eastern Samar (Jipapad, Arteche, Maslog, Dolores, Oras, San Policarpio, Can-avid, Taft, Sulat, San Julian, Borongan City, Maydolong), at northern portion ng Samar (Calbayog City, Sta. Margarita, Gandara, Pagsanghan, San Jorge, Matuguinao, San Jose de Buan, Catbalogan, Jiabong, Motiong, Paranas, Tarangnan, San Sebastian, Hinabangan), at Biliran.

Signal No. 2 naman sa Camarines Norte, nalalabing bahagi ng Camarines Sur, nalalabing bahagi ng Quezon, Marinduque, northernmost portion ng Leyte (Calubian, San Isidro, Tabango, Leyte, Capoocan, Carigara, Barugo, San Miguel, Babatngon, Tunga, Alangalang, Sta. Fe, Palo, Tacloban City, Jaro) nalalabing bahagi ng Samar at Eastern Samar.

Signal No. 1 naman sa Aurora, southern portion ng Nueva Ecija (General Mamerto Natividad, Palayan City, Cabanatuan, Santa Rosa, Jaen, San Isidro, San Antonio, Cabiao, Bongabon, Gabaldon, General Tinio, Laur, San Leonardo, Peñaranda, Gapan City), Bulacan, Metro Manila, Cavite, Laguna, Batangas, Rizal, nalalabing bahagi ng Quezon, Romblon, Bataan, Pampanga, nalalabing bahagi ng northern portion ng Leyte (Villaba, Kananga, Matag-ob, Palompon, Ormoc, Merida, Isabel, Ormoc City, Albuena, Pastrana, Dagami, Tanauan, Tabontabon, Tolosa, Barauen, Julita, Dulag), northeastern portion ng Capiz (Pilar), northeastern portion ng Iloilo (Carles, Balasan, Estancia, Batad), at Northern Cebu (Medelin, Daanbantayan, Madridejos, Bantayan, Santa Fe).

Mahigpit na nagbabala ang PAGASA sa mga residente ng nabanggit na apektadong mga lugar na maging napakaingat sa posibleng mga biglaang pagbaha at pagguho.