Bagyong Ambo, bumilis habang papalabas ng bansa

Bumilis pa habang kumikilos palabas ng Philippine Area of Responsibility (PAR) ang Bagyong Ambo na nanalasa sa ilang lugar sa Luzon at Visayas.

Sa severe weather bulletin na ipinalabas ng Philippine Atmospheric, Geophysical and Astronomical Services Administration (PAGASA) ngayong alas-5:00 ng hapon, huling namataan ang bagyo sa layong 110 kilometro ng Hilaga-Hilagang Kanluran ng Laoag City, Ilocos Norte na kumikilos sa bilis na 30 kilometro kada oras.

Taglay ng bagyo ang lakas ng hangin na 65 kilometro kada oras at pagbugsong hanggang 80 kilometro kada oras.

Tinataya ng PAGASA na kung hindi magbabago ang bilis ng bagyo ay lalabas na ito sa PAR sa Lunes ng hapon.

Nakataas ang Tropical Cyclone Wind Signal No. 1 sa Ilocos Norte, Batanes, Babuyan Islands, northwestern portion ng Cagayan (Santa Praxedes, Claveria, Sanchez Mira, Pamplona, Abulug, Ballesteros), at sa northern portion ng Apayao (Calanasan, Luna).

Asahan na umano ang mahina hanggang sa katamtaman na minsan ay lalakas na pag-ulan ngayong gabi sa Ilocos Region, Cordillera Administrative Region, Cagayan Valley at sa northern portion ng Aurora.

Magiging katamtaman hanggang sa malakas ang pag-ulan sa Batanes at Babuyan Islands hanggang bukas.

Hirit kay P-Duterte: PhilHealth contributions ng mga health workers, 'wag taasan

Inihain ni Lone San Jose Del Monte City, Bulacan Rep. Florida Robes ang Resolution No. 862 na humihiling kay Pangulong Rodrigo Duterte na suspendihin ang pagpapatupad ng pagtataas sa PhilHealth contribution ng mga kasapi kabilang ang mga doktor at iba pang health workers, sa gitna ng economic challenges dulot ng COVID-19 pandemic.

Photo: fb @Congw. Ate Rida Robes (right)

Matatandaang sa ilalim ng Republic Act 11223 o Universal Health Care Act, nag-isyu ang PhilHealth ng Circular No. 2019-0009 na itataas ang rate ng Direct Contributors sa 3 percent ng kanilang monthly basic salary simula 2020 at nababagay sa mga pagdaragdag ng 0.5 percent bawat taon hanggang sa maabot nito ang 5 percent limitasyon sa 2025 na inilahad ng batas.

Naka-fix ito sa kita na P10,000 sa loob ng limang taon habang ang salary ceiling ay tataas ng P10,000 bawat taon hanggang makaabot sa P100,000 sa 2025.

Sa resulta ng pagtaas ng premium contribution, ang mga health care professionals, kabilang ang mga nagtatrabaho sa probinsya ay kailangan umanong magbayad ng mula P60,000 hanggang P100,000 para makakuha ng kanilang PhilHealth accreditation.

Titser na nagbanta kay P-Duterte, tutuluyan

Nakatakdang ipagharap ng kasong inciting sedition sa hukuman sa Zambales sa susunod na linggo ang gurong nag-post sa kanyang social media account ng pagbabanta kay Pangulong Rodrigo Duterte.

Photo: NBI

Pero ayon kay Prosecutor General Benedicto Malcontento, pupuwedeng maghain na ng piyansa si Ronnel Mas para sa pansamantala nitong kalayaan.

“Call na niya 'yan and his defense team kasi from the start bailable yan," ayon kay Malcontento.

Nauna nang iprinisinta ng National Bureau of Investigation sa Department of Justice si Mas para sa inquest proceeding ng kasong inciting to sedition na may kaugnayan sa Republic Act 10175 o Cyber Crime Prevention Act of 2012.

Si Mas ay dinakip noong Mayo 11 sa Barangay North Poblacion sa Sta. Cruz, Zambales dahil sa kanyang post sa Twitter na naglahad na handa siyang magbigay ng P50 milyong reward sa kung sinuman ang makapapatay kay Pangulong Duterte.

Samantala, inihayag ni Assistant State Prosecutor Jeanette Dacpano sa kanyang inquest resolution na may depekto ang pag-aresto ng NBI kay Mas lalo na't hindi umano maituturing na continuing crime ang alegasyong inciting to sedition.

Noong Mayo 5 pa umano nai-post ni Mas ang kanyang tweet ngunit lumipas pa ang anim na araw bago ito inaresto nang walang warrant of arrest.

"Inciting to sedition is not a continuous crime for which the offender may be arrested without a warrant duly issued by the proper authority. Being a cybercrime, the arresting officer must have conclusive evidence that the person who wrote the text in the Twitter account... is indeed Ronnel Mas and not someone impersonating him," ayon pa sa inquest reolution.

Gayunman, sinabi nito na ang pag-amin at pagso-sorry ng guro sa ginawang komento nito sa social media ang naging remedyo sa warrantless arrest sa kanya.

"Be that as it may, the defect of Mas’s warrantless arrest was ultimately cured when Mas extra-judicially admitted to the media that he personally posted the provocative text in his own Twitter account @RonPrince_,” ayon sa taga-usig ng gobyerno.