4 patay sa Bagyong Ambo

Apat ang naiulat na nasawi sa pananalasa ng Bagyong Ambo.

Batay sa imbestigasyon, isang 62-anyos na ginang na si Lourdes Quinto ang nasawi habang sugatan ang asawa niyang si Melencio, 66, nang madaganan ng pader ang kanilang bahay sa

Catanauan, Quezon sa kasagsagan ng pananalasa ng bagyo.

Nasawi din si Junil Banzagales, 24, ng Bacacay, Albay na nakuryente matapos aksidenteng mahawakan ang live wire sa pagha­gupit ng bagyo.

Patay din ang isang lalaki nang tamaan ng nabasag na salamin sa pananalasa ng bagyo sa San Policarpio, Eastern Samar.

Isa rin ang nasawi sa Almagro, Eastern Samar.

Kasabay nito ang pagkabuwal ng mga poste ng kuryente, pagkawasak ng mga bahay at gusali at maging ang mga isolation facility para sa mga Person Under Investigation (PUIs ) sa COVID-19.

Sa pahayag ni National Disaster Risk Reduction and Management Council (NDRRMC) Executive Director Ricardo Jalad, maraming mga nasirang daan sa Eastern Samar na pinakagrabeng sinalanta ng Bagyong Ambo.

Pagdinig sa kaso ni Sen. Koko sa umano’y paglabag sa quarantine protocol, ni-reset ng DOJ

Hindi tuloy ang preliminary investigation kaugnay ng umano’y paglabag ni Senator Aquilino “Koko” Pimentel III sa quarantine protocol.

Ayon kay Prosecutor General Benedicto Malcontento, ang tentative at na-reset na petsa ay sa Hunyo 18.

Una rito, sinabi ng Department of Justice (DOJ) na ang tentative date sa pagdinig ay isasagawa sa Mayo 20.

Matatandaang, nag-ugat ang reklamo sa umano'y pagiging pabaya ni Pimentel nang nagtungo ito sa Makati Medical Center sa panahong siya pala ay positibo sa covid-19, dahilan para malagay sa peligro ang publiko at mga health workers.

Una rito, sa pamamagitan ng electronic filing, sinampahan ng abogado sa DoJ si Pimentel ng kasong paglabag sa RA 11332 at ang implementing rules and regulation ng naturang batas maging ang ilang regulasyon ng Department of Health (DoH).

Sa ilalim ng R.A. 11332 o mandatory reporting of notifiable diseases and health events of public health concern act, maaaring makulong ng hanggang anim na buwan o pagmultahin ang isang indibidwal na lumabag sa batas mula P20,000 hanggang P50,000.

P1.30 taas-presyo sa gas

Panibagong pagtaas sa presyo ng petrolyo ang ipatutupad ng mga kumpanya ng langis sa Martes

Ayon sa Department of Energy (DOE) posibleng maglaro sa P1.20 hanggang P1.30 ang itataas sa kada litro ng gasolina.

Nasa P.50-P.60 naman ang itataas sa bawat litro ng diesel at P1.35 naman sa kada litro ng kerosene.

Dahilan umano ng price hike ang production cut ng Organization of the Petroleum Exporting Countries (OPEC) at kanyang mga kaalyadong bansa, at ang panahon ng pagkakaroon ng maintenance shutdown ng mga refineries ng mga kumpanya ng langis.