Quarantine rules kapag 'di nasunod... Mga mall, ipasasara — DILG

Nagbabala ang Department of the Interior and Local Government (DILG) na maipasasara ang mga mall kung mabibigong masunod ang mga health protocol sa ilalim ng modified enhanced community quarantine.

Ayon kay DILG Secretary Eduardo Año, kailangang mahigpit na sumunod ang mga mall sa pagpapatupad ng physical distancing at crowd control sa kanilang mga establisimyento.

Inatasan na ng kalihim ang lahat ng local government units (LGUs) at pulisya na mag-inspeksiyon sa mga mall at ipatiyak sa mga may-ari na dapat ay nasusunod ang minimum health standards ng Department of Health (DOH) at quarantine protocols.

Diin ni Año, kung hindi susunod ay pupuwedeng ipasara ng Philippine National Police ang mall at kasuhan ang mga may-ari nito ng paglabag sa Bayanihan to Heal As one Act.

Sinabi naman ni Joint Task Force Covid Shield Commander Police Lt. Gen. Guillermo Eleazar na naibigay na sa mga police commander ang listahan ng mga mall at iba pang business establishments kung saan may paglabag sa physical distancing.

“These commanders were instructed to warn the management of these malls and make sure that the warning be personally relayed to the mall management and other similar establishments,” ayon kay Eleazar.

Kinalap na rin ng task force ang mga larawan at video sa social media na sinasabing paglabag sa physical distancing rules upang magamit na ebidensiya.

Batay sa regulasyon, isang tao lang ang pupuwede sa dalawang square meters na common area sa mall para matiyak ang tamang distansiya ng mga tao.

Regular ding pinagpapatrulya sa loob ng mall ang mga guwardiya o empleyado upang maipaalala sa mga kustomer ang mga regulasyon ng social distancing at pagsusuot ng face mask. Kapag umabot na sa limitasyon ng maximum na mga taong pinapayagan sa loob ng mall, papipilahin ang mga ito sa labas at paghihintayin na mabawasan ang mga nasa gusali.

Pamamahagi ng pondo ng SAP, ipinalilipat sa barangay officials

Sa layong mapabilis ang pamamahagi ng ikalawang wave ng cash assistance sa ilalim ng Social Amelioration Program (SAP), iminumungkahing maipasa ang responsibilidad na ito sa mga opisyal ng barangay.

Inihain ni Marikina City Rep. Bayani Fernando ang House Resolution 807 na nagpapanukala sa gobyerno na ipatrabaho na sa mga barangay ang pagproseso ng listahan ng mga benepisyaryo ng SAP na sesertipikahan ng Sangguniang Barangay sa pamamagitan ng resolusyon at ipakikita sa publiko.

Ilalagay sa barangay hall o sa iba pang pampublikong lugar ang listahan ng benepisyaryo para makita kung may kuwestyunableng indibidwal ang naisama.

Pagkatapos nito, ang listahan ay isusumite sa Department of Interior and Local Government (DILG) para masuri at kung pasado na ay isusumite naman ng DILG sa Department of Budget and Management.

Direktang ilalabas ng DBM ang pondo sa mga barangay.

Ipatitiyak sa mga barangay captain at barangay treasurer na naipamahagi ang lahat ng pondo sa tamang mga benepisaryo.

Kapag may natukoy na anomalya sa paglilista at pamamahagi ng cash aid, mananagot ang mga barangay chairman at kanilang treasurer.

Nakasaad din sa resolusyon na ang lahat ng pamilya sa Luzon ay pabibigyan ng P5,000 kahit pa mayaman, middle class o mahirap ay dapat maging pantay-pantay ang ayuda.

Paliwanag ni Fernando, ang mga barangay official ang higit na nakakaalam o nakakakilala sa kanilang mga nasasakupan kaya't upang mapabilis ang proseso ay dapat na ibigay na sa kanila ang trabaho ng pamamahagi ng SAP.

Naaprubahan na sa komite ang resolusyon at nakatakdang talakayin at paaprubahan sa plenaryo ng Kapulungan.

Task Force vs. COVID-19, naalarma sa 'pagkasabik' ng publiko sa mas maluwag na community qua

Ikinaalarma ng National Task Force (NTF) Against COVID-19 ang pagkasabik ng publiko sa pagsisimula ng mas maluwag na quarantine restrictions na nagsimula kahapon.

Sa panayam kay NTF Against COVID-19 Spokesperson retired General Restituto Padilla, pinaalalahanan nito ang publiko na manatiling maingat laban sa posibleng pagkalat ng virus.

“Nababahala po ang NTF sa nangyari kahapon. Naging excited po ang ating mga kababayan. Ito po ay siguro ay kakulangan sa ganap na pagkaintindi sa sakit na nangyayari ngayon,” ani Padilla.

“Kami po ay humihiling sa sambayanan na huminahon po tayo. Huwag tayong ma-excite,” dagdag pa nito.

Nagkaroon ng mabigat na trapiko sa ilang bahagi ng Metro Manila at Luzon nitong Sabado nang magsimula nang lumuwag ang quarantine rules.

Mula enhanced community quarantine (ECQ) ay isinailalim ang Metro Manila, Bataan, Bulacan, Nueva Ecija, Pampanga, kabilang ang Angeles City, Zambales at Laguna sa modified enhanced community quarantine (MECQ).

Nananatili namang nasa ECQ ang Cebu City at Mandaue City habang ang nalalabing bahagi ng bansa ay isinailalim sa general community quarantine (GCQ).

Sa pahayag ni National Disaster Risk Reduction and Management Council (NDRRMC) Executive Director Ricardo Jalad, maraming mga nasirang daan sa Eastern Samar na pinakagrabeng sinalanta ng Bagyong Ambo.