Unang araw ng GCQ... ‘Survivor Philippines”

Kasabay ng unang araw ng pagpapairal ng general community quarantine (GCQ) sa Metro Manila, inaasahan na umano ang pagdagsa ng mga tao at sasakyan.

Hindi tuloy maiwasan ng mga netizens na magbigay ng reaksiyon at sinabing tila ‘Survivor Philippines’ o matira-matibay ang mangyayari.

Anila, kung limitado ang sasakyan at kapasidad ng mga ito, hindi imposible na malabag din ang mga health protocols tulad ng physical distancing.

Tiyak umanong hahaba ang pila sa mga kalsada at mag-uunahan ang mga commuters na balik-trabaho.

Gayunman, nakahanda na umano ang National Capital Region (NCR) na luwagan ang health at safety protocols kontra Coronavirus Disease 2019 at ipatupad ang GCQ ngayong raw. Iiral ng dalawang linggo o hanggang Hunyo 15 ang GCQ matapos ang dalawang buwan na isinailalim ang Metro Manila sa enhanced community quarantine at modified enhanced community quarantine.

Ayon kay Joint Task Force COVID Shield Commander Police Lieutenant General Guillermo Eleazar, sa gitna ng kahandaan ay magiging hamon din sa pulisya ngayon ang pagdagsa ng mga tao na lalabas ng bahay at ang pagdami ng mga sasakyan sa lansangan. Simula ngayong araw ay mapapayagan na rin ang operasyon ng mga tren, bus augmentation, taxi, TNVS (transport network vehicle service), shuttle services, point-to-point buses, bicycles, tricycles.

Gayunman, hindi pa puwede ang public utility buses, UV Express units at jeepneys.

Tiniyak ng JTF CV Shield commander na magsasagawa sila ng random checking sa mga motorista upang alamin kung sila ay authorized persons outside residence (APOR) o empleyado ng industriyang pinapayagan nang mag-operate sa ilalim ng GCQ. Tiniyak din ni Metro Manila Council chairman at Parañaque City Mayor Edwin Olivarez na handa na ang mga lokal na pamahalaan sa NCR para sa GCQ.

Religious activities limitado sa 5 katao, Bishop Pabillo pumalag

Hindi praktikal at hindi makatotohanan.

Ito reaksiyon ni Manila Archdiocese Apostolic Administrator Bishop Broderick Pabillo kasunod ng desisyon ng Inter-Agency Tasks Force on Emerging Infectious Disease (IATF-EID) na payagan ang mga religious gatherings sa mga lugar na isinailalim sa modified enhanced community quarantine

(MECQ) at general community quarantine (GCQ) pero, limitado lamang.

Nabatid na batay sa Section 2 No. 9 ng guidelines na inilabas ng IATF sa lugar na umiiral ang MECQ tulad ng National Capital Region, pinapayagan ang pagsasagawa ng mga gawaing Simbahan ngunit limitado lamang sa lima katao.

"Welcome in a sense na pinapayagan na [religious gatherings] but unwelcoming na ang kanilang limitasyon ay impractical," pahayag ni Pabillo sa panayam ng church-run Radio Veritas.

Puna ni Pabillo, sa mga tanggapan at iba pang institusyon ay pinapayagan ng pamahalaan ang halos kalahati sa kanilang work force tulad ng mga pabrika ngunit ang mga Simbahan na malalawak ang lugar ay nililimitahan sa lima at sampung katao lamang.

Giit ni Pabillo, hindi makatotohanan ang bilang na iminungkahi ng IATF kaya't dapat nila itong suriin at irekonsidera.

"Gumagawa sila ng desisyon na hindi kinokonsulta ang people at sector concerned," pagbibigay diin ni Pabillo.

Magugunitang nagsumite ang arkidiyosesis ng panuntunan sa IATF sa pamamagitan ng Department of Health dalawang linggo ang nakalipas ngunit walang natanggap na feedback dito.

Mas mabuti aniyang magbigay ang IATF ng alituntunin tulad ng pagpapatupad ng isa o dalawang metrong pagitan ng mga magsisimba sa loob ng simbahan.

Nitong Mayo 15 ay nagtapos na ang enhanced community quarantine kasabay ng pagpatupad ng general community quarantine sa buong bansa maliban sa National Capital Region, Laguna, Bacoor City sa Cavite at Cebu na isinailalim sa MECQ dahil sa naitalang mataas na kaso ng COVID 19.

COVID-19 cases 'pag tumaas, total lockdown ulit — DOH

Nagbabala ang Department of Health (DOH) ng muling pagpapatupad ng lockdown kung muling tataas ang mga kaso ng covid-19 sa bansa.

Ang babala ay ginawa ni Health Usec. Ma Rosario Vergeire kasunod ng pagdagsa ng marami nating kababayan sa mga mall nitong weekend matapos magsimula ang implementasyon ng modified enhanced community quarantine kahapon, Mayo 16.

Paalala ni Vergeire sa publiko, kahit nasa MECQ o GCQ na ay nananatili pa ring umiiral ang community quarantine.

Binigyang-diin ng opisyal na bawat isa ay may responsibilidad at obligasyon na sumunod sa panuntunan upang hindi na dumami pa ang kaso ng covid-19 sa bansa.

Ayon kay Vergeire, bago lumabas ng bahay dapat isipin kung kailangan ba talagang magpunta sa mall sa panahong ito.

Nagpalabas na aniya ng guidelines ang Department of Trade and Industry para sa mall owners na dapat sundin upang hindi sila dagsain ng tao.

Umaasa aniya ang DOH na susunod ang mall owners at mga lokal na pamahalaan para maipatupad ang mga health standards upang maiwasan na ang dagsa ng tao sa mga mall.

Paliwanag ni Vergeire, nasa transition period na tayo ngayon upang mapababa pero kung biglang

tataas o magkakaroon ng surge ng mga kaso ng covid-19 sa bansa ay asahan ang posibilidad na magkaroon ng total lockdown.