Libreng sakay sa Pasig Ferry, bukas na

ni Thea Janica Teh | December 8, 2020

Bukas na tuwing Linggo ngayong buwan ng Disyembre ang Pasig River Ferry Service (PRFS), ayon sa Metropolitan Manila Development Authority (MMDA).

Ayon sa inilabas na pahayag ng ahensiya, “Passengers can now enjoy FREE ferry rides from Monday to Sunday from 6 a.m. to 6 p.m.”

Ito ang ilan sa mga istasyon na handa nang maghatid ng mga pasahero araw-araw:

Pinagbuhatan at San Joaquin sa Pasig City;

Guadalupe sa Makati City;

Hulo sa Mandaluyong City;

Lambingan, Sta. Ana, Polytechnic University of the Philippines (PUP), Escolta at Lawton sa Manila City

Pinaalalahanan naman ng MMDA ang lahat ng pasahero na kinakailangan pa ring tingnan ang temperature at ugaliin ang pagsusuot ng face mask at face shield na parte ng strict enforcement ng health at safety protocol laban sa COVID-19.

Bukod pa rito, sa loob ng ferry boat, kinakailangan din na magsagawa ng physical distancing at sumagot sa commuter information sheet bago sumakay.

Pinakamataas na recovery rate sa NCR, naitala sa Taguig City

ni Thea Janica Teh | December 7, 2020

Nakapagtala ng 98% recovery rate sa COVID-19 ang Taguig City ngayong Lunes ayon sa city government.

Ayon sa lokal na pamahalaan ng Taguig, nasa 98.44% na ang recovery rate sa kanilang lugar. Ito ay mas mataas pa sa recovery rate ng buong National Capital Region (NCR) sa 95.19%.

Simula noong Marso ngayong taon, nakapagtala ng kabuuang 9,749 kaso ng COVID-19 sa Taguig. Mula rito, 9,597 na ang gumaling, 107 ang namatay at tanging 45 na lamang ang aktibo.

Ibinahagi ni Mayor Lino Cayetano na ang aktibong kaso ng virus sa kanilang lugar ay isa sa pinakamababang bilang sa buong Metro Manila bukod sa Malabon at Pateros na mayroon na lamang 34 aktibong kaso.

Kaya naman pinaalalahanan ni Cayetano ang mga residente sa kanilang lugar na ipagpatuloy lamang ang pagsunod sa mga health protocols upang mapanatili ang mababang bilang ng kaso ng COVID-19 sa kanilang lugar.

MPTC, umapela kay Gatchalian sa suspensiyon ng RFID system

ni Thea Janica Teh | December 7, 2020

Umapela ngayong Lunes ang Metro Pacific Tollways Corp. (MPTC) kay Valenzuela City Mayor Rex Gatchalian na i-reconsider ang suspensiyon ng implementasyon ng RFID system na naging sanhi ng matinding traffic sa lungsod.

Nitong Biyernes, binigyan ni Gatchalian ang NLEX Corp. ng 24 oras upang makapagpasa ng action plan at 72 oras para maipaliwanag kung bakit hindi dapat suspendihin ang kanilang business permit.

Nag-request ang NLEX Corp. na gawin itong 15 araw ngunit hindi ito tinanggap ni Gatchalian.

Ayon kay MPTC Chief Communication Officer Junji Quimbo, iginagalang umano nila ang karapatan ng pamahalaang lokal at tinitingnan na nila kung paano makakasunod.

Bukod pa rito, humingi na rin ng pasensiya ang NLEX Corp. sa mga residente ng Valenzuela at sinabing bukod sa RFID system, dahilan din ng matinding traffic ang papalapit na Kapaskuhan.

Sa ngayon, inaayos na at pinaplano na ng NLEX Corp at San Miguel Corp na siyang nag-o-operate sa South Luzon Expressway ang implementasyon ng RFID system.