@Buti na lang may SSS | October 21, 2022
Dear SSS,
Magandang araw! Ako ay pensyonado ng SSS. Kamakailan ay nabalitaan ko na mayroong pautang para sa aming mga pensyonado. Paano ba mag-apply? - Tomas
Sagot
Mabuting araw sa iyo, Lolo Tomas!
Totoong may pautang na ibinibigay ang SSS para sa mga retiradong pensyonado nito at ito ang Pension Loan Program (PLP) na binuksan mula pa noong Setyembre 2018. Layunin ng programa ang makapagbigay ng tulong-pinansyal sa pamamagitan ng pautang na may mas mababang interest. Batid naman natin na kailangan n’yo ng karagdagang financial assistance para sa inyong mga pangangailangang medikal, atbp.
Ang PLP ay nagsisilbing alternatibo sa mga private lending institutions kung saan mas mababa ang interes at hindi kailangang gamiting kolateral ang ATM cards ng pensyonado.
Upang makahiram sa ilalim ng PLP kinakailangan na matugunan ninyo ang sumusunod na kondisyon:
hindi dapat hihigit sa 85 taong gulang sa katapusan ng termino ng pautang;
walang ibinabawas sa kanyang buwanang pensyon, tulad ng natitirang balanse sa ibang pautang ng SSS o kaya’y sobrang benepisyong binayaran ng SSS;
walang utang sa ilalim ng SSS Calamity Assistance Package; at
tumatanggap na ng regular na pensyon na hindi bababa sa isang (1) buwan.
Halimbawa, nag-apply kayo ngayong Hulyo 2022, ang simula naman ng inyong pagbabayad ay sa Setyembre 2022 pa.
Sa kasalukuyan, maaari kayong makahiram ng katumbas ng tatlo hanggang 12 beses ng inyong tinatanggap na basic monthly pension (BMP) kasama ang P1,000 additional benefit na ibinigay noong 2017. Subalit, hindi ito hihigit sa P200,000 na siyang maximum loanable amount na ipinahihiram sa ilalim ng PLP. Dagdag pa rito, ang net take-home pension o matitira sa inyong buwanang pensyon ay hindi dapat bababa sa 47.25%.
Samantala, ang pension loan na katumbas ng tatlong beses ng inyong tinatanggap na buwanang pensyon ay babayaran ninyo sa loob ng anim na buwan; kung katumbas naman ng anim na beses ng inyong buwanang pensyon, maaari ninyo itong bayaran sa loob ng 12 buwan, Lolo Tomas. Kung ang nahiram ninyong pension loan ay katumbas ng siyam o 12 beses ng buwanang pensyon, maaari naman ninyo itong bayaran ng hanggang 24 buwan o sa loob ng dalawang taon.
Online na rin ang pag-file ng application sa PLP maging kayo man ay first-time borrower o magre-renew ng pension loan. Kinakailangan lamang na kayo ay nakarehistro sa My.SSS na matatagpuan sa SSS website, www.sss.gov.ph. Kinakailangan ding ninyong ibigay ang inyong contact number o aktibong mobile number, kabilang ang inyong SSS UMID-ATM o kaya’y ang Union Bank Quick Cash Card para rito.
Narito ang paraan ng pagpa-file ng loan application sa PLP:
Mag-log in sa inyong My.SSS account.
Magtungo sa E-Services tab kung saan makikita ninyo ang “Apply for Pension Loan.”
I-click ninyo ang “Apply for Pension Loan” upang simulan ang iyong aplikasyon.
Piliin ang halaga ng iyong uutangin at kung gaano mo ito katagal babayaran.
Matapos nito, i-click ang “I agree sa mga terms and conditions of the program.”
Maaari naman ninyong i-download o kaya’y i-print ang kopya ng Disclosure Statement. Makatatanggap kayo ng kumpirmasyon sa pamamagitan ng e-mail o text tungkol sa iyong aplikasyon. Papasok naman ang halaga ng iyong inutang sa inyong UMID-ATM o UnionBank Quick Cash Card.
Ang kagandahan ng programang ito ay ang pagkakaroon ng credit life insurance ng borrowers. Kung sakali mang pumanaw ang nangutang na pensyonado at dahil dito hindi na nito maituloy ang pagbabayad ng kanyang loan. Sa ilalim ng credit life insurance, babayaran ng isang insurance company ang natitirang utang ng pensyonado sa SSS.
***
Nais naming ipaalam sa aming mga pensyonado na maaari silang mag-comply sa Annual Confirmation of Pensioners (ACOP) Program o ang taunang pagre-report ng mga pensyonado sa SSS hanggang Oktubre 31, 2022. Ang mga pensyunado na dapat tumugon sa ACOP ay mga retirement pensioners na naninirahan sa ibang bansa, total disability pensioner, survivor pensioner (death) at dependent (minor/incapacitated) pensioner sa ilalim ng guardianship.
Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.
Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.