Ano ang Workers’ Investment and Savings Program at paano maghuhulog dito?

@Buti na lang may SSS | March 26, 2023

Dear SSS,

Magandang araw!

Nais kong malaman kung bakit mahalaga ang Workers’ Investment and Savings Program ng SSS sa mga miyembro nito, at paano ko makikita ang record ng naihuhulog ko sa nasabing programa? Salamat. —Lilia ng Davao City

SAGOT:

Mabuting araw sa iyo, Lilia!

Mahalaga ang Workers’ Investment and Savings Program (WISP), sapagkat ito ay nagsisilbing karagdagang social protection ng mga miyembro bukod sa kanilang regular SSS program.

Ang WISP ay isa sa mga probisyon sa ilalim ng Republic Act No. 11199 o ang Social Security Act of 2018 na sinimulang ipatupad noong Enero 2021. Ito ay isang provident fund scheme na pinangangasiwaan at ipinatutupad ng SSS upang matulungan ang mga miyembro na makaipon ng mas malaki para sa kanilang pagreretiro. Tulad ng regular SSS program ay hinuhulugan din ito kada buwan.

Nasasakop ng WISP ang mga miyembro na kumikita ng maximum monthly salary credit na mahigit sa P20,000 at walang final claim sa ilalim ng regular SSS program.

Awtomatiko naman ang pagiging kasapi nila sa nasabing programa.

Ang kanilang magiging buwanang hulog ay mula P70 hanggang P1,400. Kailangan namang ang miyembro ay aktibong naghuhulog ng kanyang buwanang kontribusyon sa ilalim ng regular SSS program.

Halimbawa, kung ikaw ay kumikita ng P23,750 kada buwan, bawat buwan ay maghuhulog ka ng P2,830 para sa iyong regular SSS contribution, kasama na rito ang P30 na hulog para naman sa Employees’ Compensation Program, at P560 naman ang napupunta sa iyong WISP.

Sa mga covered employee o mga miyembro na may employer na pinapasukan, paghahatian nila ang hulog sa WISP, gaya ng sa regular na hulog sa SSS. Halimbawa, ikaw, Lilia ay kumikita ng P23,750 kada buwan at nag-iipon ng P560 bawat buwan para sa WISP, ang magiging share ng iyong employer ay P380, samantalang sasagutin mo naman ang P180.

Maaari ring i-check ng miyembro ang posting ng kaniyang kontribusyon sa WISP sa pamamagitan ng kanyang My.SSS account. Mag-log in sa kanyang account sa My.SSS.

Sunod, magtungo sa “Inquiry” tab at i-click ang “Contributions.” Makikita rito ang contributions niya sa WISP maging ang posting ng kanyang buwanang hulog sa regular na SSS program at WISP Plus.

Sinusundan ng SSS ang prinsipyo ng work, save, invest at prosper. Kaya naman ilalagak sa investment ng SSS ang WISP ng mga miyembro. Ang anumang kikitain dito ay ibabalik nang proporsyonal sa miyembro depende sa halaga ng kanilang contributions. Ang posted contribution sa isang buwan ay magkakaroon ng share sa investment income simula sa unang araw ng susunod na buwan. Hindi lamang nag-iipon ang miyembro kundi kumikita pa ang pinag-iipunan niya.

Sa iyong pagreretiro, Lilia, pareho mong makukuha ang iyong retirement benefit mula sa regular na programa ng SSS at ang iyong naipon sa WISP. Ang WISP ay magandang pagkakataon upang magkaroon ka ng mas komportableng pagreretiro kung saan lahat ng iyong naipon ay siya mo namang pakikinabangan sa kinabukasan. Bukod pa rito, ang iyong maiipon sa WISP ay tax-free at ginagarantiyahan ng SSS.

***

Paalala naman sa ating mga pensyonado na hanggang Marso 31, 2023 na lamang sila maaaring mag-comply sa Annual Confirmation of Pensioners (ACOP) Program o ang taunang pagre-report ng mga pensyonado sa SSS para sa calendar year 2021.

Samantala, ang mga pensyonadong dapat tumugon sa ACOP ay mga retirement pensioners na naninirahan sa ibang bansa, total disability pensioner, survivor pensioner (death), at dependent (minor/incapacitated) pensioner sa ilalim ng guardianship. Kung kasalukuyang naninirahan sa Pilipinas ang isang retirement pensioner, sila ay exempted para sa ACOP compliance.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Mga pensyonadong dapat mag-comply sa ACOP Program

@Buti na lang may SSS | March 19, 2023

Dear SSS,

Magandang araw! Nais kong itanong kung ang lola ko ba ay dapat pang mag-comply sa ACOP? Pensioner siya ng SSS mula noong 2017. Salamat. —Bernard

SAGOT:

Mabuting araw sa iyo, Bernard.

Para sagutin ang katanungan mo, dapat muna nating alamin kung anong uri ng pensioner ang lola mo. Siya ba ay retirement, survivor o total disability pensioner? Kasalukuyan ba siyang nasa abroad o nandito sa Pilipinas?

Nais naming ipaalam sa iyo, Bernard, na kinakailangang magpasa ng compliance sa ACOP ng mga sumusunod:

• Retirement pensioners na naninirahan sa abroad;

• Total disability pensioners;

• Survivor pensioners; at

• Dependents at guardians.

Samantala, ang mga retirement pensioners na naninirahan sa Pilipinas ay exempted dito.

Kung ang lola mo ay kabilang sa aking mga nabanggit na kailangang mag-comply, kailangan niyang tumugon sa ACOP. Kailan ba siya dapat mag-comply?

Kung siya ay retirement pensioner na naninirahan sa abroad o total disability pensioner, kailangan niya itong gawin kada taon sa kanyang birth month; kung siya naman ay survivor pensioner, sa birth month ng kanyang yumaong asawa o miyembro ng SSS; pero kung siya naman ay dependent o guardian, dapat niya itong gawin sa birth month ng pensioner o yumaong member, alinman ang applicable rito.

Pero mahalaga rin nating malaman kung noong mga nakaraang taon ba simula noong maging pensioner ang lola mo ay nag-comply na siya sa ACOP. Matatandaan kasi na noong 2020, pansamantalang sinuspinde ang pagsasagawa ng ACOP ng SSS dahil sa COVID-19 at ibinalik lamang ito noong Oktubre 2021.

Kung hindi pa siya nakapag-comply simula 2020 hanggang ngayon, mayroon na lamang siyang hanggang Marso 31, 2023 para mag-comply upang hindi masuspinde ang kanyang pension effective sa kanyang May 2023 pension.

Paano naman niya gagawin ang nabanggit na compliance?

Madali lamang ‘yan. Una, kinakailangan lamang ipasa ng pensioner o dependent with guardian ang required documents sa alinmang SSS branch o foreign office, o OFW-Contact Services Section sa pamamagitan ng e-mail, mail, o courier.

Para naman sa mga pensioner na nasa abroad, maliban sa total disability pensioners, maaari rin silang mag-request ng video conference sa SSS sa pamamagitan ng pagpapadala ng request for schedule sa e-mail address na ofw.relations@sss.gov.ph.

Para naman sa total disability pensioners na naninirahan sa Pilipinas, maaari rin silang mag-request ng home visit o conduct of domiciliary medical service sa SSS.

Para sa karagdagang impormasyon tungkol sa ACOP compliance, bisitahin ang https://crms.sss.gov.ph, i-click ang “Knowledgebase,” hanapin ang ACOP at i-click ito.

Nandito ang listahan ng documentary requirements at kumpletong guidelines sa pagku-comply sa ACOP.

Mayroon ding sample photos dito para lubos na maintindihan ng mga pensioner ang mga kinakailangang gawin.

Kapag nakapag-comply na ang lola mo ngayong taon, kailangan pa ba niyang magpasa muli para sa taong 2023 ng compliance? Ang sagot naman dito ay depende. Ang kinokonsidera kasi na early compliance ng SSS ay anim na buwan o mas mababa rito kumpara sa kanyang orihinal na schedule. Halimbawa, ang lola mo ay dapat mag-comply sa ACOP tuwing buwan ng July kada taon, kung siya ay magku-comply ngayong Marso, hindi na niya kailangan pang magpasa muli.

Pero kung siya naman ay dapat mag-comply tuwing Disyembre, kailangan pa niyang magpasa ng compliance muli para sa 2023.

Sana ay nasagot ko ang iyong katanungan, Bernard. Inaanyayahan din kita, pati na rin ang iba pang nagbabasa nito, na bisitahin ang Knowledgebase Section ng https://crms.sss.gov.ph.

Makikita ninyo d’yan ang detalye ng mga benefits at loan programs ng SSS gayundin ang iba pa nitong mga serbisyo at programa.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.

Kaalaman tungkol sa kompyutasyon ng maternity benefit

@Buti na lang may SSS | March 12, 2023

Dear SSS,

Magandang araw! Nais kong malaman kung paano ang computation ng SSS maternity benefit.

Magkano naman ang benepisyong maaari kong makuha para rito? Salamat — Arianne

SAGOT:

Mabuting araw sa iyo, Arianne!

Binabati ka namin ng maligayang pagdiriwang ng Buwan ng mga Kababaihan.

Ang maternity benefit o benepisyo sa panganganak ay cash allowance na ibinabayad ng SSS sa mga kababaihang miyembro nito sa bawat araw na hindi siya makapagtrabaho dahil sa kanyang panganganak.

Sa ilalim ng Republic Act 11210 o mas kilala sa Expanded Maternity Leave Law (EMLL) na ipinatupad noong Marso 11, 2019, 105 days na ang paid maternity leave ng isang miyembro ng SSS, maging ito ay normal o caesarian delivery. Samantala, binibigyan naman ng 60 days na paid maternity leave ang mga kababaihan na nakunan o sumailalim sa emergency termination of pregnancy (ETP).

Samantala, ang mga solo parent ay maaari pang makakuha ng karagdagang 15 days na paid maternity leave.

Arianne, paano mo naman malalaman kung ikaw ay qualified sa nasabing benepisyo?

Una, dapat alamin mo ang semestre ng iyong panganganak. Ang semestre ay binubuo ng dalawang magkasunod na quarter o katumbas ng anim na buwan at nagtatapos sa quarter kung saan nakapaloob ang buwan ng iyong panganganak. Kapag alam mo na ang semestre ng iyong panganganak, aalamin mo naman ang 12-month period bago ang semester ng iyong contingency at i-check mo kung mayroon kang hindi bababa sa tatlong buwang hulog sa SSS. Kung mayroon kang tatlong hulog (o higit pa) sa loob ng nasabing period, qualified kang makakuha ng maternity benefit.

Sunod, alamin mo ang iyong average daily salary credit. Kinukuwenta ang average daily salary credit (ADSC) sa pamamagitan ng pagpili ng anim na pinakamatataas na monthly salary credit (MSC) sa loob ng 12-month period.

Kunin mo ang kabuuang halaga ng anim na MSC na ito at i-divide sa 180 (constant divisor).

Anumang halaga na makuwenta dito ay ang iyong average daily salary credit.

Panghuli, i-multiply ang average daily salary credit sa 105 kung normal o caesarian delivery o kaya sa 60 kung nakunan o ETP upang makuha kung magkano ang maternity benefit na iyong matatanggap.

Para sa iyong kaalaman, Arianne, ang MSC ang batayan ng computation ng mga benepisyo at loan ng isang miyembro ng SSS.

Halimbawa, ikaw ay nanganak noong Enero 26, 2023 at sumusuweldo ka ng P20,000 kada buwan.

Ang semester of contingency mo ay mula Oktubre 2022 hanggang Marso 2023. Kaya ang 12-month period bago ang semester of contingency ay magsisimula sa Oktubre 2021 hanggang Setyembre 2022. Dito pipiliin ang anim na pinakamatataas na monthly salary credit o MSC.

Ipagpalagay nating P20,000 ang MSC mo sa bawat buwan ng nasabing period, kukunin natin ang total ng anim na napiling MSC at makukuha natin ang P120,000, matapos nito ay i-divide ang P120,000 sa 180. Ang lalabas na average daily salary credit ay P666.67.

Ang P666.67 ay i-mu-multiply sa 105 days, kung normal o caesarian delivery at ang makukuha niyang benefit ay nagkakahalaga ng P70,000.

Subalit kung nakunan o sumailalim sa emergency termination of pregnancy, i-multiply ang P666.67 sa 60 at ang makukuha niyang benefit ay nagkakahalaga ng P40,000.

Dapat palaging siguruhin ng miyembro na updated ang kaniyang kontribusyon sa SSS upang maging kwalipikado siya sa maternity benefit. Samantala, wala ng kaukulang limit sa pagdadalang-tao ng miyembro simula noong ipatupad ang EMLL.

Dagdag pa rito, maaari nang i-file ang Maternity Benefit Application online sa pamamagitan ng My.SSS portal na matatagpuan sa SSS website (www.sss.gov.ph).

***

Nais naming ipaalam sa aming mga pensyonado na maaari silang mag-comply sa Annual Confirmation of Pensioners (ACOP) Program o ang taunang pagrereport ng mga pensyonado sa SSS hanggang Marso 31, 2023 para sa calendar year 2021.

Samantala, ang mga pensyonado na dapat tumugon sa ACOP ay mga retirement pensioners na naninirahan sa ibang bansa, total disability pensioner, survivor pensioner (death), at dependent (minor/incapacitated) pensioner sa ilalim ng guardianship. Kung kasalukuyang naninirahan sa Pilipinas ang isang retirement pensioner, sila ay exempted na para sa ACOP compliance.

---

Para sa tamang impormasyon at updates sa mga programa at benepisyo ng SSS, bisitahin at i-follow ang opisyal na Facebook page ng SSS sa “Philippine Social Security System” o sa Twitter account sa @PHLSSS. Maaari ding mag-subscribe sa YouTube channel sa "MYSSSPH" at sumali sa SSS Viber Community, “MYSSSPH Updates." Maaari din ninyong bisitahin ang uSSSap Tayo Portal sa https://crms.sss.gov.ph/.

Kung mayroon kayong katanungan tungkol sa SSS o kaya ay mayroon kayong paksa na nais talakayin sa pitak na ito, maaari kayong magpadala ng e-mail sa mediaaffairs@sss.gov.ph.