Suporta sa medical needs ng boxing at iba pang sports, oks na

Suportado ng Philippine Sports Commission (PSC) ang mga batas na isinusulong ng parehong Senado at Kongreso upang mapaunlad ang pampalakasan sa bansa.

Itinutulak nina Senators Manny Pacquiao at Bong Revilla Jr. ang paglikha ng Senate Bills 193 at 805 o Philippine Boxing and Combat Sports Commission na pinamumunuan ni Senate Committee on Sports na si Senator Bong Go.

Hinahangad nina Pacquiao at Revilla ang pagtatatag ng naturang mga batas upang lumikha ng isang hiwalay na kinatawan ng pamahalaan para pangasiwaan ang mga alalahanin ng propesyunal na boksing sa bansa.

Tumayo bilang resource persons sina PSC chairman William “Butch” Ramirez, PSC commissioner Charles Maxey at Games and Amusement Board (GAB) chairman Baham Mitra, kabilang ang ilang mga kinatawan ng iba’t ibang pribadong sektor at ahensiya ng gobyerno tulad ng Department of Budget and Management, Social Security System, PhilHealth, PAGIBIG Fund, Department of Health, Governance Commission for GOCCs, Elorde Promotions at kinatawan mula sa Muaythai associations.

Iminungkahi ni Ramirez na magkaroon ng mga posibilidad na paraan upang mabigyan ng solusyon ang mga alalahanin na itinaas sa naturang pagdinig tulad ng travel tax exemptions at mga probisyong pang-medikal.

“This is good that we are here and discussing this because we can see how we call all work together,” eksplika ni Ramirez.

Magkakaroon pa ng mga kasunod na pagdinig at konsultasyon upang maipagpatuloy ang pagtalakay sa mga posibilidad na panukala sa nasabing batas.

Gigil si Garcia na talunin si Pacman kung siya ang pipiliin

Determinado si dating four-division titlist Mikey Garcia na talunin si World Boxing Association (WBA) welterweight champion Manny “Pacman” Pacquiao sakaling matuloy ang laban ng dalawa na tinitingnang posibilidad na dalhin sa Jeddah, Saudi Arabia anumang petsa sa bakasyon.

Impresibo ang naging panalo ng 41-anyos na Filipino boxing legend laban kay Keith Thurman noong Hulyo ng isang taon kung saan nakuha nito ang kanyang 147-lbs title sa pamamagitan ng split decision victory sa MGM Grand Garden Arena sa Las Vegas, Nevada.

Kung kaya’t ito ang nagiging inspirasyon ni Garcia upang maging matagumpay laban sa pambansang kamao.

“I think I can definitely show everybody that, you know, even though he looked great [against Thurman], I can take him out and show that I’m just as great. And I need that opportunity. I need to get in the ring (with Pacquiao),” pahayag ni Garcia sa isang website.

Matatandaang isa si Garcia sa mga tinukoy na maaaring maging sunod na kalaban ng Eight-Division World champion ngayong taon.

Nito lamang nakaraang linggo ay matagumpay na nagwagi si Garcia laban kay Jesse Vargas sa isang unanimous decision sa Ford Center sa Star sa Frisco, Texas, upang maipakita ang karapatan nitong makaharap ang Fighting Senator.

“I would love to get in the ring with Manny,” wika ni Garcia matapos ang laban kay Vargas.

“You know, it’s a fight that’s been mentioned and talked about for several years. And now that I have a win in the welterweight division, people can actually consider me a viable contender.

And it’s been talked about for several years, so with this victory, it’s more accessible. And I would love to fight Manny Pacquiao. He’s a living legend. I would love to share that ring with him,” dagdag nito.

Bago pa man magwagi si Garcia kay Vargas ay nauna muna itong mabigo laban kay International Boxing Federation (IBF) at World Boxing Council (WBC) welterweight titlist Errol Spence Jr.

Noong Marso ng nakaraang taon na nagtapos sa unanimous decision win kay Spence.

Desidido ang 32-year-old na Oxnard, California, native na maisama sa kanyang listahan ang pambansang kamao.