Sta. Lucia at Petron wagi sa Superliga GP

Lalim na rin ng karanasan ang napatunayan ng Sta. Lucia na mas mabisang pansalag kontra Marinerang Pilipinas sa endgame, upang pagwagian ang laban sa 25-19, 21-25, 30-28 at 25-20 sa 2020 PSL Grand Prix, kagabi sa FilOil Flying V Centre.

Binalikat ni Royse Tubino ang pasanin sa laro para sa 2-0 ng Lady Realtors, nagpasabog ng 24 puntos.

“I’m so excited, our team fought really hard. A lot of our players stepped up. Royse stepped up and I’m so glad she’s on our team,” ayon kay Sta. Lucia skipper Shainah Joseph.

Para sa Realtors, si Joseph ay may 19 na marka habang si MJ Phillips ay may idinagdag na 13.

Kinakailangan ng Sta. Lucia ang lahat ng puntos ng tatlo upang matapatan si Hana Cutura.

Si Cutura ay nakagawa ng 35 puntos para sa Cherry Tiggo ng nakaraang apat na araw, nakaposte ng 29 puntos para sa Lady Skippers. “Iniisip ko na lang kanina na kailangan naming tapusin ang sinimulan namin,” ayon kay Tubino. “Kailangan namin ‘yung buong team na gumawa para manalo.” Lagpak ang Marinera sa 0-2.

Sa ikalawang laban, nagwagi ang Petron Blaze Spikers kontra Cherry Tiggo sa bisa ng 3 sets. Samantala, winalis ng Blue Eagles ang Green Spikers, 25-20, 25-19, 27-25 upang makatuntong ng win column sa UAAP Men’s volleyball.

Nagtala ng 18 attacks at 2 blocks si Chumason Njigha habang nagtala ng 13 at 12 puntos sina Michael Aguilar at Ron Medalla ayon sa pagkakasunod upang pamunuan ang Ateneo sa pagbawi mula sa naunang kabiguan sa kamay ng UP sa una nilang laro.

Nag-iisa namang tumapos na may double digit sa debut game ng La Salle si John Ronquillo na may 11 puntos. Sa naunang women’s match, tinalo ng University of the Philippines ang University of the East, 25-23, 25-20, 18-25, 25-17 sa pamumuno nina Tits Carlos at Isa Molde.

GAB, ready sa bagong layunin para sa boxers

Iginiit ni Games and Amusement Board Chairman Abraham ‘Baham’ Mitra na maganda ang layunin ng Senate Bill No. 193 at Senate Bill No. 805, para sa pagpapatatag ng Philippine Boxing Commission, ngunit, ang gawain at responsibilidad na nakaatang dito ay siya nang ginagawa ng GAB sa mahabang panahon.

Aniya, sa kabila ng maliit na budget, naisakatuparan ng GAB ang mga reporma sa ahensiya tulad ng libreng medical at dental examination hindi lamang sa mga boxers at combat sports athletes, bagkus sa lahat ng atletang professional.

“While we laud the initiative, feeling namin nagagawa na namin ang mga gustong gawin at ang mga gusto pang ipagawa sa amin, maaari naman naming gawin basta maalalayan lang po kami nang konti,” pahayag ni Mitra.

Kinatigan ang bill ng Association of Philippine Professional Boxing Ring Officials, gayundin ng samahan ng mga boxing matchmakers at promoters.

Una nang sinuportahan ni Sen. Bong Go ang mga atletang Pinoy. Suportado niya ang mga hakbang at programa para sa kapakanan ng mga professional boxers at combat sports, higit ang atletang Pinoy.

“I express my full support for the objectives of Senate Bill No. 193 and Senate Bill No. 805... These bills not only aim to strengthen and develop the quality of professional boxing and combat sports in the country but also ensure the protection and welfare of its athletes,” pahayag ni Go nitong Miyerkules sa pagdinig sa panukalang batas na magpapatatag sa Philippine Boxing Commission.

“The achievement of the objectives under the proposed Senate Bills can be a step in the right direction. This will not only provide a big boost to Philippine boxing and other combat sports; it will also secure the country’s rightful place as a serious contender in the sporting world,” pahayag ni Go.

“Napakahirap talaga. Muntik na akong madisgrasya bago ko narating ito ngayon. Maraming mga kailangang gawin at hakbang para sa ating mga atleta, especially ‘yung mga SSS, Phil Health, medical requirements before the fight or regularly,” ayon kay Senador Manny Pacquiao.

Parondo, naka-2 trono na sa Thailand chess

Humugot ng armas si Rolly Parondo ng Pilipinas sa angking husay sa paspasang ahedres upang makasulong sa dalawang magkaibang trono sa Thailand kamakailan.

Sa Red Knight Chess FIDE Rated Blitz Tournament sa kahabaan ng Sukhumvit, kumamada si Parondo, may ELO rating na 2214, ng pitong panalo, isang tabla at isang talo tungo sa kabuuang produksiyong 7.5 puntos.

Sa tiebreaker naselyuhan ng Pinoy ang unang puwesto kontra sa sumegundang si FIDE Master Riste Menkinoski ng Macedonia na nakapagsubi rin ng 7.5 puntos. Nasaksihan naman ang isang 1-3 wind-up para sa Pilipinas matapos na pumangatlo si Loreshyl Cuizon dahil sa natipon niyang limang puntos.

Halos wala namang dungis ang rekord ni Parondo sa Double Bishop FIDE Rated Blitz Tournament sa Bangkok nang magsuko ito ng 8.5 puntos mula sa siyam sabak sa chess board. Bukod sa hatian ng puntos na nairehistro kontra sa kababayang si FM Diony Habla noong round 4, lahat ng mga laban ng kampeon ay nauwi sa tagumpay sa torneong nilahukan ng mga kinatawan ng Sweden, Japan, Pilipinas at punong-abalang Thailand.

Samantala, itinanghal na kampeon si Sarri Subahani (rating: 2004) sa katatapos na Panitikan sa Chess 2020 Open Division sa UP Diliman, Quezon City. Anim at kalahating puntos ang naipon niya at ito ay isang buong puntos ang agwat sa pumangalawang si Lemmuel Jay Adena (rating: 1964). Ang paslit na chess wizzard na si Al Basher Buto (rating: 1923) ay pumangatlo (3.0 puntos).