Pacman-Garcia Fight bahagyang may linaw na​

Bahagyang nagkakaroon na ng linaw ang posibilidad na tapatan nina World Boxing Association (WBA) welterweight champion Manny “Pacman” Pacquiao at dating four-division titlist Mikey Garcia na maaaring ganapin sa Saudi Arabia.

Ayon sa report na inilabas ng isang website, sinasabing gaganapin ang bakbakan ng eight-division World champion at American-Mexican challenger sa 62,345-seating capacity na King Abdullah Sports City sa Jeddah, Saudi Arabia sa Hulyo 11.

Inihayag sa naturang report na sinabi ni MP Promotions president at international matchmaker Sean Gibbons na itinutulak ang negosasyon sa pagitan ni Matchroom Sports managing director Eddie Hearn.

“At this moment, the Senator is in discussions with the Kingdom and is hopeful for a bout to push through,” pahayag ni Gibbons sa naturang report. “The bus is moving slowly along, trying to navigate things. The Senator himself and MP Promotions are handling things with our promotional partner TGB.”

Matatandaang isa si Garcia sa mga tinukoy na maaaring maging sunod na kalaban ng Eight-Division World champion ngayong taon.

Nito lamang nakalipas na buwan ay matagumpay na nagwagi si Garcia laban kay Jesse Vargas sa isang unanimous decision sa Ford Center sa Star sa Frisco, Texas, upang maipakita ang karapatan nitong makaharap ang Fighting Senator.

Bago pa man magwagi si Garcia kay Vargas ay nauna muna itong mabigo laban kay International Boxing Federation (IBF) at World Boxing Council (WBC) welterweight titlist Errol Spence Jr. noong Marso ng nakaraang taon na nagtapos sa unanimous decision win kay Spence.

Desidido ang 32-year-old na Oxnard, California native na maisama sa kanyang listahan ang pambansang kamao.

Dating hinawakan ni Garcia ang mga titulo sa World Boxing Organization (WBO) Featherweight, Super-Featherweight, World Boxing Council (WBC) at International Boxing Federation (IBF) lightweight at superlightweight titles.

Huling lumaban ang Filipino fighting Senator noong Hulyo ng nakaraang taon laban kay Keith Thurman para sa WBA 147-lbs title kung saan nagtapos ito sa split decision na pabor sa 41-anyos na Filipino boxer.

Children’s Games, abangan sa Limasawa Island, Leyte

Isasagawa na ng Philippine Sports Commission (PSC) ang paglulunsad ng Children’s Games sa island-municipality ng Limasawa sa probinsiya ng Southern Leyte sa Marso 28-29.

Lalahukan ng may 500 kabataan sa anim na barangay sa Limasawa at malapit na munisipalidad na sasabak sa ilang mga palaro na kinabibilangan ng beach games, triangular at sprint swimming at modern pentathlon.

Minsan nang naunsyami ang naturang palaro na inorganisa ng ahensya ng pampalakasan bilang parte ng selebrasyon ng ika-499th anibersaryo ng unang Misa sa Pilipinas, dahil sa kasagsagan ng paglaganap ng coronavirus disease (COVID-19). “We are thankful for the go signal given by the regional offices of the Department of Health and Department of Interior and Local Government to proceed with the games,” pahayag ni PSC Commissioner Ramon Fernandez.

Magkakaroon din ng mga paligsahan gaya ng water sports tulad ng Kayak race para sa 18-under at sailing competitions para sa 16-under na gaganapin simula Marso 30-Abril 1. “We want to capitalize on bringing sports to the youth sector of the island, which makes up one-third of its total population,” saad ni Fernandez.

Isang pagpupulong ang gaganapin sa pagitan nina Commissioner Fernandez, Limasawa leader Melchor Petracorta at lahat ng local government officials sa Southern Leyte sa susunod na linggo para sa preparasyon ng week-long events. Nauna nang binisita ng UNESCO ang mga munisipal na baybayin at nagsagawa ng isang open-water swimming competition noong nakaraang taon.

Balwarteng laro para sa CBA Crown pipiliting angkinin ng Palayan City

Paglalaro sa sariling homecourt ang pinakamalaking bentahe ng Palayan City laban sa defending champion San Juan kung saan ang Game 2 ng Community Basketball Association Pilipinas Cup best-of-three title showdown ay idaraos sa Gapan, Nueva Ecija ngayong Linggo, Marso 8.

Inaasahan ni Palayan City team manager Ryan Ripalda na ang buong team mula sa players hanggang coaching staff ay gaganahan sa cheers ng fans upang maulit ang panalo kontra San Juan at masungkit ang national championship at ang P1-million cash prize.

Naniniwala si dating player Ripalda na taglay ng Capitals ang katangian para sa championship game ngayong Linggo sa Gapan City gymnasium. “We’ll do our best to win again (in Game 2 on Sunday) and capture the championship infront of our home fans,” ayon kay Ripalda sa 58th “Usapang Sports” ng Tabloids Organization in Philippine Sports (TOPS) sa National Press Club sa Intramuros noong Huwebes. “Abot-kamay na namin ito, kaya gagawin na namin ang lahat na aming makakaya para manalo,” dagdag ni Ripalda sa weekly public service program ng Philippine Sports Commission, National Press Club, PAGCOR at CBA. Unang tinalo ng Palayan City na suportado ng Palayan City head Adrienne Mae Cuevas at team owner Bong Cuevas ang San Juan, 79-74 sa San Juan gym noong nakaraang weekend.

Nakontrol ng Alvin Grey-mentored Capitals ang tempo ng game at nakalamang agad sa 14 points bago pinasuko ang Knights. Ang monster block ni Arvin Gamboa at high points ni Deniel Aguirre ang nag-angat sa Palayan City para sa panalo. Muling pangungunahan nina Renz Alcoriza, Levi Dela Cruz, Gab Reyes, Marvin Maroga at Aguirre ang pagtutok sa pagkuha ng Capital ng korona.