Belangel, bumida sa Ateneo, champ sa NCC

Gumana ang laro ni SJ Belangel kung kailan ito pinaka-kailangan at binuhat niya ang Ateneo de Manila University sa matagumpay na depensa ng kanilang National Collegiate Championship laban sa San Beda University, 57-46, sa FilOil Flying V Centre Linggo ng hapon. Walang puntos si Belangel sa unang tatlong quarter subalit pumutok siya sa lahat ng kanyang 10 puntos sa huling quarter para patahimikin ang Red Lions at manatili ang tropeo sa kanilang kamay.

Huling nakalamang ang San Beda matapos ang isang free throw ni Kenmark Cariño na may 4:46 na nalalabi, 46-45, subalit iyan na ang naging huling ingay nila. Nagsanib-puwersa si Belangel at Ange Kouame para sa 10 sunud-sunod na puntos upang bigyan ng 55-46 na lamang ang Blue Eagles papasok ng huling dalawang minuto at tinuldukan ni William Navarro ang kampeonato sa isa pang buslo na may 17 segundo pa sa orasan.

Kahit nablangko noong 3rd quarter, namuno pa rin si Kouame sa tagumpay na may 17 puntos at 17 rebound.

Habang hindi pa umiinit si Belangel, nag-ambag ang reserbang si Troy Mallillin ng 11 puntos sa unang tatlong quarter.

Hinirang si Belangel bilang Most Valuable Player habang si Coach Tab Baldwin ang Coach of the Year.

Sinamahan si Belangel sa Mythical Five nina Oftana, Penuela, Kouame at Lassina Coulibaly ng University of the Visayas.

Cantela at Casiguran, nangibabaw sa Pace Chess

Nagpahayag ng intensiyong maging mga makikinang na bituin ng ahedres sa hinaharap ang mga paslit na sina Oscar Joseph Cantela at Phil Martin Casiguran matapos silang mangibabaw sa kani-kanyang grupo nang magsara ang 2020 PACE Kiddies Chess Championships Leg 1 sa Project 6, Quezon City.

Kumartada si Cantela ng anim na puntos mula sa 7 rounds ng bakbakan para sa kampeonato ng Under 13 na dibisyon sa torneong isinaayos ng Philippine Academy for Chess Excellence.

Napabilang sa mga nabiktima niya sina Dranreb Dionisio (round 1), Gladimir Chester Romero (round 2), Lee Gabriel Cipres (round 4), Alysah Buto (round 5), Julie Gelua Jr. (round 6) at Antonella Berthe Racasa noong huling yugto.

Ang solong mantsa sa rekord ng kampeon ay nang magwagi si Karylcris Clarito Jr. sa kanya noong pangatlong round. Makinang din ang 10-anyos na si Al-Bashir Buto (5.5 puntos) dahil sa pagsampa niya sa pangalawang puwesto nang lapatan ng tuntunin sa tiebreak samantalang pumangatlo si Clarito (5.5 puntos).

Sa pangkat ng Under 9, perpekto ang paligsahan para kay Casiguran nang mangolekta siya ng limang puntos mula sa limang laban sa board.

Isang buong puntos sa likod ng tournament topnotcher ay si Mar Aviel Carredo na nakuntento sa pagiging malayong segunda (apat na panalo at isang talo) habang nasa pangatlong baytang si topseed Gilasea Ann Hilario (rating: 1081) dahil sa kartada na tatlong puntos (tatlong panalo at dalawang talo).

Mga next Fun Runs sa Metro, apektado ng coronavirus

Hindi muna ginanap ang inaabangang unang yugto ng Trilogy Run Asia 2020 ng Runrio Events na dapat sana ay noong Marso 8 sa SM Mall of Asia. Ayon sa pamunuan ng karera, nagpasya sila na ipaliban muna ito dahil sa mga kumpirmadong bagong kaso ng coronavirus disease sa Pilipinas.

Ang Trilogy Run Asia ay ang taunang serye ng tatlong karera na may distansyang 21, 32 at 42.195 kilometro. Ihahayag agad ng Runrio ang bagong petsa ng patakbo. Malalaman din kung apektado ang petsa ng ikalawa at ikatlong yugto. Ang 32-k Afroman Race ay dapat sa Hunyo 14 habang ang Philippine Marathon ay sa Setyembre 13.

Isa sana sa mga sasali sa Trilogy Run ay si 30th Southeast Asian Games Marathon Gold Medalist Christine Hallasgo. Sa isang panayam sa BULGAR, inihayag ni Hallasgo ang kanyang panghihinayang subalit itutuloy pa rin niya ang kanyang ensayo.

Si Hallasgo ay isa sa mga napipisil na bigyan ng pagkakataon na lumahok sa 2020 Tokyo Olympics sa pamamagitan ng universality kung walang Pinay na makapasok. Pasok na si EJ Obiena ng Pole Vault kaya wala nang universality para sa mga kalalakihan.

Hindi ito ang unang beses na may nadamay na karera ang Runrio dahil sa coronavirus disease. Ang taunang PSE Bull Run na dapat ay sa Marso 22 sa McKinley West sa Taguig City ay nalipat sa Mayo 24 sa parehong lugar.

Itong linggo rin, inihayag ang pagliban ng National Geographic Earth Day Run na dapat ay sa Abril 19 sa SM MOA. Pipili sila ng bagong petsa sa darating na Setyembre.

Maliban sa mga nabanggit na fun run, ang Runrio ang mangangasiwa sa parating na National MILO Marathon sa taong ito. Magsisimula ang mga serye ng patakbo sa lahat ng sulok ng kapuluan sa Hulyo.