Bordeos ng Bicycology, babawi sa next year Cycling Race

Bawat riders ay naghahangad ng tagumpay, ngunit manalo man o matalo, bilang isang buong koponan, isang malaking karangalan ang nakamit ng Bicycology Shop-Philippine Army sa katatapos na LBC Ronda Pilipinas.

“We don’t race for ourselves, we race as a team. While we toast individual feats and are proud of lap honors won, it is the collective effort that truly defined the maturity and worth of the Bicycology Shop-Philippine Army,” pahayag ni team manager Eric Buhain, isang bemedalled swimmer sa kanyang henerasyon at tanging atleta na nagsilbing Chairman ng Philippine Sports Commission (PSC) at Games And Amusement Board (GAB).

Nakopo ng Bicycology Shop-Philippine Army ang 3rd place sa team classification, dalawang taon matapos sopresahin ang mga karibal sa impresibong second runner-up finish sa kanilang debut noong 2018. “Third place, that’s not bad at all. This year’s field is tougher than before, I’ve seen some really well-prepared teams and truly talented riders. For Bicycology Shop-Philippine Army to still hold its ground against such tall order is already proof that we’re still on it, and soon get that big victory,” aniya. Pumuwesto si Pfc. Marvin Tapic sa Top 10 sa individual classification, kasunod ang kasangga na si Jester Mendoza sa No.11.

Tumapos si Mark Bordeos, Stage 1 winner, sa No. 14 kasunod sina Pfc. Cris Joven sa No.15 at Dominic Perez sa No.16. Sa 10-stage, 11 days cycling marathon, maagang humirit ang Bicycology Shop-PA nang makopo ng 27-anyos na si Bordeos ang Stage 1 sa Sorsogon tungo sa kanyang pangunguna suot ang ‘red jersey’ sa dalawang pagkakataon.

Kasangga ni Buhain ang mga miyembro at opisyal ng Philippine Army na sina LTC Dexter A. Macasaet, QMS ( GSC) PA - Director SSC, IMCOM (P), MGen. Tyne T. Bañas, AFP - Cmdr, IMCOM (P), PA at Lt. Gen Gilbert I. Gapay AFP-CG, PA. Balik sa pagsasanay ang Bicycology Shop-Philippine Army upang makapaghanda nang husto bago simulan ang kampanya para sa susunod na edisyon ng cycling marathon. “We will be better prepared than before, well trained and more motivated. And our motto remains — we ride, or die trying, as one,” pahayag ni Buhain.

CEU, nakadepensa, UA&P sa Hip-Hop, PWU sa Futsal ng MNCAA

Sinimulan ng Centro Escolar University ang depensa ng kanilang korona sa 16th Men’s National Collegiate Athletic Association (MNCAA) Basketball matapos talunin ang University of Asia and the Pacific, 114-42, noong Linggo sa San Beda College-Alabang.

Hindi nagpahuli ang San Beda-Alabang at ginulat ang Philippine Women’s University sa sumunod na laban, 87-84.

Sinikap ng Scorpions na tapusin ng maaga ang laro at lumamang agad pagkatapos ng unang quarter, 33-7.

Sa huli, anim na Scorpion ang nagtala ng 10 o higit pang puntos sa pangunguna ni Christian Malicana na may 18 at sinundan nina Angelo Escalona na may 17 at Bling Murillo na may 16.

Samantala, wagi rin ang CEU sa Volleyball kontra sa UA&P, 25-10, 25-17 at 25-14. Kinailangan ng San Beda ang apat na sets bago tapusin ang PWU, 21-25, 25-18, 25-17 at 25-19. Pormal na nagbukas ang MNCAA noong Sabado sa UA&P sa Pasig.

Kasama sa palabas ang HipHop Dance Competition kung saan kampeon ang UA&P Squadra Dance Varsity habang pangalawa ang CEU Street Squad at pangatlo ang San Beda-Alabang.

Pagkatapos ng sayawan ay sinimulan ang palaro sa Futsal. Wagi ang PWU sa San Beda-Alabang, 7-2, habang tagumpay ang UA&P sa CEU, 4-1.

Marcial, ikatlong pinoy sa Olympics, Mongolia, dinale

Nakamit ni 2019 World Amateur boxing championship silver medalist Eumir Felix Marcial ang ticket patungong 2020 Tokyo Olympics matapos ipatigil ng referee ang laban sa 3rd round dulot ng na-grogeng kalaban sa quarterfinal round ng Asia-Oceania Boxing Qualification Tournament sa Prince Hamzah Sports Hall sa Amman, Jordan.

Sumandal ang 24-anyos na tubong Lunzuran, Zamboanga City sa pananalig na mapatamaan ng solido ang kalabang si Byamba-Erdene Otgonbaatar ng Mongolia upang maibigay ang panalo sa kanya dulot ng Referee Stops Contest (RSC) sa ikatlong round.

Ang 30th SEAG champion ang naging ikatlong Filipino na nakapasok sa Summer Games kasunod nina Pole Vaulter Ernest “EJ” Obiena at Gymnast Edriel “Caloy” Yulo na gaganapin naman simula Hulyo 24-Agosto 9 sa Tokyo, Japan.

Naging pursigido ang 2011 AIBA Youth World boxing champion na bumitaw ng mga suntok sa iba’t ibang bahagi ng katawan ng 23-anyos na Mongolian boxer, ngunit pinayuhan ito ni coach Ronald Chavez na maghinay-hinay ng bahagya upang maiwasang bumalik ang dating injury nito.

“Simple lang naman ang instruction ko kay Eumir, na huwag masyado ibuhos ang lakas baka bumalik iyong injury niya,” paliwanag ni Chavez sa panayam ng BULGAR sa social media. “Pero sabi ko sa kanya puro diretsong suntok lang pero kung hindi maiwasan, paminsan-minsan gamitin niya kung kinakailangan,” dagdag ng 50-anyos na retired boxer na sumabak sa 1992 Barcelona Olympics sa lightweight division kung saan umabot siya sa quarterfinals.

Nadomina ng maaga ni Marcial ang unang round nang makuha nito ang 5-0 iskor kasunod ng mga kaliwang suntok na koneksyon habang hindi magawang makabawi ni Otgonbaatar. Halos pareho rin ang ipinakita ni Marcial sa second round sa kanyang magagandang left-right combination upang makuha ang 4-1 marka.

“Four years I didn’t qualified, because all of this I dedicate to my father. I trained hard for this to qualify and because I want him [father] to see me play at the Olympics,” wika ni Marcial sa olympicchannel.com, na lumuluha sa galak na makuha ang ticket sa Olympiada.

“I want to win a gold medal in the Olympics,” sambit nito. “I will do my best in four months to train hard and dedicate every game to my father and to my country,” dagdag nito.