PBA, D-League, 3x3 at out-of-town, cancelled

Unahin ang kapakanan at kaligtasan ng nakararami ang pangunahing layunin ng pamunuan ng Philippine Basketball Association (PBA), kung kaya naman minarapat na lamang nila na kanselahin muna ang mga laro, sanhi ng kumakalat na coronavirus sa bansa.

Mismong si PBA Commissioner Willie Marcial at ang buong PBA Board ang nagdesisyon na kanselahin muna ang laro, sa pamamagitan ng isang emergency meeting na kanilang isinagawa noong Martes ng gabi.

Dahil dito, ang mga dapat sanang laro sa pagitan ng NorthPort at NLEX gayundin ang TnT KaTropa at Phoenix NA na nakatakda kagabi sa Smart Araneta Coliseum ay hindi muna itinuloy upang maiwasan ang panganib sanhi ng kasalukuyang sitwasyon sa bansa.

Ngunit, hindi lamang ang mga laro sa PBA ang kanilang kinakansela sa puntong ito kundi pati na rin ang mga laro sa PBA D-League, at sa PBA 3x3 tournament. Hindi na rin itinuloy ng nasabing premyadong liga ang out-of-town game ng PBA sa pagitan ng Barangay Ginebra at Blackwater na nakatakda sanang gawin ngayong Sabado sa Balanga, Bataan.

Gayunman, ay maya’t mayang aantabayanan ng pamunuan ng PBA ang sitwasyon upang malaman kung ano ang ligtas at hindi ligtas sa puntong ito sanhi ng naturang virus. Samantala, sumang-ayon din ang Tabloids Organization in Philippine Sports (TOPS), sa panawagan ni Pangulong Rodrigo Duterte na ikansela ang 59th “Usapang Sports” ngayon sa National Press Club sa Intramuros, Manila.

Napagkasunduan ng TOPS at ni PBA Commissioner Willie Marcial na iliban ang nakatakdang usapin. Siniguro ni Marcial sa TOPS members at sa sports fans, na siya’y bibisita sa weekly public service program kapag natapos na ang laban ng bansa kontra COVID-19.

FIFA Qualifying Games ng PHL Azkals, kinansela

Maghihintay muna bago magsimula muli ang kampanya ng Philippine Azkals para makapasok sa 2022 FIFA World Cup Qatar at 2023 AFC Asian Cup sa Tsina matapos iutos ng FIFA ang pansamantalang pagliban ng lahat ng mga qualifier ngayong Marso at Hunyo sa gitna ng banta ng coronavirus. Ihahayag agad ng FIFA ang mga bagong petsa ng mga ito oras na bumuti ang sitwasyon.

Apektado ang mga parating na laro ng Azkals kontra Guam (Marso 26), Tsina (Hunyo 4) at Maldives (Hunyo 9) sa Grupo A. Kasalukuyang tabla ang Pilipinas at Tsina para sa pangalawang puwesto na parehong may 7 puntos sa likod ng walang talong Syria na may 15 puntos sa limang laban.

Kahit may utos, nag-iwan ng puwang na matuloy ang mga laro sa takdang araw kung magkakasundo ang dalawang bansa at bibigyan ito ng basbas ng FIFA at AFC. Mahalaga na alagaan ang kalusugan at seguridad ng lahat ng kasaling atleta at manonood.

Maaaring malipat ang mga laro sa susunod na FIFA International Window sa Setyembre 1 hanggang 8 kung saan obligado ang mga koponan na payagan palaruin sa pambansang koponan ang kanilang mga manlalaro. May parehong window rin mula Okt. 5 hanggang 13 at Nob. 9 hanggang 17.

Para hindi masayang ang paghahanda at manatiling matalas ang Azkals, naghahanap ang pamunuan ng koponan ng mga friendly match dito sa Pilipinas o sa ibang bansa ngayong buwan.

Ilan sa mga maaaring makalaro ng Azkals ay ang mga pambansang koponan ng Malaysia, Myanmar at Cambodia.

Huling naglaro ang Azkals noong Nob. 19, 2019 kung saan natalo sila sa Syria, 0-1, sa Dubai, United Arab Emirates. Kailangang magtapos ang Pilipinas sa unang dalawang puwesto sa Grupo A upang matuloy ang kanilang lakbay patungong World Cup.

Paalam at Magno, box offs; Marcial, haharap sa semis

‘Last Filipino Standing’ si Tokyo Olympics-bound at 2019 World Amateur boxing silver medalist Eumir Felix Marcial sa pagharap nito sa semifinal match ng Asia-Oceania Boxing Qualification Tournament sa Prince Hamzah Sports Hall sa Amman, Jordan.

Nag-iisa na lang ang 24-anyos na tubong Lunzuran, Zamboanga City na lalaban na Pinoy boxer sa semis matapos malaglag ang apat pang pambato ng National Team. Kakaharapin ni 30th SEAG champion sa semifinal round si Ashish Kumar ng India. Sakaling manaig si Marcial sa semis ay kakalabanin niya ang magwawagi kina 2018 Jakarta-Palembang Asian Games silver medalists Abilkhan Amankul ng Kazakhstan at Tanglatihan Tuoheta Erbieke ng China sa championship round.

Naging masaklap ang resulta para sa pambansang koponan nang mahulog sa quarterfinal bout si World women’s champion Nesthy Petecio sa karibal nitong si Sena Irie ng Japan via 1-4, split decision sa under-57kgs Featherweight class.

Naging matagumpay agad sa unang round ang Japanese boxer matapos makuha ang 3-2 lead dahil sa estilong orthodox na tila nagpahirap at nangapa si biennial meet champion. Muli pa ring ipinamalas ng 19-anyos na si Irie ang counter-punching para pahirapan si Petecio. Sa kasawiang-palad ay nabawasan pa ng puntos ang world champion dahil sa sobrang paghawak kung kaya’t napuntang muli ang puntos kay Irie sa 2-3. “Sorry po talo ako. Isang push na lang sana. Kung nasaktan po kayo at nanghihinayang isipin n’yo po ‘yung nararamdaman ko ngayon at iyong panghihinayang. Higit pa sa break up, niliko,” pahayag ni Petecio sa kanyang post sa social media.

Bigo rin ang dalawa pang female boxers na sina Flyweight Irish Magno at Lightweight Riza Pasuit nang matalo kina six-time flyweight world champion at 2012 London Olympics bronze medalist na si “The Magnificent Mary” Mery Kom Hmangte ng India at Wu Sheh Yi ng Chinese Taipei. Naging kontrobersyal naman ang laban ni SEAG light-flyweight gold medalist Carlo Paalam nang matalo sa 1-4 split decision kay 2019 Yekaterinburg World Championships silver medalist Amit Panghal ng India.

Marami ang hindi pumabor sa laro ng Indian boxer sa huling round dahil higit na pursigido si Paalam sa huling round, ngunit nakuha pa rin nito ang boto ng mga hurado sa 1-4 split decision.

Wala man sa semis si Paalam ay lalaban pa rin ito sa Box-Off laban kay Saken Bibossinov ng Kazakhstan na natalo kay Hu Junguan ng China via 0-5. Anim na boksingero ang mabibigyan ng tsansa para sa Asia-Oceania para sa Olympics.