Biado at Aranas, hindi kumukurap sa Diamond Open

Pinangunahan nina Carlo “Black Tiger” Biado at Zorren James “Dodong Diamond” Aranas ang atake ng mga manunumbok na Pinoy sa malupit na 2020 Diamond Las Vegas Open sa Rio Hotel Casino ng Las Vegas, Nevada kahapon.

Suot ang tikas na minsan nang nagbigay sa kanya ng korona ng World 9-Ball Championships at ng World Games, hindi kumurap si Biado sa maigting na bakbakan nila ng Amerikanong si Skyler Woodward, 7-6, upang makausad sa susunod na yugto kontra kay Michael Yednak.

Dala ni Aranas ang init ng kanyang pagkakapanalo kamakailan sa Scotty Townsend Memorial 9-Ball Division nang manaig siya kontra kay Rory Hendrickson sa iskor na 7-5. Susunod niyang haharapin ang alas ng Great Britain na si Chris Melling.

Gitgitan din ang naging girian nina Alex “The Lion” Pagulayan at Roland Garcia bago umangat ang tubong Isabela ngunit ngayon ay naglalaro na para sa Canada na si Pagulayan, 7-6. Si Gus Brisein ang susunod niyang makasasagupa.

Magaan ang tagumpay na nairehistro ni Edgie Geronimo laban kay Sharik Sayed ng Singapore, 7-3, kaya nakapuwesto na ang Pinoy tungo sa pakikipagtagisan ng galing sa isa pang Singaporean (Aloysius Yap).

Kasalukuyan pang humahataw ang ibang mga Pinoy tulad nina Dennis “Robocop” Orcullo, Jeffrey De Luna at Warren Kiamco habang nasipa sa one-loss bracket ang billiards legend ng Tarlac na si Francisco “Django” Bustamante matapos siyang napayuko ni Shane Van Boening (3-7).

Bawal ang mga tao sa PSC Facilities, no travel sa atleta

Bunga ng deklarasyon ng World Health Organization (WHO) hinggil sa sitwasyon ng COVID-19 na ngayon ay world pandemic na, naglabas ang Philippine Sports Commission ng mga direktiba, lalo na sa dalawang pangunahing pasilidad — ang Rizal Memorial Sports Complex (Manila) at ang Philsports Complex (Pasig) na pawang mga “restricted access” na upang matiyak ang kaligtasan ng national athletes, mga empleyado at publiko.

“We have to be pro-active in this situation and take these hard decisions for the safety of our athletes and employees,” paliwanag ni PSC Chairman William Ramirez sa harap ng Management Committee ng ahensiya kahapon ng umaga. Ang pagtaas ng pagkakahawahan ng virus ay naging mabilis kung kaya naging pandemic na sa ilang araw lamang.

Maliban sa mga naghahanda para sa qualifying competitions sa Olympics, lahat ng national athletes at miyembro ng junior team ay hinihiling na manatili na lamang sa tahanan at bakantehin ang mga dormitoryo bilang bahagi ng prevention plan ng ahensiya. “Only those who get an endorsement to proceed from Olympics Chef de Mission Nonong Araneta will be allowed to travel overseas,” ani Ramirez sa National Sports Associations.

Ang mga atletang magbabalik sa bansa mula sa kumpetisyon ay tatanggapin sa airport ng PSC personnel o susunduin ng bus o isasakay sa lantsa para ihatid sa kani-kanilang tahanan.

Isasailalim sila sa 14-day “preventive rest and monitoring” sa RMSC North Tower sa ilalim ng obserbasyon ng medical team ng ahensiya.

Suspendido rin ang foreign travel para sa mga atleta, coaches, officials at empleyado upang maiwasang mahawahan ng sakit. “This shall be in effect for a month, from March 14 to April 14,” ayon sa advisory na nilagdaan ni PSC Officer-in-Charge Commissioner Celia Kiram.

Ang parehong advisory ay epektibo rin sa bookings at reservations sa paggamit ng pasilidad, hindi papayagan at kanselado. Maging ang mga anunsiyo sa PSC projects, programs at events, kahit ang sponsored at organized game ng NSAs o LGUs ay indefinitely postponed.

Magno, unang Pinay sa Olympics, Marcial, gold!

Sumuntok ng gold medal si 2019 World Amateur silver medalist Eumir Felix Marcial, habang umukit ng kasaysayan si Pinay pug Irish Magno nang maging kauna-unahang babae na makapasok sa 2020 Tokyo Olympics sa pagtatapos ng Asia-Oceania Boxing Qualification Tournament sa Prince Hamzah Sports Hall sa Amman, Jordan.

Naungusan ng 24-anyos na tubong Lunzuran, Zamboanga City ang pambato ng Kazakhstan na si Abilikham Amankul sa pamamagitan ng 3-2 split decision para sa men’s under-75kgs category title, upang magsilbing bonus kasunod ng pagkuha nito ng ticket para sa Summer Games na gaganapin simula Hulyo 24-Agosto 9 sa Tokyo, Japan.

Kasabay ng panalo ni Marcial ay nagawa ring mailista ni Magno ang pangalan para sa 2020 Tokyo Games matapos manaig laban kay Sumaiya Qosimova ng Tajikistan via unanimous decision sa women’s under-51kgs flyweight division box-off.

Mapapasama ang 30th Southeast Asian Games medalist bilang ikaapat na atleta ng bansa na nakapasok sa Summer Games kasunod nina Pole Vaulter Ernest “EJ” Obiena at Gymnast Edriel “Caloy” Yulo.

Ilang kumbinasyong kaliwa’t kanan ang ipinukol ni Magno para pangunahan ang 1st round sa 5-0, habang hindi na hinayaan pa nito na makasabay ang Tajikistan lady boxer sa kanya at tapusin ang laban ng may dominasyon.

“Sobrang happy po, thankful and blessed po ako sa pagkapanalo ko po,” wika ni Magno sa panayam ng BULGAR sa social media. “Sabi po sa akin ng coaches ko na laruin ko lang po iyong laro ko at every round kung ano po iyong sinasabi ni coach (Reynaldo) Galido sa corner, iyon po iyong ginagawa ko,” dagdag ni Magno.

Ipinakita ng biennial meet champion na si Marcial ang kanyang lakas at bilis upang higitan ang Kazakh boxer sa simula pa lang ng unang round kung saan inilabas nito ang malalakas na kanan at diretsong suntok. Nanatiling nanlaban si Amankul kay Marcial nang magpamalas din ito ng kanyang opensa, ngunit tila mas matindi ang pagnanasa ni Marcial na magwagi sa laban kung kaya’t ibinigay ng mga hurado ang panalo rito na naglunsad sa kanya bilang kampeon ng middleweight. “So very happy, despite my struggle, my trials, nothing is impossible to God. My team mates, my coaches, they know what my struggles and my trials, but I get my Gold medals so thank you much,” wika ni Marcial sa panayam sa kanya matapos ang laban.