P10-M susuwelduhin ni Kai Sotto sa NBA G League

Tinatayang aabot sa $200,000 o P10 milyon ang susuwelduhin ni Kai Sotto sa kanyang paglalaro sa NBA G League. Ito ay ayon sa ulat ng 247 Sports matapos magdesisyon si Sotto na maging parte ng NBA G League Select program.

Ayon pa sa ulat, ang suweldo ay para sa apat na buwang paglalaro ni Sotto sa 2020-2021 season ng NBA G League. Maglalaro si Sotto kasama ang Fil-Am na si Jalen Green sa Select squad ng liga kung saan mga manlalaro mula sa high school ang parte ng koponan.

Si Sotto ang unang international player na kasama sa Select team ng G League.

Hindi nagbigay ng pahayag si NBA G League president Shareef Abdur-Rahim patungkol sa suweldo ni Sotto ngunit kinagalak niya ang desisyon ni Sotto na maglaro sa liga imbea na sa US NCAA o sa Europa.

“I know he’s kinda been a part of the NBA family coming out through the Jr. NBA and Basketball Without Borders and coaching there in the Philippines. We are happy to continue to be part of this journey,” wika ni Abdur-Rahim.

Matapos niyang maglaro para sa Ateneo Blue Eaglets sa UAAP juniors ay nagtungo na si Sotto sa Amerika upang mag-training sa The Skill Factory na matatagpuan sa Atlanta. Isa sa mga nag-training sa kanya ang dating NBA player na si Chuck Person.

Ayon kay Abdur-Rahim, mas magiging handa si Sotto na maglaro sa NBA dahil sa training na kanyang makukuha sa pagsali sa NBA G League select program. Kasama ni Sotto at Green sina Isaiah Todd at Daishen Nix na pawang mga galing din sa high school.

“We want to see NBA-level talent. We want a player that we are projecting and expect to go forward on their way to the NBA. There are a lot of talented players around the world but not all of them would fit in this program because, at times, they may not be ready for the commitment of preparing for the NBA. We want to make sure that to identify players that are tracking towards the NBA and having the right attitude. And I think Kai fits all of those areas. He comes to us really on his way to do great things. We are happy to be part and continue to be part of the process,” ani Abdur-Rahim.

Plano pa ng NBA G League na kumuha ng mga international players sa Select program ng liga.

“We always have a plan to have our program to improve international players. We are excited to welcome Kai knowing how big basketball is in the Philippines. We hope Kai is an inspiration to younger Filipino players that aspire to play in the NBA and aspire to be in the G League.”

Desisyon pa rin ng IATF at DOH ang masusunod sa sports activities

Nakabase sa desisyon ng Inter-Agency Task Force (IATF) at Department of Health (DOH) ang susunod na hakbang ng Philippine Sports Commission (PSC) hinggil sa pagbibigay ng senyales na ibalik ang lahat ng sports activities sa bansa.

Hindi umano gagawa ng anumang kilos ang pamunuan ng ahensya ng pampalakasan sa magiging kinabukasan ng mga Filipinong atleta matapos naunang iutos nito na ipatigil ang lahat ng kumpetisyon at aktibidades dulot ng pananalasa ng coronavirus disease (COVID-19) sa buong mundo.

“Without IATF, without DOH advising us, as head of the Philippine Sports Commission, I will not allow any activities for the athletes, or even going out,” pahayag ni PSC chairman William “Butch” Ramirez sa panayam ng ABS-CBN News. “I must have that authorization that everything is normal. You and I are aware that there is no longer the old normal. There will be a new normal in the coming days,” dagdag nito.

Opisyal ng nakansela ang mga taunang multi-sports event na Philippine National Games, Palarong Pambansa, Batang Pinoy at Asean Paragames, maging ang mga international events gaya ng prestihiyosong 2020 Tokyo Olympics ay iniurong. Tinitignang aabot ng hanggang Disyembre ang pagkansela sa mga sports events sa bansa, kung saan wala ring kasiguruhan ang mga collegiate league tulad ng UAAP at NCAA; at proffessional leagues na PBA at MPBL.

“Being under (the) Office of the President, as the head of the office, it was my position to cancel all activities,” saad ni Ramirez. “Without the authorization of the IATF and the DOH, I will not send any athletes for foreign engagement.”

Idinagdag rin Ramirez na gumagawa na ang mga ito ng mga bagong protocols para sa mga atleta at coaches kung paano pamahalaan ang kanilang aktibidades sa kasagsagan ng pandemya.

Russian Wrestling coach, iginupo ng COVID-19

Dalawang multi-titled coaches sa magkaibang larangan ng palakasan mula sa dalawang bansa ang pumanaw na kamakailan dahil sa pandemic.

Hindi na nakabangon si wrestling coach Magomed Aliomarov ng Russia matapos itong maitumba ng coronavirus sa edad na 67. Dalawang ginto, isang pilak at dalawang tansong medalya ang nakuha ng women's team ni Aliomarov noong 2019 World Wrestling Championships sa Nur-sultan, Kazakhstan. Isang 4-1-4 na medal tally naman ang naging rekord ng kanyang grupo noong 2020 European Wrestling Championships sa Rome.

Sa kabilang dako, ganito rin ang sinapit ni Jaques Reymond, isang dating ski coach ng Switzerland, nang pumanaw ito dahil rin sa COVID-19. Siya ay 69-taong-gulang. Limang gold medals naman ang naisukbit sa koponan ni Reymond noong 1987 World Alpine Skiing Championships sa Crans-Montana, Switzerland. Naging fitness coach din siya ni Erika Hess, ang dating two-time World Cup winner na kalaunan ay naging kabiyak niya. Naulila niya rin ang kanilang tatlong supling.

Bukod sa dalawa, kasama na sa listahan ng mga personalidad sa isports na nabiktima ng virus sina Teruyuki Okazaki, karate, Japan; modern pentathlete Robert Beck, USA; ang dating opisyal ng International Canoe Federation officer na si Marcel Venot (France), dating Japanese Olympic Committee offical (Matsushita Saburo, Japan), Antonio Melo, fencing, Venezuela; unang black boxing referee ng Olympics (Carmen Williamson, USA), Lukman Niode, swimming, Indonesia; at ang mga tracksters na sina Italian runners Donato Sabia at Francesco Perrone.