Mayweather, sinagot ang funeral services ni Floyd

Sasagutin ni Floyd Mayweather, Jr. ang pagpapalibing kay George Floyd, ayon sa kinatawan ni FMJ.

Isang black man si Floyd na nasawi noong nakaraang linggo sa Minneapolis matapos na malagutan nang hininga nang tuhurin siya sa leeg ng white policeman na si Derek Chauvin na sinibak noong Biyernes at kinasuhan na ng third-degree murder at second-degree manslaughter.

Ang pagkamatay ni Floyd ang naging sanhi ng malawakang protesta ng black people sa maraming panig ng Estados Unidos. “He’ll probably get mad at me for saying that, but yes, (Mayweather) is definitely paying for the funeral,” ayon kay Leonard Ellerbe, ang CEO ng Mayweather Promotions sa ESPN.

Idinagdag ni Ellerbe na ang dating five-division world champion ay nakipag-ugnayan na rin sa pamilya ni Floyd at tinanggap din ng pamilya ang alok na tulong.

“Floyd has done these kind of things over that last 20 years,” ani Ellerbe at idinagdag na hindi ibinibida ni FMJ ang kanyang ginagawang tulong sa mga nangangailangan.

Minsan na ring natulungan ni Mayweather ang mga gastusin sa burol at libing ni dating boxer Genaro Hernandez na pumanaw dahil sa cancer sa edad 45 noong 2011. Napagwagian ni Mayweather ang kauna-unahang world title nang talunin si Hernandez noong 1998.

Kapag wala pang bakuna, malakihang palaro, bawal pa

Umani ng papuri mula sa Olympic Council of Asia (OCA) ang programa ng Philippine Olympic Committee (POC) nang mamahagi ng bisikleta sa mga pambansang atleta bilang paghanda sa tinaguriang new normal. Ito ang masayang ibinalita ni POC President Rep. Abraham Tolentino sa Philippine Sportswriters Association Forum (PSA) na ginanap online sa internet noong Martes.

“Naglaan kami ng 100 bisikleta subalit 258 na atleta ang nagbigay ng aplikasyon para makakuha nito kaya baka dagdagan pa natin at maging 300 bisikleta,” wika ni Tolentino na presidente din ng PhilCycling. “Sasagutin ko rin mula sa aking personal na pondo ang mga helmet dahil hindi ito naisama sa una.”

Pagdating sa 2020 Tokyo Olympics, buhay pa rin ang pag-asa na makalahok ang bansa sa Cycling. Malakas ang tsansa ni Ariana Dormitorio na mabigyan ng wild card entry sa Women’s Mountain Bike habang bukas pa ang pinto para sa makakakuha ng puwesto ang BMX riders.

Bahagi ng paglahok sa Olympics ang mga qualifier sa ibang bansa kaya pabor si Tolentino na gawin ang rapid testing sa mga aalis na atleta. Handa na rin sila sa posibilidad na hanapan ang mga ito ng sertipikong medikal at daraan sa quarantine oras na lumapag sila sa patutunguhan.

Kasama ang Cycling sa mga disiplina na pinayagan ng Inter-Agency Task Force sa ilalim ng General Community Quarantine (GCQ). Subalit naniniwala siya na hanggang wala pang bakuna ay hindi pa panahon para sa mga malakihang palaro at mahirap ang magsisihan.

Inihayag din ang plano ng Pilipinas na maging punong abala sa mga malaking palaro sa Asya gaya ng Asian Indoor and Martial Arts Games at Asian Beach Games sa mga susunod na taon. May panukala na sa Pilipinas ganapin ang 2030 Asian Games matapos ang matagumpay na 30th Southeast Asian Games noong Disyembre.

Pinoy, nakalinya rin ang laban sa Las Vegas Top Rank

Kasunod ng pag-apruba ng Nevada State Athletic Commission (NASC) sa mga contact sports na muling maipagpatuloy ang pagpapalabas ng mga laban sa Las Vegas. malayang makakapagtampok ang pamunuan ng Top Rank na magsagawa ng fight matches matapos ang mahabang lockdown dulot ng coronavirus disease pandemic.

Ilang mga salpukan na ang nakalinya para sa mga boksingero sa buong mundo, kabilang na ang Filipino fighter na si Mike “Magic” Plania ng General Santos City.

Kakaharapin ng 23-anyos na International Boxing Federation North American super-bantamweight champion ang numero-unong contender ng World Boxing Organization (WBO), no.2 sa International Boxing Federation (IBF) at no. 9 sa World Boxing Council (WBC) na si Joshua Greer Jr sa isang 10-round non-title catchweight 120-lbs match sa Hunyo 16 sa MGM Grand Conference Center sa Las Vegas, Nevada.

Magiging kauna-unahang Filipinong boksingero si Plania (23-1, 12 KOS) na sasabak sa isang sporting event sapul nang ideklara ang pandemya. Dito makakatapat niya ang delikadong si Greer na binansagang “Don’t Blink” dahil sa kakayanang magpabagsak ng kalaban sa isang kisap-mata lang dahil sa bilis ng suntok.

Naging impresibo ang huling laban ni Plania nang agawin niya ang kasalukuyang titulo kay Giovanni “Baby Face” Gutierrez ng Nicaragua sa pamamagitan ng unanimous decision. Ngunit sa pagkakataong ito ay paboritong manaig ang kalabang Amerikano na may boxing rekord na 22-1-1 at 12 KOs.

Ilan pa sa mga inaprubahang laban ng NASC para sa Bob Arum owned promotion ay dalawang palabas pa na ieere ng ESPN sa Hunyo 9 at Hunyo 11 sa MGM Grand. Ipapalabas ang laban sa pagitan nina WBO featherweight champion Shakur Stevenson (13-0, 7KOs) at Felix Caballaro (13-1-2, 9KOs) para sa 10-round non-title fight sa super-featherweight limit na 130-lbs.

Makikipagbasagan ng mukha si dating WBO junior featherweight titlist Jessie Magdaleno (27-1, 18 KOs) kay Yenifel Vicente (36-4-2, 28 KOs) ng Dominican Republic sa 10-round catchweight na 128-lbs.

Mahigit sa 20 fight cards pa ang inaasahang ipapalabas ng Top Rank sa buong mundo na wala ring mga live audience na manonood kasama ang Austria, China, Mexico, Germany, Poland, New Zealand, Nicaragua, Canada, Czech Republic at maaaring anim sa Estados Unidos. Pito pang mga Filipinong boksingero ang nasa US na kinabibilangan nina Plania, 4-division champ Nonito Donaire, boxing champ Johnriel Casimero, Reymart Gaballo, John Vincent Moralde, Mark Bernaldez at James Bacon.