PHL Olympic bound athletes na na-stranded, mapapauwi na

Maaaring manatili sa kani-kanilang mga lugar ang ilang national athletes na nag-eensayo sa iba’t ibang panig ng mundo, habang nakatakdang magsibalikan sa kanilang mga tahanan ang ilang mga stranded na atleta sa Philsports at Baguio City dahil sa umiral na lockdown sa National Capital Region at buong Luzon.

Patuloy ang paghahanda at pagsasanay nina Tokyo Olympics-bound Ernest “EJ” Obiena ng Pole Vault at Carlos “Caloy” Yulo ng gymnastics sa Formia, Italy at sa Japan, gayundin ang ilang swimmers na nasa Estados Unidos. Samantala, uuwi na sa bansa si 2016 Rio Olympics silver medalist Hidilyn Diaz ng weightlifting na mula Kuala Lumpur, Malaysia sapul pa noong Pebrero 20.

Kasalukuyang may 28 atleta, 4 na Filipino at 2 Korean coaches mula sa Fencing, Boxing, Athletics, at 6 pang sports ang na-lockdown sa dormitoryo ng Philsports Complex sa Pasig City mula nang abutan ng Extreme Community Quarantine (ECQ) sa NCR noong Marso. May ilan ding mga atleta mula sa Baguio City ang paunti-unting nakakauwi na sa kanilang mga tahanan. “Once it normalizes, we will provide them tickets, they have to go home. We have to train all NSAs fairly,” pahayag ng 70-anyos na sports official na si PSC Chairman Butch Ramirez.

Kasunod ng pag-anunsyo ng PSC na binawasan ng 50% ang monthly allowances ng national athletes, siniguro naman na hindi pababayaan ang mga ito, at ibabalik naman sa dating halaga ang allowances oras na maging maayos na ang pagpapadala ng Philippine Amusement and Gaming Corporation (PAGCOR). “Pag bumalik ‘yung pera mula sa PAGCOR, ibabalik din namin ‘yan sa mga atleta. That money is intended for the athletes,” saad ng 2019 SEAG Chef de Mission. “It breaks our hearts. Pero kapag bumalik ‘yan (National Sports Development Fund), we are committed to spend it for the athletes. The purpose of that funding is to spend it.”

UFC deal: Dos Anjos, namimili sa 3 posibleng kasagupa

Isang laban na lang ang nalalabi para kay dating UFC lightweight champion Rafael Dos Anjos na nakasaad sa kanyang kontrata sa organisasyon at napipisil ang rematch sa isang fighter na kasusungkit pa lamang ng korona at maaaring panghuling laban na niya ito sa octagon.

Nagpapatuloy si Dos Anjos sa kanyang training sa bahay sa San Diego, California katuwang si coach Jason Parillo at ilang training partners kabilang na ang kapwa UFC fighter Benell Dariush na parehong na-lockdown sa gitna ng health crisis dulot ng COVID-19 pandemic. Naghihintay pa ng tawag ang Brazilian para mai-booked sa susunod niyang laban at mapag-usapan na ang bagong deal sa UFC at maari nang sumabak nitong Hunyo.

“I want to fight. I fought in January, so June or July would be good dates,” ayon kay dos Anjos sa MMA Fighting. "I’m going for the last fight in my contract with the UFC, so we have to see if the UFC wants to re-sign me. It’s a bunch of things.”

Sinimulan ng Niterol native ang kanyang UFC career noong nakaraang 10 taon nang unang makuha ang 155-pound gold noong 2015. Isang welterweight noong 2017, aniya, handa siyang lumagda ng bagong kontrata bago aakyat sa octagon.

“I’m in the UFC for many years, since 2008, and the UFC is a very solid company,” aniya. “I have a great relationship with Dana White. I have almost 30 fights in the organization, and I would like to re-sign with the UFC. That’s what I want, but it’s not only up to me, it’s up to them as well, if they want to re-sign me.”

Trackster, basketball, volleyball hiniling ang trial training sa IATF

Nakatakdang humingi ng pahintulot sa gobyerno ang pitong National Sports Associations (NSAs) para makapaglaro na muli ang kanilang mga atleta.

Balak hilingin ng mga opisyales ng Philippine Athletics Track and Field Association (Patafa), Samahang Basketbol ng Pilipinas (SBP) at Larong Volleyball sa Pilipinas Inc. (LVPI) sa Inter-Agency Task Force (IATF) on Emerging Infectious Diseases na bigyan sila ng one-month trial training period para maibalik ang kani-kanilang mga events.

Maliban sa mga nabanggit na NSA's, hihingi rin ng kaukulang permiso ang mga opisyales ng Philippine Football Federation (PFF), Karate Pilipinas (KP), Philippine Rugby Football Union (PRFU) at Gymnastics Association of the Philippines (GAP).

Kaakibat ng gagawin nilang kahilingan ang mga inihanda nilang safety at monitoring guidelines upang panatilihing ligtas ang kanilang atleta at coaches sa coronavirus.

Sang-ayon kay PATAFA president Philip Ella Juico, magpapadala sila ng kanilang "request" sa IATF sa tulong ng Philippine Olympic Committee (POC) at Philippine Sports Commission (PSC).

“If everything goes well during that one-month period, we will request that the permit be extended for another month or so until regular competitions are held, say, by early September,’’ pahayag ni Juico.

Nag-shutdown ang lahat ng mga aktibidad sa Philippine sports noong Marso 16 nang magdeklara ang pamahalaan ng community quarantine measures para pigilin ang pagkalat ng COVID-19.

Kasama nilang nagpulong sina PFF president Mariano “Nonong’’ Araneta, GAP president Cynthia Carrion, KP president Ricky Lim, SBP executive director Renauld “Sonny” Barrios, LVPI secretary general Ariel Paredes, PRFU secretary general Ada Milby at rugby official Jake Letts.

Binanggit din niya bilang chairman ng Philippine Super Liga ang paghahalimbawa ni Araneta sa Spanish at German leagues, mga bansang may mataas na bilang ng mga kaso ng COVID-19 na pinayagan nang magdaos ng kompetisyon, habang ang Vietnam football league ay naglalaro na sa harap ng maraming manonood.