Brownlee at Sotto bida sa pananambak sa Chinese Taipei

ni Anthony Servinio @Sports | February 25, 2024

Madaling itinala ng Gilas Pilipinas ang ikalawang sunod na panalo laban sa bisita Chinese-Taipei, 106-53, sa pagpapatuloy ng 2025 FIBA-Asia Cup Qualifiers Grupo B sa siksikang Philsports Arena kagabi. Walang duda na dominado ng mga Pinoy ang laro at umabot pa ng 102-48 ang lamang sa huling tatlong minuto.

Minsan lang nakatikim ng bentahe ang Taiwanese, 3-2, sa three-points ni Liu Cheng. Ibinuhos ng Gilas ang huling 10 puntos ng first quarter upang itakda ang talaan sa 26-13 at hindi nagbanta ang mga bisita.

Photo: Reymundo Nillama

Naging mahalaga ang tambalan nina Justin Brownlee at Kai Sotto at nagsama para sa 18 puntos na mas marami sa buong Taiwan. Ipinagpatuloy ni Sotto ang mahusay na laro sa second quarter at nakahanap ng bagong kasama Carl Tamayo at nagbagsak ng tig-pitong puntos para lalong lumayo sa halftime, 52-27.

Matapos ang mahabang pahinga, bumalik si Brownlee sa third quarter at pangunahan ang atake kasama sina Calvin Oftana at Kevin Quiambao para sa komportableng 82-41 agwat. Mula doon hindi nagpreno ang Gilas at lalong itinatak ang kanilang kalidad. Nagtapos na may 26 puntos at 13 rebound si Brownlee habang 18 puntos at 10 rebound si Sotto.

Hinarap ni Coach Tim Cone at Kai Sotto ang mga mamahayag matapos ang 106-53 panalo ng Gilas Pilipinas sa bisitang Chinese Taipei. (kuha ni A. Servinio)

Apat pang kakampi ang may mahigit 10 na sina Oftana na may 13, Dwight Ramos 12, Tamayo 11 at Quiambao 10. Sa kabilang laro sa Grupo B, giniba ng Aotearoa New Zealand ang bisita Hong Kong, 88-49, sa Eventfinda Stadium sa Auckland. Nagdomina ang 7’0” sentro Tyrell Harrison na may 18 puntos at walong rebound para manatiling malinis din sa dalawang laro.

Susunod para sa Gilas ang mga pagbisita ng HK sa Nobyembre 21 at NZ sa 24. Titiyakin pa ang lugar at oras ng mga ito. Bago niyan ay sasabak ang mga Pinoy sa Paris 2024 Olympics Qualifiers. Haharapin nila ang Georgia sa Hulyo 3 at host Latvia sa 4 bago ang semifinals laban sa Brazil, Cameroon o Montenegro sa 6 at finals sa 7.

Brownlee hindi kinalawang, ipinanalo ang Gilas kontra Hong Kong sa 2025 FIBA Qualifiers

ni Anthony Servinio @Sports | February 22, 2023

Binuksan ng Gilas Pilipinas ang bagong kabanata sa gabay ni Coach Tim Cone at inukit ang 94-64 panalo kontra host Hong Kong sa pagsisimula ng 2025 FIBA-Asia Cup Qualifiers sa Tsuen Wan Stadium Miyerkules ng gabi. Humugot ng malaking numero mula kay Justin “Noypi” Brownlee at Kai Sotto sa third quarter upang tuluyang iwanan ang kalaro, 71-46.

Sa fourth quarter ay ipinako ng Gilas ang Hong Kong sa 61 puntos at ipinasok ni Carl Tamayo ang buslo na sinundan ng pito pang puntos mula kay Kevin Quiambao para sa kanilang pinakamalaking agwat, 92-61. Mula doon ay inalagaan nila ito sa nalalabing isang minuto.

Tumalon ang mga Pinoy sa maagang 9-0 bentahe subalit pumalag ang Hong Kong hanggang naagaw saglit ang lamang sa second quarter, 30-29, sa shoot ni dating Bay Area Dragon sa PBA Duncan Reid at tres ni Yeung Sui Hung. Binawi agad ni Quiambao, 31-30, ang lamang at tuluyang itayo ang iskor na 41-37 pagsapit ng halftime.

Namuno sa atake si Brownlee na may 14 sa unang tatlong quarter at nagtapos na may 16 puntos, pitong rebound at pitong assist. Sumunod si Quiambao na humabol sa huling minuto na may 15 puntos habang may 13 at 15 rebound si Sotto at 11 galing kay Jamie Malonzo.

Pumukol ng limang tres si Leung Shiu Wah para 15 puntos. Nag-ambag ng 12 si Reid.

Susunod para sa Gilas ang Chinese-Taipei ngayong Linggo sa Philsports Arena simula 7:00 ng gabi. Galing ang mga Taiwanese sa masakit na 89-69 tambakan sa kamay ng bisita Aotearoa New Zealand sa isa pang laro sa Grupo B.

Bumida sa mga Kiwi ang dalawang naging import ng Converge FiberXers sa PBA na sina Ethan Rusbatch na may 26 at Tom Vodanovich na may 16. May 16 din si Sam Timmins.

Gonzaga ng HD Spikers, isa na lang para sa PVL semis

ni GA @Sports | November 26, 2023

Mga laro sa Martes

(Philsports Arena)

2 n.h. – Farm Fresh vs Galeries

4 n.h. – Choco Mucho vs Gerflor

6 n.g. – Creamline vs Chery Tiggo

Isang panalo na lang ang kinakailangang mapagwagian ng Cignal HD Spikers upang makuha ang isang silya sa semifinals matapos madaling walisin ang NXLed Chameleons sa bisa ng 25-17, 25-14, 25-14, sa unang laro ng nakalatag na triple-header sa nalalapit na pagtatapos ng preliminary round ng 6th Premier Volleyball League (PVL) Second All-Filipino Conference, kahapon sa Philsports Arena sa Pasig City.

Kumamada si Sgt. Jovelyn Gonzaga ng double-double sa 12 puntos mula sa siyam na atake at tatlong blocks, kasama ang 10 excellent digs at pitong excellent receptions upang makuha ang solong ika-apat na pwesto sa 7-3 kartada upang mamurong makapasok sa Final Four na kinakailangang mapagwagian ang nalalabing laro kontra sa Gerflor Defenders upang makuha ang mahiwagang numero patungo sa semifinal round.

“Sobrang sakit nu'ng pagkatalo namin sa Chery (Tiggo), pero nag-move on na kami and ni-look out namin na must win yung remaining games. Nag-focus lang kami sa training para ma-achieve yung panalo [and] nakita naman yung outcome ng pinaghirapan naming training,” pahayag ng 5-foot-8 ng opposite spiker na sinabing nakatuon ang kanilang pansin sa susunod na laban sa Gerflor bago tignan ang darating na semifinal round. “Mindset lang namin is one game at a time, kaya nakafocus kami sa Gerflor, para sakaling manalo kami ay dala namin yung pride at confidence para sa mga suusnod na game,” dagdag ng 32-anyos mula Jordan, Guimaras.