Salano at Barcena kampeon sa Manila 21 KM Marathon

ni Anthony E. Servinio @Sports | June 24, 2024

Naging tama ang desisyon ng beteranong manakbong si Richard Salano at kinoronahan siyang kampeon ng Gatorade Manila Half-Marathon kahapon sa Mall of Asia. Ang nasabing 21.1 kilometrong karera ay nagsilbi rin bilang patikim para sa mas malaking Philippine Half-Marathon Series sa 2025. 

“Nakarehistro na ako pero naisip ko na linggo-linggo na ako tumatakbo at kailangan ko magpahinga,” kuwento ni Salano matapos umoras ng 1:11:23 para sa dagdagan ng isa pang tropeo ang kanyang koleksiyon. “Sa huli nagpasya ako na tumuloy.” 

Buong karera ay nagbantayan sina Salano at ang pumangalawang si Dickyias Mendioro na umoras na 1:11:44 o 21 segundo lang ang agwat. Pagdating sa huling u-turn sa Seaside Boulevard ay humataw si Salano at iniwan si Mendioro habang malayong pangatlo si James Kevin Cruz na 1:16:26. 

Walang nakasabay kay Nhea Ann Barcena sa panig ng kababaihan at kampeon siya sa 1:28:18 at pinaglabanan na lang ang 2nd place nina Maria Joanna Una Abutas (1:32:25) at Mea Gey Ninura (1:37:52). Sinariwa niya ang ala-ala ng isa pang karera na inorganisa ng Runrio noong 2016 kung saan ang siya naging pangkalahatang pinakamabilis – babae o lalake – sa espesyal na  distansyang 22 kilometro. 

Sa iba pang kategorya, nanaig si SEA Games Triathlon gold medalist Kim Mangrobang sa 10 km sa oras na 41:44. Si James Darrel Orduna ang kampeon sa kalalakihan sa 33:45. Sa 5km wagi si Cavin Vidal (17:04). Pinakamabilis sa kabaihan si Joneza Mie Sustituedo (20:50). 

Inanyayahan ni Coach Rio dela Cruz ang lahat na sumali sa Gatorade Manila Marathon sa Okt. 6. Sa 2025 ay maghihiwalay ang dalawang karera at ang Half-Marathon ay magiging bahagi ng serye na iikot sa siyam na iba pang lugar Baguio, Imus, New Clark, Legazpi, Cebu, Iloilo, Dapitan, Davao at Cagayan de Oro.  

Germany at Canada wagi sa VNL, U.S. abangan

ni Anthony E. Servinio @Sports | June 20, 2024

Mga laro ngayong Huwebes – MOA

11:00 AM Alemanya vs. Canada

3:00 PM Iran vs. Netherlands

7:00 PM Brazil vs. Estados Unidos 

Hahanapin ng Canada ang kanilang ikalawang panalo sa pagpapatuloy ng 2024 FIVB Men’s Volleyball Nations League (VNL) ngayong Huwebes sa MOA Arena. Nakaharang sa kanila ang inspiradong Alemanya sa pambungad na laro sa 11:00 ng umaga.

Sariwa ang mga Canadian sa makapigil-hiningang tagumpay kontra sa paboritong Japan sa limang set noong Martes ng gabi – 25-21, 20-25, 25-15, 20-25 at 15-10. Bumida sa ika-limang set si Arthur Szwarc na gumawa ng lima ng kanyang kabuuang 15 puntos habang buong laro namayani si Stephen Maar na nagsabog ng 24 kasama si Eric Loeppky na may 15 din.

Umangat ang Canada sa 5-4 at solong ika-pitong puwesto. Kahit bigo, pasok pa rin ang Japan sa Top Eight na 6-3. Kinailangan ng apat na set ang mga Aleman bago masugpo ang Pransiya, 25-23, 25-27, 25-20 at 25-23. Sumandal ang Alemanya sa 20 puntos ni Gyorgy Grozer at sumuporta sina Moritz Reichert at Lukas Maase na parehong may 12. 

Umakyat ang Alemanya sa 4-5 at nagbabantang makapasok sa quarterfinals at lalong naging mahalaga na makapanalo sila sa Canada. Pansamantalang dumaan sa lubak ang mga Pranses, ang defending Olympic gold medalist, pero nanatili pa rin sa pang-apat sa liga sa kartadang 6-3. 

Hahanapin ng Netherlands ang kanilang unang panalo sa pagharap sa kulelat na Iran sa 3:00 ng hapon. Wawakasan ang aksiyon ng tapatan nga Estados Unidos at Brazil sa 7:00 ng gabi. 

Sa mga kasabay  na laro sa Ljubljana nanalo ang Bulgaria sa Turkiye, 27-25, 25-20, 12-25 at 25-22. Sinundan ito ng tagumpay ng host Slovenia sa Argentina, 25-23, 25-22 at 29-27.

Alas Men Yumuko sa China sa AVC Challenge Bahrain

ni Anthony E. Servinio @Sports | June 4, 2024

Pansamantalang dumaan sa lubak ang kampanya ng Alas Pilipinas at yumuko sa Tsina sa pagbubukas ng 2024 AVC Challenge Cup for Men Lunes ng madaling araw sa Isa Bin Rashed Hall sa Bahrain. Kinailangan ang tatlong mahigpitang set – 25-19, 25-22 at 25-22 – bago nakuha ng Tsina ang unang panalo sa Grupo A. 

Maganda ang simula ng Pilipinas at agad uminit si Leo Ordiales at nagawang itabla ang unang set sa 12-12 bago tuluyang humiwalay ang kalaban. Parehong umabot sa 22-24 ang huling dalawang set subalit naging mas matatag ang Tsina sa pagtala ng nagpapanalong ika-25 puntos.

Susubukang bumawi ng Alas kontra host Bahrain at manatiling buhay para sa knockout quarterfinals. Ang mga Bahraini ay #67 sa FIVB World Ranking na mas mababa kumpara sa #59 Pinoy subalit ang Bahrain ang pumangalawa sa likod ng kampeon Thailand noong 2023 Challenge Cup sa Taiwan. 

Bawal magkamali ang mga Pinoy at tatlo lang ang kalahok sa grupo at kung papalarin, makakaharap nila sa playoffs ang isa buhat sa Grupo C na kinabibilangan ng #21 Qatar, #27 Timog Korea at #52 Indonesia. Nakauna ang mga Koreano sa mga Indones – 25-11, 25-16 at 25-9. 

Matatandaan na binigo ng Bahrain ang Pilipinas sa simula ng knockout playoffs noong 2023 at tuluyang nagtapos na ika-10 sa 15 bansa. Ang iskor noon ay 25-20, 25-17 at 25-23 at ilan sa mga naglaro ng mahusay kahit natalo ay sina Joshua Umandal at Kim Malabunga. 

Maliban sa dalawa, nagbabalik para sa pambansang koponan at tiyak layunin ang makabawi ay sina Noel Kampton, Marck Espejo, Vince Patrick Lorenzo at Lloyd Josafat. Si Coach Sergio Veloso din ang gumabay sa kanila. 

Sa ibang mga laro, nagtagumpay ang Pakistan sa Kazakhstan sa Grupo B – 25-19, 25-19 at 25-21. Dinaig ng Australia ang Chinese-Taipei – 25-21, 25-17 at 25-17 – sa Grupo D.