Preparado na ang lahat sa FIVB Men's World C'ships

ni MC @Sports News | Jan. 3, 2025

Photo: Nagtulung-tulong upang higit na mapalakas ang pagdaraos ng FIVB Men’s World Championship (MWCH) 2025 sa Setyembre sina Philippine National Volleyball Federation (PNVF) vice president Ricky Palou at secretary-general Donaldo Caringal, Philippine Sports Commission chairman Richard Bachmann, Tourism Secretary Christina Garcia Frasco, Volleyball World CEO Finn Taylor, PNVF president Ramon “Tats” Suzara at national team mainstay Bryan Bagunas kasama sina FL Liza Araneta Marcos at William Vincent “Vinny” Araneta Marcos matapos ang unang organizational meeting ng world championship sa Malacañang noong Abril 30, 2024. (pnvf-fivbpix)

Inihahanda na nang husto ngayong pagpasok ng 2025 ang pagtataguyod ng bansa ng FIVB Men’s World Championship (MWCH) 2025 sa Setyembre sa dalawang magkahiwalay na venues.

Darayo sa bansa ang 32 pinakamahuhusay na koponan ng volleyball sa mundo para magbakbakan mula Setyembre 12 hanggang 28 sa SM Mall of Asia Arena at Smart Araneta Coliseum.

"This is the time when the preparations and organization start to be meticulous every single day, it’s the world championship year of the FIVB and as host country for first time—and solo host at that—the mission borders from an excellent to almost perfect hosting of the event,” ayon kay Ramon “Tats” Suzara na Philippine National Volleyball Federation at Asian Volleyball Confederation president at siya ring executive vice president ng FIVB.

Gamay na ni Suzara ang pagho-host ng malalaking events. Kasama ito sa organizing committee ng FIBA World Cup na idinaos noong 2023 sa bansa. Ikinagalak din ni Suzara ang suportang ibinibigay ng Malacañang sa pangu¬nguna nina First Lady Liza Araneta Marcos at William Vincent “Vinny” Araneta Marcos na co-chair ng Local Organizing Committee (LOC) gayundin ni Tourism Secretary Christina Garcia Frasco.

Nagbigay papuri si FIVB president Fabio Azevedo kay President Bong Bong Marcos at ang First Family sa suporta nito sa volleyball at sa Philippine sports sa kabuuan.

Nagtakda na ng Inter-Agency Technical Working Group Meeting sa pangunguna ng Philippine Sports Commission (PSC) noong Nobyembre sa Rizal Memorial Sports Complex upang matiyak ang tagumpay ng darating na torneo.

Kasama rin sa Local Organizing Committee sina Senator Pia Cayetano, Manuel V. Pangilinan, Philippine Olympic Committee president Abraham “Bambol” Tolentino at PSC chairman Richard Bachmann.

20 atleta masusubok sa 9th Asian Winter Games

ni VA @Sports | Jan. 3, 2025

Photo: Inihahanda na ang 20 atletang sasabak sa Winter Games sa Pebrero sa Harbin, China sa pamumuno ni POC president Abraham Tolentino kung saan lalahok ang teams sa skateboarding, curling at figure skating. (pocpix)

Nakaakdang magsugo ng 20-kataong koponan para sa ika-9 na edisyon ng Asian Winter Games na gaganapin sa China sa Pebrero 7-14 sa winter resort city ng Harbin.

Misyon ng delegasyon na maihanda ang entablado para sa posibleng unang medalya ng bansa sa Winter Olympics. "We've already accomplished the dream in the Summer Olympics—three gold medals in consecutive games," pahayag ni Philippine Olympic Committee (POC) president Abraham "Bambol" Tolentino noong Miyerkules pagpasok ng taong 2025.

"And that dream we want to also achieve in the Winter Olympics."

Wala pang kumpletong record kung may ilang mga Filipino winter sports athletes ang lumahok sa naunang walong edisyon ng Asian Winter Games, subalit naniniwala si Tolentino na ang bilang ng mga Pinoy na sasabak sa Harbin ang pinakamarami.

"And our athletes are competing in six of the 11 sports on the Harbin program," ani Tolentino. Sa sports na Curling may pinakamalaking bilang ng mga atletang Pinoy ang sasabak sa bilang na sampu na kinabibilangan nina Marc Angelo Pfister, Enrico Gabriel Pfister, Christian Patrick Haller, Alan Beat Frei, Jessica Pfister, Benjo Delarmente, Kathleen Dubberstein, Leilani Dubberstein, Sheila Mariano at Anne Marie Bonache.

Ang iba pang miyembro ng Team Philippines na pamumunuan ni chef de mission Richard Lim ay sina Paolo Borromeo, Aleksandr Korovin, Cathryn Limketkai, Isabella Marie Gamez at Sofia Lexi Jacqueline Frank sa figure skating; Francis Ceccarelli at Talullah Proulx sa Alpine skiing; Laetaz Amihan Rabe sa freestyle skiing; Peter Joseph Groseclose sa short track speed skating ay Adrian Tongco sa snowboarding.

Nagwagi ng tatlong gold medals ang bansa sa dalawang sunod na edisyon ng summer Olympics sa Tokyo(2021) at Paris (2024) sa husay nina weightlifter Hidilyn Diaz-Naranjo (1 gold) ar gymnast Carlos Yulo (2 golds) sa ilalim ng panunungkulan ni Tolentino sa POC bilang pangulo. "The Winter Olympics are as extremely tough as the Summer Olympics, but we have proven that it could be done," wika pa ni Tolentino. Sa Italy idaraos ang 25th edition ng Winter Olympics sa Milan at Cortina d'Ampezzo sa Pebrero 7- 22 2025.

PAI-Swim Series 1 ngayon sa RMSC

ni MC @Sports | Sep. 21, 2024

Tuloy ang pagtuklas ng Philippine Aquatics, Inc. (PAI) sa mga bagong talent sa grassroots level sa paglarga ng Go Full Swim Series long Course Swimming Meet Leg 1 ngayong weekend sa Teofilo Yldefonso Swimming pool sa loob ng Rizal Memorial Sports Complex Malate, Manila.

Tampok ang mga batang swimmers mula sa mahigit 30 swimming club na nasa pangangasiwa ng PAI ang magtatagisan ng kasanayan at talento sa torneo na inorganisa ng tanging national sports association sa bansa sa pagtataguyod ng Philippine Sports Commission (PSC).

“We’re blessed and grateful na muling itaguyod ang PAI-Speedo para patuloy nating maisulong ang grassroots development program.

Hindi lamang po ito sa swimming at sa Manila bagkus sa iba pang discipline ng aquatics tulad ng open swimming at nagaganap din ito sa iba’t ibang lalawigan sa pamamagitan ng ating mga regional members,” pahayag ni Buhain.

Nakataya sa torneo ang team overall championships sa mga event ng Class A, B, C at D. Nakalinya rin sa serye ang Leg 2 sa October 19-20 at Leg 3 sa Nov. 16-17 na pawang isasagawa sa RMSC venue. Bukod dito, ratsada rin ang PAI sa CARAGA Series Leg 1 sa Oct. 26-27 sa FSSU Morelos Campus sa Butuan City at ang Open Water Swim Championships sa October 26 sa Dusit Thani seaside sa Mactan City sa Cebu.

“Pinalalakas natin ang mga programa hindi lamang sa Manila pati na rin sa ating mga region. Kailangan natin ang regular meet sa mga probinsiya tulad nito para makita natin ang improvement ng ating mga swimmers bago sila mapalaban sa mas kompetitibong meet and eventually make it to the National Team,” sambit pa ni Buhain.

Nauna nang naisagawa ang Short Course Leg 1 championship sa Central and Northern Luzon Luzon nitong Setyembre 14-15 sa Lingayen, Pangasinan.