Taumbayan, ‘di dapat magpadala sa takot ng COVID-19 para isabuhay ang susi ng tagumpay

Sr. Socrates Magnus II

Bigyang-daan natin ang ilang bagay na puwedeng isabuhay ngayon at pagkatapos ng COVID-19 pandemic.

Totoong mahirap ang sitwasyon ngayon dahil hanggang sa mga araw na ito, wala pang gamot laban sa COVID-19. Pero ang mas maganda na may gamot na o wala, dapat magsikap ang mga tao na paunlarin ang kanilang buhay.

Ang totoo nga, kahit wala pa ang COVID-19 sa mundo, marami na ring bagay ang nakakatakot, lalo na rito sa ating bansa.

Noong ang mga tao ay malayang nakalalabas ng bahay, napakaraming namamatay dahil sa krimen tulad ng riding-in-tandem, holdap, rape at akyat-bahay. Kaya noon pa man, aminado mga awtoridad sa ganitong senaryo kung saan ang mga tao ay namamatay sa krimen at kahit ang ilan sa mga nasa pamahalaan ay biktima rin ng mga ito.

Pero may isang katotohanan na hindi napapansin na mas mataas ang bilang ng mga namamatay dahil sa aksidente ng mga sasakyan.

Sa ngayon, kapag sinilip natin ang sitwasyon ng COVID-19 sa bansa, makikita nating kaunti na ang namamatay at mas marami ang gumagaling habang higit na dumarami ang nagpopositibo sa sakit, pero wala namang nararamdaman na mga sintomas.

Sa ganitong katotohanan, hindi tayo dapat mahadlangan ng ating mga kinatatakutan, lalo na sa aspetong kailangan nating pagandahin ang ating buhay o kabuhayan.

May isang susi ng tagumpay na kailangan nating isabuhay at ang susing ito ay napatunayan na ng maraming nagsiyaman.

Ito ay ang “Paramihin mo kung ano ang nasa iyo,” kahit sino, kapag inintindi ang mismong mga salitang ginamit, tiyak na sasabihin, kapag isinabuhay ang pagyaman, ito ay hindi imposibleng bagay.

Paano ito gagawin? Ang unang kailangan ay maging tapat sa sarili. Halimbawa, may hawak tayong pera, pero hindi naman sa atin lahat ng ito. Masasabi lang na talagang atin ‘yun pagkatapos naibawas ang pambayad sa gastusin at ang matitira ay ang tunay na atin.

Halimbawa, ang pambayad sa kuryente, hindi ‘yun para sa atin dahil ‘yun ay para sa electric company tulad ng Meralco.

Nakatutuwa na nakakagalit dahil ang Meralco ay inatasang magpaliwanag sa Kongreso at Energy Regulatory Commission (ERC) kung bakit may biglang pagtaas ng bill ng mga konsumer, gayundin, ipinaayos ang pagkompyut sa bills.

Totoong hindi atin ang pera na pambayad sa Meralco kahit ang perang ito ay hawak natin. Pero puwede pa ring masabing atin dahil madalas din naman ay inutusan ng Korte ang Meralco na ibalik sa mga tao ang sobrang naibayad sa kanila.

Nakapagtatakang nangyayari ang maling paniningil dahil ayon sa batas, kailangang may batayan bago maningil sa mga tao.

Malungkot mang tanggapin, muli, hindi atin ang hawak nating pambayad sa gastusin sa elektrisidad, kaya ang halagang ito ay hindi puwedeng ibilang sa nasabing susi ng tagumapay na “Paramihin mo kung ano ang nasa iyo.”

Itutuloy

Pahiwatig na kulang sa pagmamahal ng karelasyon

Socrates Magnus

Salaminin natin ang panaginip ni Raquel na ipinadala sa Facebook Messenger.

Dear Professor,

Naliligo ako sa batis, tapos sobrang linaw ng tubig at tahimik doon dahil agos lang ng tubig mula sa itaas ng bundok ang naririnig ko.

Sabi ko sa sarili ko, sana ay malapit lang dito bahay namin ‘yun, pero malabo ‘yun mangyari dahil taga-Makati City ako.

Ano itong panaginip ko?

Naghihintay,

Raquel

Sa iyo Raquel,

Malabong mangyari sa tunay na buhay ang iyong napanaginipan, pero ang kahulugan ng iyong panaginip ay puwedeng magkatotoo.

Sabi ng iyong panaginip, very lonely ang love life mo, na ang unang dahilan ay naghahanap ka ng tunay at wagas na pagmamahal. Kaya ibig ding sabihin, kung sakaling may karelasyon ka ngayon, hindi ka masaya at kulang ka sa tamang pagmamahal na dapat ay magmumula sa iyong karelasyon.

Kung nagkataon na ikaw naman ay may asawa na, ganundin ang kahulugan – ikaw ay hindi masaya sa iyong asawa.

Alam mo, ang tao ay isinilang sa mundo para lumigaya, kaya kapag ang tao ay hindi lumigaya, mahirap mang paniwalaan, pero masasaksihan ng iyong mga mata na iiwanan niya ang kanyang kalungkutan at siya ay pupunta sa lugar kung saan niya aakalaing liligaya siya.

Dahil dito, puwedeng tulad ng nasabi na, makahahanap ka ng kaligayahan dahil na rin ito ang kahulugan ng iyong napanaginipan.

Hanggang sa muli,

Professor Seigusmundo del Mundo

Madlang pipol, kani-kanyang diskarte na lang para ‘di magka-COVID-19 dahil ayaw nang makinig sa goby

Sr. Socrates Magnus II

Bigyang-daan natin ang ilang bagay na puwedeng isabuhay ngayon at pagkatapos ng COVID-19 pandemic.

Inilagay na ng mga awtoridad ang maraming lugar sa bansa sa ilalim ng General Community Quarantine (GCQ), pero mahigpit pa rin nilang ipinaaalala na sumunod sa mga nakalatag na dapat gawin.

Pero sa totoo lang, alam ng pamahalaan na ang mga tao ay inip na inip na at darami lang ang mga pasaway kung hindi palalayain ang mga tao. Alam din nila na marami sa kanilang hanay ang hindi sumusunod sa sarili nilang mga utos.

Kaya alam na alam din nilang kapag ganu’n ang nangyari, abot-abot ang galit ng mga tao dahil maluwag sila sa kasamahan nilang mga nasa itaas, pero ang mga pangkaraniwang tao ay pinahihirapan kapag hindi sumusunod.

Kaya bago dumami ang mga magagalit sa kanila, minabuti na lang na bigyan ng kalayaan ang tao. Ito ay kahit alam nilang ang COVID-19 ay nasa buong paligid pa rin. Pero ang dahilan nila ay ang para mabuhay ang ekonomiya ng bansa, kaya nawawala o kinalimutan na ang kanilang sinabi na mas mahalaga ang buhay kaysa sa pagkita ng pera.

Ang mas maganda, para sa lahat ng mamamayan ay gawin ang kanilang mga gustong gawin habang sila ay gumagawa rin ng paraan para makaiwas sa COVID-19, kumbaga, hindi na sila gaanong aasa pa sa mga sinasabi ng mga awtoridad dahil habang nakikinig sa kanila, lalo lang gumugulo at nalilito ang mga tao.

Bukod sa paiba-iba at pabagu-bago ang kautusan, sila mismo ay naguguluhan, lalo na sa bilang ng kaso ng COVID-19 na araw-araw ay nagbibigay lang impresyon sa tao na dinadaya ang bilang o datos.

Kaya ang isa pang mabuting gawin ay magsikap at magpursigi na umunlad. Maraming araw ang nasayang at para makahabol na mapaunlad ang kabuhayan, huwag kalimutan ang isa sa Law of Success na nagsasabing, “Ngayon, kikilos ako at ang nasa isip ko ay ito na ang huling mga araw ko!”

Sa biglang tingin, nakakatakot ang Law of Success kung saan ito ay mukhang mas nakakatakot pa sa COVID-19. Pero ito ay subok na at kapag ibinigay ng tao ang lahat ng makakaya niya, dahil wala nang bukas pa, ang kanyang naging pag-asenso ay sobra-sobra.

Bakit kaya? Dahil kapag inilagay mo sa isipan mo na ito na ang mga huling araw mo, itotodo mo na ang lahat ng makakaya mo at kapag nagising at buhay ka pa, sobrang tuwa mo dahil ang todong pagyaman ang napasaiyo.

Itutuloy