Nagmamaneho ng dream car sa panaginip, magkakatotoo

Salaminin natin ang panaginip ni Ulysis na ipinadala sa Facebook Messenger.

Dear Professor, Sobrang bilis ng pagda-drive ko at may bagong car ako. Sa totoong buhay, gusto ko talagang magkaroon ng kotse, as in, ang dream car ko ang minamaneho ko sa panaginip ko. Ano ang ibig sabihin nito?

Naghihintay, Ulysis

Sa iyo Ulysis, Binabati kita dahil your dream will come true, as in, magkakaroon ka na ng sarili mong kotse at ito mismo ay ang dream car mo.

Hindi nagsisinungaling ang mga panaginip, kumbaga, ito ay tapat at totoo dahil ang panaginip ay nagmumula sa unconscious mind na tinatawag ding “hindi nakikitang sarili” at minsan, may pagkakataon na ito ang “malalim na kamalayan ng tao”.

Ang salitang “malalim” ay nangangahulugan na kapag gising ang tao, siya ay hindi nagpaparamdam, pero kapag ang tao ay tulog, siya ay nangingibabaw at siya mismo ang gising na gising, gayundin, aktibung-aktibo o bida sa mga panaginip.

Ayon sa iyong malalim na kamalayan na nagising nang ikaw ay mahimbing na natutulog, hindi magtatagal at ikaw ay magkakaroon na ng kotse.

Alam mo, ang unconscious-self ay powerful. Siya rin ay makapangyarihang tao o sariling hindi nakikita ng tao na ayon sa mga alamat ay ikinulong sa katawan.

Siya rin ay hindi basta-bastang makalalabas dahil binabantayan siya ng conscious-self.

Sa teolohiya, siya ang tinatawag na powerful being na God-like. Medyo mahirap paniwalaan ito, pero kapag naalala mo na ang nakasulat sa Bible na “God made man in his own image,” mauunawaan mo na ang unconscious-self ay ang God-like image of a man or a woman.

May kakayahan siyang bigyan ng kaganapan ang hiling ng katawang-lupa dahil siya ay makapangyarihan at ayon sa iyong panaginip, ang dream car mo ay magkakatotoo dahil ito ay ginarantiyahan ng iyong God-like self.

Hanggang sa muli, Professor Seigusmundo del Mundo

Maraming balang, sign na dapat paghandaan ang panahon ng taggutom o taghirap

Socrates Magnus

Salaminin natin ang panaginip ni James na ipinadala sa Facebook Messenger.

Dear Professor, Nanaginip ako ng napakaraming locust o balang na mga nakikita sa bukid na tatalun-talon.

Noong mga bata pa kami, nanghuhuli kami nu’n sa Nueva Ecija at pinaglalaruan namin, pero may mga matatanda na nanghuhuli rin kasi kinakain namin ‘yung mga locust o balang.

Pabalik-balik sa panaginip ko ang mga ito hanggang sa nagising na ako.

Naghihintay, James

Sa iyo James, May panahon ng paglabas ng mga balang o locust at ito ay kapag ang mga bundok ay may malalawak na damuhan at natutuyo na ang mga halaman sa gubat.

Doon ang natural habitat ng mga balang. Ibig sabihin, hindi naman sila talaga nakatira sa bukid na taniman ng mga palay, gulay at mga halamang kinakain ng tao.

Kaya kapag dumarayo sila sa mga barangay, bayan at maging sa mga siyudad, sila ay libu-libo o baka milyun-milyon pa, as in, sila ay sobrang dami.

Para sa mga magsasaka, salot o peste ang mga ito, kasi kapag nag-landing ang mga balang sa taniman ng palay, masisira ang tanim na palay, ganundin ang nangyayari kapag sa mga gulay sila naminsala. Kaya ang iyong panaginip ay nagbababala ng taggutom o taghirap sa bayan ninyo sa Nueva Ecija.

Baka naman matakot ka at sobrang mag-alala, kaya bago pa mangyari ito, gusto kong ibahagi sa iyo ang kuwento ni Joseph, The Dreamer na nakasulat sa Banal na Aklat.

“Sa pamamagitan ng mga panaginip, nakita ni Joseph ang magaganap na magkakaroon ng taggutom sa lupain kaya ang kanyang ipinayo sa hari ay mag-imbak ng mga pagkain para kapag dumating ang panahon ng taghirap, ang mamamayan ay may kakainin.”

Pero sa totoo lang, James, may mga balang man o libu-libong locust ang dumagsa, dapat paghandaan ng tao ang mga araw na darating. Kumbaga, kapag ang tao ay nakahanda para sa kinabukasan, hindi siya mag-aalala anuman ang dumating.

Kaya ang iyong panaginip ay para rin sa iyo na ang mensahe ay nagsasabing isabuhay mo ang paghahanda sa iyong hinaharap. Muli, ngayon na, hindi bukas kundi ngayon na mismo.

Hanggang sa muli, Professor Seigusmundo del Mundo

Mga tsismoso’t tsismosa, ingat!.. Kahulugan ng paglabas ng mga uod sa March 10

Sr. Socrates Magnus II

Ipagpatuloy natin ang pagbibigay ng mahahalagang kaalaman tungkol sa darating na super full moon sa March 10, 2020.

Ang full moon ngayong Marso ay super full moon, gayundin, ito ay tinatawag na “worm moon.” Ito ay dahil sa March 10, 2020 ay lilitaw ang mga uod mula sa ilalim ng lupa.

May sikat na kasabihan ang mga Pinoy na hanggang ngayon ay in pa rin at minsan pa nga ay trending sa mga tahanan at ito ay ang “Ang maagang gumigising ay maraming uod na makakain.”

Madalas, ito ang sinasabi ng mga magulang kapag tanghali nang gumigising ang kanilang mga anak, pero ito rin ang sinasabi ng bungangerang misis sa kanyang mister na ayon sa kanya ay batugan dahil tanghali na kung bumangon.

Mahirap makalimutan ang nabanggit na kasabihan sa buhay nating mga Pinoy. Sa amin nga mismo, hanggang ngayon, kapag kaming magkakapatid ay nagkikita-kita, naaalala namin ang aming ina na palaging sinasabi sa aming Kuya Manoling na “Ang ibon na maagang gumigising ay maraming uod na makakain,” kaya lang, sumasagot ang aming kuya ng “Ang uod na maagang gumising, unang mabibiktima ng mga ibon,” pero lihim lang niyang sinasabi ito, as in, hindi naririnig ng ina namin dahil namamalo ng malapad na kahoy ang mga magulang bilang pagdisiplina sa anak.

Nakatutuwa ang mga kuwento tungkol sa mga uod, lalo na kapag dumarating ang Marso dahil masasabing panahon ng paglabas ng mga uod na parang sila ay nagpipiyesta sa dami. May kuwento rin na kapag pumasok ang uod sa suot na damit pang-ibaba ng mga babaeng tagabukid, siya ay sinasabing magkakaasawa.

Sa mga lalaki o binatang tagabukid, kapag ang uod ay pumasok sa kanilang suot, ibig sabihin, lalayo sila sa lupang sinilangan at pagbalik ay may kasama nang misis at supling. Kapag naman pinasok ng uod ang bibig ng mga tsismosa at tsismoso, buong bayan ay magsasaya at sila o ang kuwento nila ay magiging kuwentong bayan sa mahabang panahon.

Kung susuriin ang mga nasa itaas, ang kuwento ng mga uod, anak na tamad na gumising at mga tsismoso at tsismosa, iisa lang ang kauuwian na ang buwan ng Marso ay pagsisimula ng pagganda ng takbo ng negosyo at kalakaran o palitan ng mga paninda at panahon din kung kailan ang mga tao ay mas madalas na makahahawak ng pera dahil panahon ito ng pera.

Barya man o paper money, maliit man o malaki, mabilis ang pag-ikot nito kaya sa kabuuan, ang ekonomiya ng bansa ay magsisimula na ring umangat.

(Itutuloy)