Ina, inis sa kapitbahay na maingay

ni Sister Isabel del Mundo - @Mga kuwento ng buhay at pag-ibig | Pebrero 22, 2024

Dear Sister Isabel,

Kahit saan ako pumunta hindi ako makatagpo ng katahimikan. Dati akong nakatira sa probinsya, ang ingay ng kapitbahay namin. Sa harap pa mismo ng bahay namin sila naglagay ng mga silya, nagtsi-tsismisan at nag-iinuman. Mabuti na lang ay nakabili ng bahay ang anak ko sa Laguna, at ako ang caretaker niya. 

Natuwa ako dahil malayo na ko sa ingay ng kapitbahay namin, pero hindi pa rin pala. Dikit-dikit ang bahay sa nilipatan ko, ang liit lang ng pagitan sa kapitbahay, maski ang kalampag ng pinto nila ay dinig na dinig sa bintana ko. 

Ang masaklap pa, ‘yung kulungan ng aso nila sa tabi pa ng bintana ko nilagay. Binging-bingi na ko sa kakakahol ng mga ito. Minsan, umaalulong pa na para bang may nakikitang masamang espiritu. Hay buhay! 

Paglabas ko pa ng gate nagkalat ang dumi ng mga asong gala. Hinahayaan din pala dito ang asong gala. ‘Yun namang hindi gala, dala-dala ng amo nila at dito pa sa harap ng gate ko pinapaihi. Sa sobrang inis, nasigawan ko tuloy sila. 

Kailan kaya ako magkakaroon ng katahimikan sa aking kapaligiran? Physically and emotionally depressed na ako. Ano kaya ang dapat kong gawin? 

Nagpapasalamat,

Nanay Dory ng Laguna

Sa iyo, Nanay Dory,

‘Ika nga sa kasabihan, “Patay lang ang walang problema”. Sa kaso mo, gusto mo na bang mamatay? 

Sa palagay ko ay hindi pa, buhay ka pa kaya harapin mo ng buong katalinuhan, buksan mo ang iyong isipan sa mga problema. Ikaw na ang mag-adjust at mag-isip ng tamang paraan para libangin ang iyong sarili. 

Maging busy ka sa mga bagay na nagpapasaya sa iyo. Magpatugtog ka ng music sa loob ng bahay mo para ‘di mo marinig ‘yung kahol ng aso. 

Mamasyal ka sa mall, mag-window shopping ka kung naiinip ka na sa inyo o kaya naman makipag-bonding ka sa mga kaibigan mo, sumama sa mga gimmick nila para maging masaya ka hindi ‘yung lagi kang nasa bahay lang. 

Marami pang ibang bagay na puwede mong gawin para hindi ka ma-stress sa kapaligiran mo. Huwag mong kunsumihin ang iyong sarili. Lahat ng bagay na nagpapa-stress sa iyo ay  may katapat na solusyon, basta’t gamitin mo lang ang iyong isip at talino kung ano ang dapat gawin. 

Daanin mo sa diplomasya huwag sa init ng ulo, at higit sa lahat mas mabuti kung magiging busy ka sa gawaing pang-simbahan. Sumali ka sa church organization. Kung maaari, maglingkod ka sa simbahan. Ngunit, kung maganda naman ang boses mo, sumali ka sa choir, kung okey ka namang magsalita, mag-lector ka. 

Kayang-kaya mo ‘yan. Malaki ang maitutulong sa iyo ng mga bagay na sinabi ko para harapin mo nang buong sigla ang buhay sa mundo. Hanggang dito na lang. Pagpalain ka nawa ng Diyos sa iyong pang-araw-araw na pamumuhay.

Sumasaiyo,

Sister Isabel del Mundo

Misis, asar sa mister na immature

ni Sister Isabel del Mundo - @Mga kuwento ng buhay at pag-ibig | Pebrero 18, 2024

Dear Sister Isabel,

Ang problema ko ngayon ay tungkol sa aking asawa. Mabait at masipag naman siya, kaya lang hindi siya romantiko sa amin ng anak niya. 

Mas madami pa nga ang oras niya sa kaibigan niya. Isa rin siyang mama's boy, lumalaki na ang anak namin, ngunit wala pa rin siyang pagbabago. 

Malapit na akong mapuno, at gusto ko na siyang hiwalayan. 

Sa tuwing ino-open up ko ang aming problema, nauuwi lang ito sa pagtatalo.

Ano ang dapat kong gawin sa asawa ko? Paano ko kaya mababago ang pagiging immature niya? Limang taon ang agwat ng edad namin, 30-anyos siya habang 35-anyos naman ako.

Sana ay matulungan n'yo ko.

Nagpapasalamat,

Pauline ng Bulacan

Sa iyo, Pauline,

Nariyan na 'yan. Harapin mo ang ugali ng asawa mo, at habaan mo pa ang pasensya mo. 

Tutal ang sabi mo, mabait at masipag naman siya.  Nakukulangan ka lang sa ugali niya dahil hindi siya showy. Baka naman nakukulangan din siya sa iyo, kaya ganun? Lambingin at huwag mo siyang awayin. Habang magkatabi kayo sa kama, kausapin mo siya. Ipaunawa mo na hindi na siya bata, may pamilya na siya na nangangailangan ng kanyang atensyon at malalim na pagmamahal. 

Kulang lang din siguro siya sa pansin, baka lagi kang busy sa buong maghapon kaya hanggang ngayon ay doon siya nakikipag-bonding sa kanyang kaibigan.

Huwag mong isisi sa kanya ang lahat. Sa palagay ko ay may pagkukulang ka rin. Kapag day-off niya yayain mo rin siyang mamasyal, mag-picnic kayo, magluto ka ng paborito niyang pagkain at maglambing-lambingan naman kayo. 

Makikita mo, unti unti nang magbabago ang asawa mo. Kulang lang sa pansin iyan. Samahan mo na rin ng dasal, hilingin mo sa Diyos Ama na baguhin ang ugali ng asawa mo. Sa palagay ko, diringgin din ng Diyos ang dasal mo. 

Sumasaiyo,

Sister Isabel del Mundo

Kerengkeng na manugang, biyenan ‘di makapagsumbong sa anak

ni Sister Isabel del Mundo - @Mga kuwento ng buhay at pag-ibig | Pebrero 13, 2024

Dear Sister Isabel,

Isang mapagpalang araw sa inyo r’yan sa Bulgar. Dati, masaya ang aming pamilya kahit na hindi kami mayaman. Isa lang ang anak ko, at siya ay isang lalaki. Sa kasalukuyan, may isa na rin siyang anak. 

Narito sa poder ko ang kanyang asawa’t anak. Magkakasundo naman kami hanggang sa naisipan ng anak ko na magtrabaho sa abroad para umano guminhawa ang buhay namin at mahango kami sa kahirapan.

Pumayag naman ang manugang ko at natuwa pa nga siya dahil may pag-asa na kaming yumaman. 

Makalipas ang isang taon, unti-unti ring guminhawa ang aming buhay. Subalit, noong sumunod na taon may napansin ako sa manugang ko. Lagi siyang nakapustura at madalas umalis ng bahay. Minsan pa nga ay hindi umuuwi, at hindi sa amin natutulog. 

Kaya one time nu’ng umalis siya, pinasundan ko siya sa aking kaibigan. Kaya naman pala todo-ayos ay dahil may lalaki na siyang iba. Pinagtataksilan niya na pala ang anak ko, kinompronta ko siya pero hindi siya umamin. Hindi ko siya maisumbong sa anak ko dahil baka makagawa lang siya ng ‘di kanais-nais at bigla na lang umuwi. 

Ano kaya ang dapat kong gawin? Patuloy pa rin ang pagtataksil ng manugang ko sa anak ko. Kahit pinangaralan ko na siya, sana ay mapayuhan n’yo ako. 

Nagpapasalamat,

Nanay Myrna ng Zambales

Sa iyo, Nanay Myrna,

Ganyan talaga ang nagiging kapalit ng dollar sa buhay ng mag-asawa. Sa pagnanais na yumaman, maging dollar earner, lalong hindi gumanda ang kanilang pamumuhay. 

Ang pinakamabuti mong gawin ay kausapin mo ng masinsinan ang manugang mo.

Ipaunawa mo sa kanya na masama ang maidudulot ng kanyang ginagawang kataksilan at pangangaliwa. Lalo na kung mabubuntis pa siya ng kalaguyo niya. Kung hindi pa rin siya makikinig sa iyo, roon mo na siya isumbong sa anak mo.

Takutin mo na baka biglang umuwi iyon. Naniniwala akong nauhaw lang sa sex ang manugang mo. Kapag natauhan na ‘yan, paniguradong titigil din ‘yan at tuluyang iiwas sa kalaguyo niya. 

Huwag mo siyang awayin. Kausapin mo lang siya na may halong pagmamalasakit sa inyong pamilya kabilang na ang kaisa-isa mong apo sa kanya at para na rin sa anak mo na nagpapakahirap sa abroad. 

Nakasisiguro ako na sa magandang pakiusap na may halong diplomasya, magigising sa katotohanan ang manugang mo. Iiwas na siya sa kalaguyo niya at tuluyang magiging mabait at responsableng asawa at ina hanggang sa makauwi ang asawa niya. 

Pagdating ng anak mo, himukin mo siyang huwag na muling magtrabaho sa abroad.

Magnegosyo na lang umano sila kahit na maliit lang. Magtulungan silang mag-asawa.

Ang mag-asawang nagtutulungan ay pinagpapala. Sipag at tiyaga lang ang kailangan.

Tutal kamo isa lang naman ang anak nila. Hindi na niya kailangang iwan pa ang kanyang pamilya.

Sabihin mo rin lumalaki na ang anak niya, at kinakailangan na nito ng kalinga ng isang ama. Kung aalis siyang muli para magtrabaho sa abroad, magiging ulila na sa ama ang kanyang anak gayung buhay pa naman siya at higit sa lahat sabihin mo sa anak mo na ang babae ay may pangangailangang sexual din. Kung lalayo siyang muli, baka makalimutan na siya ng kanyang asawa. Umaasa akong makikinig sa iyo ang anak mo.

Sumasaiyo,

Sister Isabel del Mundo