2 M Sinovac vaccine kada buwan, bibilhin ng 'Pinas sa China

ni Mary Gutierrez Almirañez | March 27, 2021

Mahigit isang milyong doses ng Sinovac COVID-19 vaccines ang inaasahang ide-deliver sa bansa kada buwan upang makumpleto ang 25 milyong doses na in-order ng pamahalaan sa China, ayon sa pahayag ni Philippine Ambassador to China Jose Santiago ‘Chito’ Sta. Romana ngayong araw, Marso 27.

Aniya, “After that, every month, ang plano ng gobyerno is roughly one to two million doses every month from Sinovac for a total of 25 million by the end of the year.”

Nauna nang dumating ang donasyong 600,000 doses ng Sinovac noong Pebrero at sinundan ng 400,000 doses nitong ika-24 ng Marso.

Inaasahan namang darating sa Lunes ang biniling 1 milyong doses na bakuna upang iturok sa mga frontliners at mga susunod na prayoridad sa listahan.

Bukod dito, mahigit 525,000 doses ng AstraZeneca na rin ang dumating sa bansa.

Sa ngayon ay Pfizer-BioNTech, Sputnik V, AstraZeneca at Sinovac pa lamang ang mga bakunang aprubado ang emergency use authorization (EUA).

Donasyong 400,000 doses ng Sinovac, dumating na sa ‘Pinas

ni Mary Gutierrez Almirañez | March 24, 2021

Lumapag na sa Ninoy Aquino International Airport (NAIA) ang eroplano ng Philippine Airlines (PAL) dala ang donasyong 400,000 doses ng Sinovac COVID-19 vaccines mula sa China ngayong Miyerkules, Marso 24, pasado 7:21 nang umaga.

Matatandaang ika-28 ng Pebrero nu’ng dumating sa bansa ang unang batch ng Sinovac na may 600,000 doses na kaagad ding ipinamahagi sa mga referral hospital upang masimulan ang vaccination rollout kinabukasan.

"Today we are happy to have the second batch," giit pa ni Chinese Ambassador to the Philippines Huang Xilian. "We hope we will contribute to speed up the mass vaccination in this country so that we will win over the war against the virus and recover the economy."

Kabilang sa mga sumalubong sa ikalawang batch ng Sinovac ay sina Department of Health Secretary Francisco Duque III, Vaccine Czar Carlito Galvez Jr. at Senator Bong Go.

Paliwanag pa ni Go, "This is another major milestone to us since the supply of vaccine is very limited and we have to inoculate 1.7 million medical frontliners and we have to meet our target this year in order to attain herd immunity."

Ngayong buwan ay inaasahan ding darating sa bansa ang biniling 1 milyong doses na bakuna mula sa China.

400 K doses ng Sinovac, kukunin ng PAL sa China

ni Mary Gutierrez Almirañez | March 23, 2021

Lilipad na patungong Beijing, China ang Philippine Airlines (PAL) B777 mamayang gabi, Marso 23, para kunin ang 400,000 doses ng Sinovac COVID-19 vaccines at inaasahan na makakabalik ito sa Ninoy Aquino International Airport Terminal 2 bukas nang umaga, Marso 24.

Ayon pa sa PAL, "This will be a milestone flight for PAL as it marks the flag carrier's first airlift of COVID-19 vaccines to Manila from an international hub."

Sa huling tala ng Department of Health (DOH) ay umabot na sa 336,656 healthcare workers ang nabakunahan kontra COVID-19.

Matatandaang unang dumating sa bansa ang 600,000 doses ng Sinovac at sinundan ito ng 525,600 doses ng AstraZeneca mula sa COVAX facility.

Sa ngayon ay tuluy-tuloy ang operasyon ng 1,623 vaccination sites sa loob ng 17 rehiyon, ayon kay Health Undersecretary Maria Rosario Vergeire.