500,000 doses ng Sputnik V, parating na sa 'Pinas

ni Mary Gutierrez Almirañez | April 13, 2021

Dalawampung milyong doses ng Sputnik V COVID-19 vaccines ang binili ng ‘Pinas sa Russia Gamaleya Institute at inaasahang darating na sa bansa ngayong Abril ang paunang 500,000 doses na nakalaan para sa mga senior citizens, ayon kay Vaccine Czar Carlito Galvez, Jr..

Aniya, "Puwede po siyang gamitin po sa elderly, so from 18 and above. So 'yun po ang gagamitin namin at 'yun po ang maganda dahil at least in the absence of AstraZeneca… Considering na ang nakikita natin na maganda ang production ng Russia and at the same time, they are supporting only the developing countries.”

Sa kabuuang bilang ay 3,025,600 doses ng bakuna na ang dumating sa bansa, kung saan 2,500,000 ay mula sa Sinovac at ang 525,600 ay galing sa AstraZeneca.

Tiniyak naman ni Galvez na darating ‘on time’ ang 20 million doses ng Sputnik V sa loob lamang ng apat na buwan. Nilinaw din niyang mapipirmahan na ngayong linggo ang supply agreement upang masimulan ang distribusyon.

Sa ngayon ay 1,007,356 indibidwal na ang nabakunahan ng unang dose kontra-COVID-19, habang 132,288 naman ang nakatanggap na ng second dose.

Sa kabuuan, tinatayang umabot na sa 1,139,644 ang lahat ng nabakunahan sa bansa o mahigit 0.19% na target mabakunahan ng Department of Health (DOH).

2nd dose ng AstraZeneca, ‘di na ituturok sa Australia

ni Mary Gutierrez Almirañez | April 12, 2021

Nilinaw ng Food and Drug Administration (FDA) na wala pang naiulat na nakaranas ng blood clot sa bansa matapos mabakunahan ng AstraZeneca kontra COVID-19, ayon sa panayam kay FDA Director General Eric Domingo ngayong Lunes nang umaga, Abril 12.

Aniya, "So far po, ang ating National Adverse Events Following Immunization Committee, sumulat kahapon na wala naman daw na any cases reported ng blood clotting na connected sa bakuna dito sa atin."

Samantala, inianunsiyo naman ng Prime Minister ng Australia na si Scott Morrison sa kanyang Facebook post na hindi na nila ituturok ang second dose ng AstraZeneca sa mga una nitong nabakunahan dahil sa banta ng blood clot, bagkus ay inirerekomendang gamitin na lamang ang gawa ng Pfizer.

Ayon kay PM Morrison, “The Government has also not set, nor has any plans to set any new targets for completing first doses. While we would like to see these doses completed before the end of the year, it is not possible to set such targets given the many uncertainties involved.”

Batay din sa orihinal na plano ng Australia, tinatarget nilang mabakunahan ang buong populasyon ng bansa sa katapusan ng Oktubre, kaya dinoble nila ang pag-order sa bakunang Pfizer.

“At the end of this past week, it’s also important to note that more than 142,000 doses have been administered to our aged care residents, in more than 1,000 facilities, with over 46,000 of these now being second dose in over 500 facilities,” sabi pa ni PM Morrison.

Sa ngayon ay wala pa ring suplay ng AstraZeneca na dumarating sa ‘Pinas, gayunman patuloy pa ring binabakunahan ang mga senior citizens gamit ang Sinovac kontra COVID-19.

Paliwanag pa ni FDA Director Domingo, "Hindi naman natin itinigil sa senior citizen. Sabi lang natin, 'yung 59 and below, tingnan muna natin ang datos para lang may complete information ang magbabakuna at babakunahan."

COVID-19 vaccine, 'di agad-agad tatalab — DOH

ni Mary Gutierrez Almirañez | April 10, 2021

Nilinaw ng Department of Health (DOH) na walang kinalaman ang bakuna kontra COVID-19 sa mga taong nagpopositibo pa rin sa virus matapos mabakunahan, ayon sa pahayag ni DOH Undersecretary Maria Rosario Vergeire.

Aniya, "Hindi po dapat mabahala ang public regarding this matter. Kailangang maintindihan natin ang sitwasyon. Sa pag-a-analyze namin ng datos ng mga nagkakaroon ng COVID-19 ay nakikita po natin na the persons were already incubating during the time they were vaccinating."

Kaugnay ito sa namatay na miyembro ng Manila Police District dahil sa COVID-19, ilang araw matapos mabakunahan ng Sinovac.

Iginiit ni Vergeire na hindi dapat katakutan ang mga bakuna, partikular na ang bakunang gawa ng China sapagkat dumaan 'yun sa masusing pag-aaral ng mga eksperto.

"Kailangan nating alalahanin na ang full effect ng bakuna ay makukuha natin mga 3 to 4 weeks after you get your second dose. Halimbawa, nakakuha kayo ng first dose, hindi pa ganoon kataas ang antibody tighter natin to give or to receive the full protection of the vaccine," paliwanag pa niya.

Matatandaang pinayagan na ring iturok ang Sinovac sa mga senior citizens mula noong naubos ang supply ng AstraZeneca sa ‘Pinas.

Kamakailan lang din nang suspendihin sa ibang bansa ang pagbabakuna gamit ang AstraZeneca COVID-19 vaccines dahil sa hinihinalang blood clot na adverse event na ikinasawi ng ilang nabakunahan nito.

Sa ngayon ay posibleng dalawang linggo pa ang hihintayin bago muling irekomenda ng World Health Organizations (WHO) ang AstraZeneca sa publiko.