No vaccine, no ayuda, pambu-bully sa mahihirap — Hontiveros

ni Mary Gutierrez Almirañez | May 19, 2021

Pinalagan ni Senator Risa Hontiveros ang rekomendasyon ni Presidential Spokesperson Harry Roque na i-require munang magpabakuna kontra COVID-19 ang Pantawid Pamilyang Pilipino Program (4P’s) beneficiaries bago sila bigyan ng ayuda o financial aid.

Aniya, “Hindi dapat binu-bully ang publiko para magpabakuna. Kaunting galang at respeto naman sa mga mahihirap. Walang kondisyon sa 4Ps law na kailangan, vaccinated ang recipients.”

Dagdag pa ni Hontiveros, “Imbes na pananakot, incentives ang dapat na ialok sa publiko para sila ay magpabakuna. Tulad halimbawa ng grocery packs o kaya naman ay paid vacation leave.”

Kaugnay ito sa sinabi ni Harry Roque patungkol sa 4P’s beneficiaries kamakailan.

Ayon pa kay Roque, “Ang daming nakikinabang sa programa na ‘yan at kapag naisama sa condition na ‘yan ay maraming mababakunahan lalung-lalo na sa hanay ng mga mahihirap.”

Matatandaan namang pinaboran ni Pangulong Rodrigo Duterte ang rekomendasyon na gawin na ring prayoridad sa vaccination rollout ang mga mahihirap.

Pinoy galing India, bawal na rin sa ‘Pinas

ni Mary Gutierrez Almirañez | April 28, 2021

Hinimok ni Senator Risa Hontiveros ang Department of Health (DOH) at Inter-Agency Task Force on Emerging Infectious Diseases (IATF) na maglabas ng guidelines hinggil sa ‘automatic travel ban’ na ipinatutupad ng bansa sa mga biyaherong galing India dahil sa lumalaganap na kaso ng COVID-19.

Aniya, “Kesa mangolekta tayo ng COVID-19 variants, dapat matagal nang naglatag ng protocols at guidelines ang IATF sa pag-impose ng mga automatic travel ban base sa mga findings ng ibang bansa na available naman sa publiko.”

Dagdag pa niya, “Laging napakabagal kundi last minute ang desisyon. Kaya lahat na ng COVID variants sa mundo ay kumakalat na rito sa Pilipinas. 'Wag naman tayong maging welcoming committee ng bagong variants.”

Kaugnay ito sa pagbabawal ng ‘Pinas na makapasok sa bansa ang mga biyaherong galing India, buhat nang maitala sa nasabing bansa ang 350,000 na nagpositibo sa COVID-19 sa loob lamang ng isang araw, kung saan maging ang Indian variant ay laganap na rin sa halos 17 na bansa.

“Walang kalaban-kalaban ang mga bata sa double-mutation na ito, ni hindi sila puwedeng mabakunahan. May mga taong nakahiga na sa daan sa labas ng ospital. Are these not concerning to the Health Secretary? Hihintayin pa ba natin matulad sa India?” dagdag ni Hontiveros.

Sabi pa niya, “We should have learned from the very first COVID-19 cases of 2020, who were all travelers from China, that travel bans make all the difference. As long as COVID-19 is around, we have to remain vigilant and act fast.”

Samantala, maging ang mga Pinoy galing India ay pinagbabawalan na ring makapasok sa bansa, ayon kay Department of Health (DOH) Undersecretary Maria Rosario Vergeire.

Paliwanag pa ni Vergeire, “Napagdesisyunan that even our fellow Filipinos, hindi muna natin papapasukin for this temporary period. This is just so that we can be able to ensure na ma-guard natin ‘yung borders natin.”

Sa ngayon ay lumagpas na sa isang milyon ang kaso ng COVID-19 sa bansa, kung saan 71,675 ang active cases mula sa 7,204 na nagpositibo kahapon.

Pagpapalayas sa mga barko ng China sa WPS, oks kay Hontiveros

ni Mary Gutierrez Almirañez | April 14, 2021

Suportado ni Senator Risa Hontiveros ang pagpapatawag ng Department of Foreign Affairs (DFA) kay Chinese Ambassador to the Philippines Huang Xilian upang iutos na alisin nito ang mga illegal Chinese vessels na namamalagi sa Julian Felipe Reef na sakop ng West Philippine Sea.

Ayon sa pahayag ni Sen. Hontiveros ngayong Miyerkules, "I laud the Department of Foreign Affairs for summoning Chinese Ambassador Huang Xilian and taking him to task with regard to the escalating tensions in the West Philippine Sea."

Dagdag pa niya, "I thank the DFA for stressing our 2016 Hague victory and for making it clear, directly to the Ambassador that China’s sweeping territorial claims are without legal basis."

Batay naman sa opinyon ng ilang eksperto, ang pagdagsa ng mga Chinese vessel sa West Philippine Sea ay paraan ng China upang ipitin si Pangulong Rodrigo Duterte para huwag na nitong ituloy ang relasyon ng 'Pinas sa Amerika.

Samantala, nilinaw naman ng Palasyo na walang isusukong teritoryo ang Pilipinas.