Opisyal ng Pharmally na umamin sa anomalya, hindi na makontak

ni Jasmin Joy Evangelista | September 27, 2021

Hindi na makontak ng Senate blue ribbon committee si Krizle Mago, ang opisyal ng Pharmally Pharmaceutical Corp. na umaming sini-swindle ng kompanya ang gobyerno sa pamamagitan ng pagbebenta ng mga "substandard" na medical supplies.

Ito ay ipinahayag ni Sen. Richard Gordon, chair ng komite, sa isang Twitter post.

Batay sa timeline na inilabas ng senate blue ribbon committee, hiningi ng komite noong Biyernes ang address ni Krizle Mago matapos nitong aminin ang "swindling."

Sumagot ito at sinabing makikipag-usap siya sa komite matapos ang hearing.

Ngunit nang i-follow up ng Senado ang lokasyon ni Mago, hindi na ito ma-contact.

Bukod pa sa pagbebenta ng substandard medical supplies, inamin din ni Mago na pinapalitan nila ang expiration date sa mga face shields.

Iginiit ni Mago sa hearing na siya ay makikipagtulungan sa imbestigasyon at inalok naman siya ng mga senador ng proteksiyon pero sinabing pag-iisipan muna ito.

Sinabi naman ni Sen. Risa Hontiveros na umaasa siyang sapat ang weekend para pagnilayan ni Mago ang alok na proteksiyon ng Senado.

“Marami ang nagri-reach out sa kanya dahil concerned kami sa kanyang well-being dahil parang siya'y naging o maaring maging whistleblower," ani Hontiveros.

Dalangin umano ni Hontiveros na ligtas si Mago at bukas pa ring makipagtulungan para sa katotohanan.

Pinagkunan ng medical supplies ng Pharmally… Green Trends execs nagbigay ng pekeng address sa Senado

ni Jasmin Joy Evangelista | September 25, 2021

Lumalabas na puro peke ang mga address ng mga opisyal ng kompanyang Green Trends na inimbitahan ng Senate Blue Ribbon Committee sa imbestigasyon sa umano'y maanomalyang pagbili ng PPEs noong 2020, ayon kay Rodolfo Quimbo ng Office of the Senate Sergeant-At-Arms (OSAA).

Kabilang sa mga pinadalhan ng subpoena ng Senado sina Raffy Barcina, Andres Aquino, Ryan Escano, Carlo Agustin, at Jayson Espino na mga opisyal ng Green Trends Trading.

Sa report ni Rodolfo Quimbo ng Office of the Senate Sergeant-At-Arms (OSAA), lumalabas na puro peke ang mga address ng mga ito.

“The subpoena addressed to Aquino, Escano, Barcinas, the OSAA said that all addresses are all fictitious. The certification was issued by Punong Barangay Maria Teresa Montalbo stating that the said addresses and Green Trends does not exist in their barangay," ani Quimbo.

Rehistrado naman daw sa Securities and Exchange Commission ang pangalan ng mga ipinatawag na resource persons subalit hindi totoong address ang mga idineklara ng mga ito sa SEC.

Ang Green Trends ang isa sa mga pinangalanan ni Linconn Ong ng Pharmally na pinagkuhanan nila ng medical supplies para mai-deliver ang order ng PS-DBM.

Sa pagdinig ng Senado, lumalabas na ang Green Trends ang kinuhanan ng supply ng TigerPhil bago nakarating sa Pharmally ang medical supplies na idineliver nito sa PS-DBM.

Dahil dito, iniutos ni Senate Blue Ribbon Committee chairman Sen. Richard Gordon na ipaaresto na rin ang mga ito at padaluhin sa susunod na hearing.

Opisyal ng Pharmally, ililipat sa Pasay City Jail

ni Jasmin Joy Evangelista | September 25, 2021

Iniutos ni Blue Ribbon Committee Chairman Senator Richard Gordon na tuluyan nang dalhin si ang opisyal ng Pharmally Pharmaceutical Corporation na si Linconn Ong sa Pasay City Jail at doon ikulong.

Ito ay matapos mapuno ng mga mambabatas sa patuloy na pag-iwas at pagsisinungaling umano ni Ong.

Sa ngayon ay nasa kustodiya ng Senado si Ong matapos patawan ng contempt at ipaaresto ng Senado dahil din sa pagiging mailap sa mga tanong ng mga mambabatas.

“Pagod na rin ako eh, the Chair orders upon motion of Senator Lacson, Drilon, Hontiveros and Pangilinan as approved by the Senate President… Chair orders the Sergeant-at-arms transfer this man to Pasay City Jail,” utos ni Gordon.