Paalala na muling mag-rosaryo araw-araw kasama ang mga kapatid

ni Seigusmundo Del Mundo - @Panaginip, salamin ng inyong buhay | February 2, 2021

Salaminin natin ang panaginip ni Arlene na ipinadala sa Facebook Messenger.

Dear Professor,

Gusto kong malaman ang ibig sabihin ng mga panaginip ko tungkol kay Mama Mary. Sa panaginip ko, pumunta ako sa isang grotto at nandu’n ang malaking rebulto ni Mama Mary. Habang nakaluhod ako, narinig kong may sinasabi Siya, pero hindi ko maintindihan dahil maingay ang mga tao na nagse-selfie. Bawal sa lugar na ‘yun ang mag-ingay, kaya naisip ko bakit kaya maiingay sila? At nang matahimik na, narinig ko na rin si Mama Mary, sabi Niya, magdasal ako ng rosary tuwing bago ako matulog. Paulit-ulit ‘yun, halos every day, napanaginipan ko ‘yung ganu’ng sitwasyon, kasi noon, nagdarasal kaming magkakapatid bago matulog dahil ‘yun ang itinuro sa amin ng lola namin. Wala na kaming nanay dahil nagkasakit siya at namatay, 16-anyos ako noong namatay si mama at tatlong magkakapatid kami, dalawang babae at isang lalaki.

Ano ang mensahe ni Mama Mary sa panaginip ko?

Naghihintay,

Arlene

Sa iyo, Arlene,

Tama ka, may mensahe nga para sa iyo si Mama Mary at ito ay nagsasabing magdasal ka ng rosary bago matulog. May dahilan ang lahat ng bagay at kaya pinagdadasal ka ni Mama Mary ay dahil sa panahon ngayon o sa mundo ng mga millennial, halos wala nang nagdarasal bago matulog.

Sabi nga, ang mundo sa panahon ng mga millennial ay sobrang maunlad, kumbaga, malayo na ang narating ng tao kaya ayon sa kanila, ngayon ang panahon ng “Golden Age of Knowledge.”

Pero sa totoo lang, ito ay sa biglang tingin lang, kumbaga, sa malalim na pagsusuri, ang mga tao sa panahon ngayon ay hindi naman naging sobrang engot, pero humina nang husto ang kanilang pag-iisip. Noong hindi pa uso ang mga gadgets, lalo na ang mga cellphone, ang mga tao ay matalas ang memorya kumpara ngayon na nakaasa na lang sa gadgets.

Kapag matalas ang memorya ng tao, siya ay masasabing matalino. Noon, ang mga number ng phone ay kabisado ng mga tao kahit gaano pa karami ang kanilang contacts. Ngayon sa totoo lang, kahit ang sariling number ay hindi na minememorya dahil naka-save naman sa cellphone.

Kaya ang mga makabagong gamit ngayon ay malungkot mang sabihin, pero they retard the memory process. Dahil dito, sa bandang huli, darating ang panahon wala nang magmememorya o magkakabisa dahil ang lahat ay naka-save na sa dala-dalang gadget.

Gayunman, mahirap nga lang paniwalaan, pero ito ay alam ng mga siyentista na ang utak ng tao liliit nang liliit dahil ang bahagi na ginagamit sa pagmemorya ay hindi na gagana at tuluyan na ring mawawala.

Ang isa pang mahirap paniwalaan, pero isang katotohanan ay bibihira na rin ang nagdarasal. Marami ang aangal dahil sasabihin nilang nagdarasal sila, pero ang totoo, ang dasal ng mga tao ngayon ay hindi naman talaga prayers kundi ang totoo nito ay mga sari-saring request lang. Oo, mga hiling na pangkatawan o makamundong bagay.

Ang nakatutuwa pa sa tao, nagre-request o nagdarasal lang kapag sila ay may problema at pangangailangan o kapag may sakit na iniinda at kapag sila ay iniwan ng kanilang mga karelasyon.

Kaya sabi ni Mama Mary sa iyong panaginip at ayon din naman sa iyo ay paulit-ulit na almost every day ay napapanaginipan mo, simulan mo na ulit ngayon ang pagdarasal kay Mama Mary.

At sa panahong ito ng pandemya, tunay ngang mas maganda kung hikayatin mo ang mga kakilala mo, lalo na ang mga ulila na tulad n’yong magkakapatid na mag-alay ng mga panalangin kay Mama Mary.

Mas maganda at magiging epektibo kung magsasama-sama kayo sa isasagawa n’yong sabayang pagdarasal ng Santo Rosario.

Hanggang sa muli,

Professor Seigusmundo del Mundo

Kahulugan ng namatay ang erpat na retired pulis

ni Seigusmundo Del Mundo - @Panaginip, salamin ng inyong buhay | February 1, 2021

Salaminin natin ang panaginip ni Ariel na ipinadala sa Facebook Messenger.

Dear Professor,

Isang retired police ang tatay ko at kareretiro lang niya ngayong taon. Sa panaginip ko, kinausap ako ng nanay ko at sabi niya, “Wala na ang tatay mo, patay na!” Habang kausap ako ng nanay ko, inaayos niya ‘yung uniform ng tatay ko na isusuot niya. Pagkatapos nu’n, bigla kong binuksan ang TV at ipinakita sa balita na wala na ang tatay ko. Nakahiga siya sa kalsada habang hawak ng pulis na nag-iimbestiga ang kanyang ulo.

Sa totoo lang, natatakot ako tuwing umaalis siya dahil ‘yung namatay niyang kaibigan na pulis din ay pinatay noong nakaraang taon. Kinausap niya ang tatay ko na may death threat silang dalawa noong nakaraang buwan lang. Kaya hindi naalis sa akin ang kaba at masagi sa isip ko na baka mawala ang tatay ko, lalo na’t marami kaming kaaway sa lupa, na inaangkin ng ibang tao na hindi purong taga-rito sa amin.

Sana ay mabigyang-linaw n’yo ang panaginip kong ito upang mawala na ang takot ko. Maraming salamat!

Naghihintay,

Ariel

Sa iyo, Ariel,

Alam mo, ang kadalasang laman ng panaginip ay ang mga alalahanin, pangamba at takot ng nanaginip.

Sa ganitong katotohanan, makikitang normal na mapanaginipan mo ang iyong ama na patay na dahil sa totoong buhay pala ay may death threat silang dalawa ng namatay niyang kaibigan.

Ipanatag mo ang iyong kalooban dahil ang mga alalahanin, pangamba at takot ng isang tao ay hindi naman nagkakatotoo. Dahil ang totoo, iho, ang alalahanin, pangamba at takot ay nasa isip lamang.

Mas maganda sa tao ang mabuhay nang positibo kung saan ang inaasikaso ay ang kanyang mga pangarap, ambisyon at magandang kinabukasan, kaya sa ganito dapat umikot ang iyong mundo.

Ang mga negatibong bagay ay dapat tanggapin nang maluwag sa loob dahil normal lang din naman na ang Haring Araw ay namamaalam sa dapit-hapon, pero masayang bumati ng bagong umaga sa bukang-liwayway.

Ilagay mo sa iyong isip na auman ang mangyari sa tatay mo, kagustuhan ng langit ang matutupad at masusunod sa dakong huli. Sa ganitong paraan, mapapanatag ka na.

Hanggang sa muli,

Professor Seigusmundo del Mundo

Dalawang malaking kalabaw, pahiwatig na parating ang masaganang buhay

ni Seigusmundo Del Mundo - @Panaginip, salamin ng inyong buhay | January 31, 2021

Salaminin natin ang panaginip ni Lawrence na ipinadala sa Facebook Messenger.

Dear Professor,

Ang panaginip ko ay dalawang malaking kalabaw. Ano ang kahulugan nito?

Naghihintay,

Lawrence

Sa iyo, Lawrence,

Kung magbabalik-tanaw tayo sa kahulugan ng baka o cow sa panaginip na ibinahagi sa atin mismo ng Banal na Kasulatan o Bible, ang baka ay kasaganaan ang kahulugan. Para mas malinaw, muli nating talakayin ang nakasulat sa Bible.

May isang pastol ng mga tupa na nabuhay sa Israel at ang kanyang pangalan ay Joseph. Bagama’t tagapagpastol siya ng mga tupa, ayon sa nasusulat, siya ay mahilig matulog, kumbaga, tulog lang siya nang tulog, kaya binansagan siya ng kanyang mga kapatid at nakakakilala sa kanya na “Joseph, the Dreamer.”

Dahil tulog siya nang tulog, kinainisan siya ng kanyang mga kapatid at siya ay inihulog sa isang malalim na balon, pero may nakapulot sa kanya at siya ay kinupkop. Hindi na siya nakita ng kanyang mga kapatid at inakala nilang si Joseph ay patay na.

Parang totoong-totoo ang kuwento sa Bible, hindi ba? Dahil kahit naman ngayon, ang kapatid na tulog nang tulog ay kinaiinisan ng kanyang mga kapatid. Hindi nga lang alam ng tulog nang tulog na ang panalangin ng kanyang mga kapatid ay bangungutin siya dahil wala namang silbi ang ganu’ng klase ng kapatid.

Sa paglipas ng maraming taon, ang Hari sa Ehipto ay nanaginip ng pitong baka na mataba at pitong baka na payat. Nagbalita ang Hari na kung sino ang makakapag-interpret ng panaginip niya ay bibigyan niya ng regalo at patitirahin sa palasyo.

Napakaraming pumunta sa Hari na nagsasabing marunong silang mag-interpret ng panaginip, kumbaga, napakaraming nagsasabing sila ay dream interpreter pero sila lang din naman ang nagdeklara nu’n.

Silang lahat ay naputulan ng ulo dahil nakahalata ang Hari na hindi naman sila tunay na bihasa sa pag-aanalisa ng mga panaginip. Kaya sa sobrang inis ng Hari at sa kanyang labis na frustration, ipinahanap niya si Joseph, the Dreamer dahil sa nickname pa lang ni Joseph ay naintriga na agad ang Hari.

Nang magharap na ang Hari at si Joseph, nakiusap sa kanya ang Hari na ipaliwanag sa kanya ang kahulugan ng pitong baka na mataba at pitong baka na payat.

Sinabi ni Joseph nang diretsahan sa Hari na ang pitong baka na mataba ay pitong taon ng masaganang ani at ang pitong baka na payat ay pitong taon ng taggutom, at nangyari nga! Nagkaroon ng pitong taong kasaganaan at pagkatapos nito ay pitong taon ng taggutom.

Ikaw, hindi ba, ang napanaginipan mo ay dalawang kalabaw na matataba? Ibig sabihin, dalawang taon na masaganang buhay ang mapasasaiyo— ito ang sinasabi ng kapalaran mo na mangyayari sa buhay mo sa malapit na hinaharap.

Hanggang sa muli,

Professor Seigusmundo del Mundo