Babala na maii-scam ‘pag naniwala sa mabilisang pagpapayaman

ni Seigusmundo Del Mundo - @Panaginip, salamin ng inyong buhay | February 5, 2021

Salaminin natin ang panaginip na ipinadala ni Emma sa Facebook Messenger.

Dear Professor,

Sa panaginip ng asawa ko, nakauwi na siya rito sa ‘Pinas. Nang pupuntahan niya kami, tinawag siya ng kaklase niya noong elementary na pulis na ngayon at nagpabunot siya at sinabing, “May mapapanalunan ka. Puwede kang manalo ng white gold.” Sumagot siya ng, “Sige, P100, ibibigay ko sa iyo ang panalo ko.” Inabot ng mister ko ang P100 at sabi niya, nanalo kami. Sa 5 bunot, 4 ang nakuha namin.

Nagulat siya dahil ang napanalunan niya ay mga ipit na pambabae, tapos hindi niya na ‘yun kinuha dahil pakiramdam niya ay niloko siya dahil ang usapan ay gold ang mapapanalunan. Tapos may lumapit sa kanyang 2 Chinese na babae na bumibili ng pampasuwerte sa nagtitinda raw ng ginto at ‘yung isa ay parang bling-bling na korona at may dragon na design ‘yung kuwitas. ‘Yung isa ay pulseras na dragon ang design. Biglang lumapit ‘yung matandang Chinese, kinuha niya ang tatlong pampasuwerte at pinagdikit-dikit niya at naging maliit na tigre, kasing-laki ng aso na bagong panganak, pero tigre siya dahil orange, black at white ang kulay. Nagulat ang mister ko dahil ibinigay ‘yun sa kanya. Ano ang ibig sabihin nito?

Naghihintay,

Emma

Sa iyo, Emma,

Masasalamin sa kanyang panaginip na nananabik ang asawa mo na makauwi. Kumbaga, gustung-gusto na niyang makapiling ka. Para siyang nagmamadali at hindi makapaghihintay pa na muli kang makita.

Kitang-kita rin na ang pangunahing pangarap niya ay umasenso kayo, as in, gumanda ang buhay n’yo. Gayunman, ang babala ng kanyang panaginip ay nagsasabing huwag na huwag kayong matutukso sa mabilisang pagpapayaman dahil puwede kayong mai-scam o maloko ng malaking halaga.

Kaya ingatan n’yong makipagsapalaran sa mga nag-aalok ngayon kung saan sinasabing madali lang kumita o yumaman, pero sa huli ay scam pala.

Muli, gustung-gusto ng mister mo na kayo ay umasenso. Nasa kanyang panaginip ang susi ng inyong pagyaman. Oo, iha, wala sa mabilisang pagpapayaman kundi nasa maliit na negosyo hanggang sa lumaki ito nang lumaki. Ito rin ang simbolo ng maliit na tiger sa kanyang panaginip

Dagdag pa rito, alam mo, Emma, sa mga Tsino, ang simbolo ng business empire ay tiger kaya muli, mula sa maliit ay magiging malaking-malaking negosyo ang tiyak na maitatayo n’yong mag-asawa.

Hanggang sa muli,

Professor Seigusmundo del Mundo

Pahiwatig na may kakayahang magbigay-babala sa mga tao kung may mangyayari sa mundo

ni Seigusmundo Del Mundo - @Panaginip, salamin ng inyong buhay | February 4, 2021

Salaminin natin ang panaginip ni Alona na ipinadala sa Facebook Messenger.

Dear Professor,

Naisipan kong sumangguni sa inyo dahil worried ako sa aking panaginip. Pagkatapos kong magdasal noong nakaraang buwan, nanaginip ako ng may malakas na bagyo at tsunami saka may tatamang bulalakaw sa mundo at kapag tumama ito, sapol na sapol ang ibabaw ng mundo.

Naghihintay,

Alona

Sa iyo, Alona,

May mga taong nabibiyayaan ng tinatawag na “apocalyptic dreams.” Sila ang mga nananaginip ng mangyayari pa lang at ang kanilang mga panaginip ay may kaugnayan sa magaganap sa mundo at sangkatauhan.

Sa biglang tingin, ikaw ay parang napabilang sa kanila. Gayunman, ang pagkakaroon ng bagyo ay natural na nangyayari sa buong mundo, lalo na sa ating bansa. Ang tsunami naman ay ganundin, hindi man kadalasan ay hindi nakapagtataka kapag nangyayari.

Ang mga bulalakaw ay araw-araw ding makikitang nahuhulog sa lupa. Marami sa kanila ay natutunaw bago sumayad sa mismong lupa, pero minsan ay hindi maiwasan na may maliliit na piraso na aktuwal na nahuhulog sa lupa.

Dahil sa maliliit hanggang sa sobrang maliit, hindi na sila nasasagap ng mga instrumento na nagbabantay sa mga bulalakaw na tatama sa lupa. Madalas, ang mga bahagi ng bulalakaw ay sa karagatan nahuhulog dahil ang dagat ay sa totoo lang, mas malawak kaysa sa kalupaan, kumbaga, dahil malawak ang tsansa na dagat ang makasapo nito.

Minsan, nahuhulog din ito sa kalupaan at ito ay parang bato sa tingin, pero sobrang tigas at may makikitang sunog na bahagi. At alam mo, iha, ang makapulot ng kahit isang maliit na piraso ng bulalakaw ay puwedeng yumaman dahil milyong piso ang halaga nito.

Muli, maaaring isa ka sa mga iilang mga tao na nabiyaan ng kakayahang makapanaginip ng mangyayari pa lang sa mundo. Gayunman, sa kuwento ng panaginip mo, walang nabanggit kung kailan o walang ipinahiwatig na palatandaan kung paano at kailan ito magaganap.

Ang mga taong ginagamit ng langit na managinip ng magaganap sa mundo ay may kalakip na responsibilidad na magbigay ng warning o babala para ang mga tao ay magbago o makapaghanda.

Dahil dito, sa kakapusan sa impormasyon ng iyong mga panaginip, hindi muna natin sasabihin na ito ay isang pabalita mula sa langit.

Huwag kang masiraan ng loob o mag-isip ng negatibo na ikaw naman pala ay hindi ginagamit ng langit para makapagbigay ng mahahalagang mensahe para sa mga tao. Kumbaga, hihintayin pa natin ang mga darating mong panaginip na maaaring mas malinaw kung kailan at paano ang mga pangyayari bago ang malakas na bagyo at tsunami at ang pagbagsak ng bulalakaw sa mundo.

Hanggang sa muli,

Professor Seigusmundo del Mundo

Sandals, pahiwatig na kailangang magpatuloy sa pagsisikap kahit pagod na

ni Seigusmundo Del Mundo - @Panaginip, salamin ng inyong buhay | February 3, 2021

Salaminin natin ang panaginip ni Stephanie na ipinadala sa Facebook Messenger.

Dear Professor,

Nais kong malaman kung ano ang ibig sabihin sinusuotan ng sapatos sa panaginip? Ganito ang nangyari, nakaupo ako at may lumapit sa akin, tapos isinuot niya sa akin ang sandals na kulay brown at itinali sa paa ko. Para siyang sandals na bukas sa bandang daliri at may tali.

Naghihintay,

Stephanie

Sa iyo, Stephanie,

Sa buhay ng tao, dumarating ang sandali na siya ay parang gusto nang huminto o huwag nang magpatuloy pa sa pagsisikap, kaya naman nais na niyang tumigil sa paghahanapbuhay. At minsan naman, siya ay parang pagod, sawa na at nawawalan ng sigla at pag-asa.

Ito ang dahilan kaya may vacation leave, day off o rest day kung saan ang tao ay tao lang na napapagod, nagsasawa at nababagot din.

Pero may mga tao na kahit pagod, sawa at bagot na bagot na, kailangan niyang

magpatuloy dahil sa iba’t ibang rason o dahilan, tulad ng mga sumusunod:

1. Hindi pa niya natutupad ang kanyang pangarap.

2. May umaasa sa kanya, maaaring ang kanyang mga magulang, kapatid at kadalasan ay ang kanyang mga anak. May mga pagkakataon pa nga na ang kanyang karelasyon o asawa ay magmumukhang kaawa-awa kapag ang nanaginip ay huminto na sa pagsisikap.

3. Minsan naman, ang pangit na sitwasyon sa place of work ang nagtutulak sa kanya para huminto na.

May iba pang dahilan, pero kapag bata pa naman ang isang tao, hindi papayag ang langit na huwag siyang magpatuloy. Sa ganitong katotohanan, sa iyong panaginip, ang nangyari nga ay lumitaw ang isang tao at isinuot sa iyo ang sandals na simbolo na kailangan mong magpatuloy.

Alam mo, iha, ang mahiwagang tao sa iyong panaginip ay walang iba kundi si Lord, siya ang may gusto na magpatuloy ka pa. Tatanggi ka ba? Siyempre, hindi!

Kaya anuman ang iyong sitwasyon ngayon sa buhay, huwag kang huminto at susuko. Sa halip, magpatuloy ka dahil si Lord mismo ang gagabay at papatnubay sa iyo, anuman ang iyong ginagawa at pinagkakaabalahan ngayon.

Hanggang sa muli,

Professor Seigusmundo del Mundo