Nagmamaneho sa panaginip, may kaugnayan sa sexual drive

ni Seigusmundo Del Mundo - @Panaginip, salamin ng inyong buhay | September 30, 2020

Salaminin natin ang panaginip ni Anne na ipinadala sa Facebook Messenger.

Dear Professor,

Napanagipan ko na ito two years ago, naalala ko lang dahil napanood ko ‘yung video niya. Kapareho niya ng built o pangagatawan ‘yung napanaginipan ko ngayon, tapos nagtaka ako dahil nag-Tagalog siya.

May isang lalaki na blurred ang mukha, nakasakay kami sa black Montero, pero siya ang nagda-drive at nasa backseat ako. Um-attend ako ng kasal, tapos sabi niya, hindi siya papayag na ikasal ako sa iba bago niya ako hinalikan. Tapos this year, may isang K-pop group akong hinahangaan, na-realize ko na parang ‘yung isang member ang nasa panaginip ko two years ago.

He’s wearing a white shirt underneath his leather jacket, siyang-siya ‘yun kahit medyo blurred. Pero hindi ko siya crush, ha? Guwapo siya pero ‘yung co-member niya ang crush ko.

Naghihintay,

Anne

Sa iyo, Anne,

Ang nakasakay sa sasakyan ay panaginip na may itinatagong kahulugan. Itinatago ito dahil hindi para sa lahat, lalo na sa mga kabataan at medyo maselan.

Dahil ang tunay na tinutukoy ng nakasakay sa sasakyan ay pakikipagtalik. Sa mga matured, ang pakikipagtalik ay normal lang, hindi naman ibig sabihin ay lahat ng matured ay naranasan na ito, bagkus, ito ay simpleng nagsasabi na nauunawaan na ng lahat ang kung ano ang pagtatalik.

Kaya naman ang ilang panaginip ay pagtatalik ang sinisimbolo dahil sa katotohanang sa pagtatalik, may salitang “sexual drive” at ang umaandar na sasakyan ay dina-“drive” rin.

May iba pang bagay na nasa pagmamaneho ng kotse at sexual drive, pero ang mga nasa itaas ay sapat na para maunawaan ang hiwaga ng iyong panaginip kung saan ang pagmamaneho ng sasakyan ay pagtatalik ang kahulugan.

Dahil dito, ayon sa iyong panaginip, ang dapat mong mapangasawa ay ang kaporma, kamukha, kaparehas ng pangangatawan at kahawig ng member ng K-pop group na napanaginipan mo.

Paano kung hindi ganu’n, kumbaga, iba ang napangasawa mo? Ang sagot ng iyong panaginip, dadayain mo ang iyong asawa at magkakaroon ka ng lihim na karelasyon na ang built ay katulad na nasa iyong panaginip.

Hanggang sa muli,

Professor Seigusmundo del Mundo

Nabubuhay sa kalungkutan, kahulugan ng panaginip na nasa Alice in Wonderland

ni Seigusmundo Del Mundo - @Panaginip, salamin ng inyong buhay | September 29, 2020

Salaminin natin ang panaginip ni Dianne na ipinadala sa Facebook Messenger.

Dear Professor,

Gusto kong malaman ang kahulugan ng aking panaginip. Sa panaginip ko, ako si Alice ng Alice in Wonderland. Ibang-iba ang hitsura ko dahil naka-dress ako at brown ang buhok ko. Basta palaging Alice in Wonderland ang tema ng panaginip ko.

Naghihintay,

Dianne

Sa iyo, Dianne,

Ang mga babae ay hindi puwedeng hindi ma-in love sa istorya ng Alice in Wonderland, pero ito ay nangyayari sa panahon ng kanilang kabataan, partikular na sa kanilang pagiging dalagita o papalapit na sa pagiging ganap na dalaga.

Nangyayari ito dahil ang babae ay ayaw umalis sa kanyang kabataan o pagkabata. Ito ay sa dahilan na nakikita niya sa kanyang kapaligiran na hindi maganda ang naging adult life. Maaaring nakita niya ang isa sa kanyang kakilala o malapit sa puso kung saan ang ganap nang dalaga ay naging malungkot lang. Gayundin, siya ay bigo sa buhay at alipin ng kahirapan at sunud-sunuran lang sa mga nasa paligid niya.

Maaaring nakita niya na rito pala sa ibabaw ng mundo, ang malakas ay naghahari at ang mahina ay inaabuso. Para sa kanya, ang mahina ay ang kababaihan.

Sa ganitong kaisipan na mabubuo sa kanyang pagkatao, gusto niyang takasan ang malupit na mundo na walang saya at puro lungkot lang ang nadarama.

Dahil gusto niyang tumakas, ang kanyang gustong mapuntahan ay ang Alice in Wonderland. Dito masasalamin sa iyong panaginip na nabubuhay ka sa kalungkutan, kaya tulad ng nasabi na, ang gusto mo ay ang mundo na mala-wonderland.

Kathang-isip lang ang wonderland dahil ang tunay na mundo ay ang reyalidad at ito ay may dalawang larawan. Ang una ay ang negatibo at ang isa pa ay ang positibong reyalidad.

Dahil dito, piliin mo ang positibong reyalidad dahil kapag ito ang iyong napili, ang dilim ay iyong pasasalamatan dahil ito ay manganganak ng bagong umaga.

Ang lungkot ay iyo ring pasasalamatan dahil kailangang malungkot nang mabigyang-daan ang maliligayang araw.

Muli, piliin mo ang positibong mundo at huwag mong yakapin ang negatibong mundo.

Hanggang sa muli,

Professor Seigusmundo del Mundo

Pinasok ang bahay, babala na panghihimasukan ang buhay

ni Seigusmundo Del Mundo - @Panaginip, salamin ng inyong buhay | September 27, 2020

Salaminin natin ang panaginip ni Aurea na ipinadala sa Facebook Messenger.

Dear Professor,

Napanaginipan ko na may pumasok sa bahay namin na hindi namin kilala. Sa tingin ko, magnanakaw siya, pero wala namang akong nakitang binubuksan niya. Tapos, sinigawan ko, pero natakot ako at naisip ko na baka patayin niya ako. Nang sinigawan ko siya, wala siyang reaksiyon.

Hanggang ngayon, iniisip ko pa rin ang aking panaginip. Tulungan n’yo ako na malaman ang kahulugan nito. Maraming salamat!

Naghihintay,

Aurea

Sa iyo, Aurea,

Alisin mo ang iyong pag-aalala at ang pangamba ay bawas-bawasan mo. Hindi naman maaalis na matakot ka, pero ang iyong panaginip ay simpleng nagsasabi na may manghihimasok sa buhay mo.

Sinu-sino ang puwedeng manghimasok sa buhay ng may buhay?

● Ang mas matanda sa iyo na akala ay may karapatan siyang makialam sa buhay mo. Halimbawa, ang mga tito, tita at iba pang kamag-anak.

● Ang magulang ay hindi mapabibilang dito dahil sila ay may karapatan na panghimasukan tayo.

● Ang kaibigan na akala ay mas magaling at maalam kaysa sa iyo, kaya siya rin ang kaibigan na maliit at mababa ang tingin sa iyo.

● Ang mga kaibigan ng ating mga kaibigan. Sila ‘yung kung makapagpayo, akala mo’y sobrang matatalino.

● Minsan ay ang mga kapitbahay na sa totoo lang ay likas na mapanghimasok sa buhay ng may buhay.

Isa sa kanila ang napanaginipan mo na ngayon ay makikitang nakikialam sa buhay mo.

Huwag mo silang awayin o agad-agad na lalayuan dahil silang lahat ay bahagi rin naman ng iyong pakikipagsapalaran sa mundong ito kung saan ang mga pakialamera ay hindi nawawala.

Hanggang sa muli,

Professor Seigusmundo del Mundo