Nerbiyos, totoong nararamdaman ng nanaginip na may sakit sa kidney at dapat operahan

ni Seigusmundo Del Mundo - @Panaginip, salamin ng inyong buhay | October 10, 2020

Salaminin natin ang panaginip ni Ronald na ipinadala sa Facebook Messenger.

Dear Professor,

Sumakit ang tiyan ko last week, tapos kagabi napanaginipan ko na may sakit ako sa kidney. Dinala ako ng misis ko sa ospital, tapos sabi ng doktor, may diperensiya ang kidney ko at kailangan akong operahan.

Hanggang ngayon, natatakot ako. Ano ang dapat kong gawin dahil hindi maalis sa isip ko ang aking panaginip?

Naghihintay,

Ronald

Sa iyo, Ronald,

Ang una mong gawin, magpatingin ka sa doktor nang malaman mo kung may diperensiya nga ang kidney mo. Kung panaginip mo lang ang ating pagbabasehan, wala kang sakit sa kidney at ang mayroon ay ang tinatawag na simple panic attack.

Kapag ang tao ay mahina ang loob, takot magkasakit at takot sa doktor, siya ay nenerbiyusin kahit nakaramdam lang ng hindi maganda sa katawan at ang masama pa sa ganito, siya mismo ang magbibigay ng sakit sa sarili niya at minsan ay grabe ang sakit na sinabi niya na mayroon siya.

Dahil simple panic attack ang sumaiyo, sa maniwala ka o hindi, ang isasagot sa iyo ng doktor ay wala kang sakit dahil ito ay nerbiyos.

Hanggang sa muli,

Professor Seigusmudo del Mundo

Malaking gamo-gamo, pahiwatig na magkaka-anak ang isa sa mga mahal sa buhay

ni Seigusmundo Del Mundo - @Panaginip, salamin ng inyong buhay | October 9, 2020

Salaminin natin ang panaginip ni Louie na ipinadala sa Facebook Messenger.

Dear Professor,

Nanghuhuli ako ng paruparo, ‘yung malaki at kadalasan na nahuhuli sa puno ng guyabano. May mga aso, pero biglang takot na takot nu’ng nakita ‘yung paruparo.

Nu’ng nahuli ko siya, bigla kong narinig ‘yung boses ni tatay, isinisigaw niya na bitawan ko ‘yung paruparo. Dama ko hanggang ngayon ‘yung takot.

Naghihintay,

Louie

Sa iyo, Louie,

Kaya ka natatakot ay dahil sa paniniwala ng mga Pinoy na ang paruparo ay madalas na kaluluwa ng namatay na dumadalaw o nagpapakita sa mahal niya sa buhay.

Marami ang nakadama ng takot sa ganu’ng pangyayari, pero kung lalaliman mo ang pag-iisip, mas magandang magpasalamat ang nakakita dahil dinadalaw ang mahal niya sa buhay. Kumbaga, malinaw na ikaw pala o ang dinalaw ay mahal ng namatay na, at ang hindi dinalaw ay puwedeng masabing hindi kabilang sa mahal ng namatay na.

Pero ang napanaginipan mo ay hindi paruparo o butterfly, ito ay ang isang malaking gamo-gamo o moth na maaaring Atlas Moth na nakikita sa bansa natin at sinasabing pinakamalaking moth sa buong mundo.

At dahil hindi butterfly ang nasa panaginip mo, hindi rin mangyayari ang sinasabi ng pamahiin nating mga Pinoy na ito ay kaluluwa ng namatay. Pero bakit narinig mo na biglang nagsalita ang iyong tatay at ang sabi, bitawan mo? Kaya sinabi ito ng tatay mo ay dahil ang moth ay mangingitlog at kung hindi mo ito bibitawan, hindi na siya makakapangitlog nang maayos. Pagtapos mangitlog ng moth, siya ay mamamatay na.

Sa ganitong paraan dumarami ang mga moth, kaya kung hindi makakapangitlog, kawawa naman ang moth, gayundin ang mga susunod na henerasyon ng mga tao dahil baka hindi na sila makakita ng malalaking gamo-gamo.

Kaya next time na may makita kang moth, hayaan mo lang. Ang kahulugan ng panaginip mong ito ay nagsasabing isa sa malapit sa iyo o maaaring ikaw mismo ay magkaroon na ng anak.

Hanggang sa muli,

Professor Seigusmudo del Mundo

Sabong ng gagamba, paalala na dapat maging kalmado pero palaban

ni Seigusmundo Del Mundo - @Panaginip, salamin ng inyong buhay | October 5, 2020

Salaminin natin ang panaginip ni Leroy na ipinadala sa Facebook Messenger.

Dear Professor,

Naglalaro ako ng sabong ng gagamba. Sa totoong buhay, noong bata ako, talagang nagsasabong ako ng gagamba laban sa mga kababata ko. Pero ngayong 28-anyos na ako, wala na sa isip ko ‘yun. Gayundin, wala namang gagamba rito sa amin. Ano ang ibig sabihin ng panaginip ko?

Naghihintay,

Leroy

Sa iyo, Leroy,

Ngayon ang panahon ng sabong ng gagamba dahil ang mga ito ay nasa todong-lakas at laki. Nangyari ito dahil nagsilaki na rin ang mga kulisap, at ito naman ang pagkain ng gagamba.

Pero ngayon ay wala nang gaanong gagamba sa mga probinsiya dahil napapatay sila ng insecticide na ginagamit ng mga magsasaka. Ang mga gagamba ay nasa malalayong lugar na walang gaanong sakahan o bukid na taniman ng palay at gulay.

Mas sikat ang sabong ng gagamba kaysa sabong ng mga panlabang lalaking manok. Ang sabong ng manok ay tuwing Linggo lang, pero ang sabong ng gagamba ay makikita mo sa iba’t ibang lugar sa mga bayan at barangay araw-araw.

Umaabot din ng libu-libong piso ang pusta sa sabong ng gagamba. Alam mo ba, Leroy, na dahil bawal ang cock fighting o sabong dahil sa COVID-19 pandemic, ang mga sabungero ay lumipat na sa sabong ng gagamba. Pero bawal din ang sabong ng gagamba, kaya lang may pinapayagan dito sa mga lokal na pamayanan dahil hindi rin naman malalaman ng mga awtoridad kung saang lugar ito ginagawa.

Sa mga kanto, puwedeng magsabong ng gagamba, pero puwedeng-puwede rin sa bahay, kaya mas mahirap kontrolin ang sabong ng gagamba kaysa sa sabong ng manok.

Ang panaginip mo ay nagsasabing kumuha ka ng aral sa buhay base sa mga kilos ng panabong na gagamba nang magtagumpay ka sa anumang layunin mo sa buhay.

Ang panlabang lalaking manok ay makikitang galit na galit at ang gusto ay patayin agad ang kalaban. Habang ang gagamba ay makikitang kalmado dahil pinag-aaralan muna kung kailan susugod at inaalam ang kahinaan ng kalaban.

‘Yan ang aral sa buhay na ang sabi ng panaginip ay alam mo rin naman dahil mahilig ka sa sabong ng gagamba. Isabuhay mo ito at hindi ka mabibigo.

Hanggang sa muli,

Professor Seigusmundo del Mundo