Pahiwatig na oras na para tutukan ang sariling kaligayahan

ni Seigusmundo Del Mundo - @Panaginip, salamin ng inyong buhay | February 14, 2021

Dear Professor,

Napanaginipan kong nasa probinsiya ako at parang plaza ang lugar. Kasama ko ang mama ko, tapos may nagbigay ng apat na piling ng saging na saba, ‘yung saging ay bagong tiba at magulang na talaga at masarap ilaga. Inuwi ko ‘yung saging at pagbalik ko, may nakita akong hinog na bayabas, kaso mataas kaya hinayaan ko na lang, pero malaking pomelo ang nakuha ko. Sinalat ko ang bandang ibaba ng pomelo para malaman ko kung nasa hustong gulang na, kaso malambot pa ang balat, kaya sabi ko, alanganin at hindi pa puwedeng buksan, tapos umuwi na ako.

May nadaanan akong ang tindahan ng RTW, tumingin ako ng damit na puwede kong isuot kaso puro pambata ang naroon. Nakausap ko ang may-ari at nag-suggest siyang pumunta sa bandang unahan dahil baka may magustuhan ako roon. Sinunod ko naman siya, pero puro bag ang nakadispley. ‘Yung tindera na nagbabantay du’n ay busy sa pag-asikaso sa lalaking customer na namimili ng alahas. Nasa likuran lang ako ng lalaki, tapos tingin lang nang tingin kasi hindi naman ako bibili. Ano ang ibig sabihin ng panaginip kong ito?

Naghihintay,

Nitz

Sa iyo, Nitz,

Ang ibig sabihin ng panaginip mo ay dumating na ang takdang araw para ikaw ay lumigaya. Kumbaga, hinog na ang panahon para unahin mo naman ang iyong personal na kaligayahan.

Maaaring may ilang umaasa sa iyo para sila ay mabuhay o may tinutulungan ka na akala mo ay kailangan ang tulong mo. Puwede ring may iba kang plano sa buhay, pero naisasakripisyo mo ang iyong personal na kaligayahan.

Dapat mo nang maisip na puwede ka ring makatulong sa ibang araw o panahon. Hindi naman dahil lang liligaya ka na ay hindi ka na makakatulong. Mahalin mo ang iyong kapwa, ito ang banal na utos na sinunod ng marami sa atin.

Pero hindi naman natapos sa “Mahalin mo ang iyong kapwa” ang naturang utos dahil may karugtong ito na, “tulad ng pagmamahal mo sa iyong sarili,” na nagsasabing unahin nating mahalin ang ating sarili nang sa gayun ay matupad natin nang maayos ang utos na mahalin natin ang ating kapwa.

Dahil kung uunahin nating mahalin ang ating kapwa, hindi natin magagampanan ang kakambal na utos na mahalin ang ating sarili.

Medyo mahirap maunawaan ang malalim na kahulugan ng pagtulong sa kapwa at puwede namang huwag mo nang pahirapan ang isip mo na makuha ang natatagong kahulugan. Ang mahalaga lang naman ay iyong malaman na ayon sa iyong panaginip ay muli, dumating na ang takdang mga araw para sa iyo upang asikasuhin mo naman ang personal mong kaligayahan.

Hanggang sa muli,

Professor Seigusmundo del Mundo

Pag-aasawang parating na at magiging masaya at pang-forever

ni Seigusmundo Del Mundo - @Panaginip, salamin ng inyong buhay | February 13, 2021

Salaminin natin ang panaginip ni Irish na ipinadala sa Facebook Messenger.

Dear Professor,

Napanaginipan kita kagabi na tinignan mo ang palad ko, tapos parang may nag-match sa kamay ng katabi mong lalaki na kasama natin sa isang lugar at sinabi mong, “Siya na pala ang mapapangasawa mo,” at mula noon ay naging mag-asawa kami.

Sa palagay n’yo, dahil nakapanaginip ako ng ganito, ibig sabihin ba ay makapag-asawa pa ako? May chance pa ba o wala na talaga? Maraming salamat!

Naghihintay,

Irish

Sa iyo, Irish,

Nakakatuwa ang panaginip mo dahil sinabi ko pala sa ‘yo na siya na ang mapapangasawa mo. Magkakatotoo kaya ‘yun?

Una, ayon sa iyong panaginip, hindi ka dapat mawalan ng pag-asa dahil ang panaginip ay nagmumula sa malalim na kamalayan ng isang tao. Napansin mo na ba ang salitang “kamalayan”? Ibig sabihin, “siya” o ang ating “kamalayan” ay may alam na hindi natin alam o may “malay” siya, pero hindi naman namamalayan ng ating sarili.

Kaya ang sinasabing “malay mo”, hindi ‘yun salitang parang walang kabuluhan dahil ito ay may pinanghuhugutan at ito ay talagang madalas na nagkakatotoo.

Sasabihin ko sana sa iyo ngayon na, “Malay mo, makapag-asawa ka pa,” eh baka naman pumasok sa isip mo na sobrang liit ng tsansang ikaw ay makapag-asawa, kaya hindi ito ang sasabihin ko sa iyo.

Ang sasabihin ko sa iyo ay ito: Sa panaginip mo na tiningnan ko ang iyong palad, ibig sabihin, ang tiningnan ko ay ang iyong kapalaran. Dahil ang bawat salita ay may salitang ugat at ibinabalita ko sa iyo na ang root word sa salitang “kapalaran” ay palad. Kaya kung gusto nating malaman ang ating kapalaran, simpleng-simple lang, eh ‘di tingnan natin ang palad mo.

Ano nga ba ang nakita sa palad mo, ayon sa iyong panaginip? Ano pa nga ba, kundi ang kapalaran mo.

Rito sa atin, ang tawag sa ating napangasawa ay kapalaran. Madalas, ‘yan ang bukambibig ng mga mag-aasawa kung saan ang kanilang asawa ay ang naging kapalaran nila. Dahil dito, malinaw na malinaw na ikaw ay makakapag-asawa at ang pag-aasawang ito ay hahantong sa maligaya at panghabambuhay na pagpapamilya.

Hanggang sa muli,

Professor Seigusmundo del Mundo

Dudang may relasyon ang mister at utol, pahiwatig na obserbahan ang asawa

ni Seigusmundo Del Mundo - @Panaginip, salamin ng inyong buhay | February 12, 2021

Salaminin natin ang panaginip ni Sarah Jane na ipinadala sa Facebook Messenger.

Dear Professor,

Ano ang ibig sabihin ng panaginip ko na mas maganda sa akin ‘yung kapatid ko? Tapos, malimit magtanong ang asawa ko tungkol sa kapatid ko. Nu’ng una, hindi ko binibigyan ng kahulugan, kaya lang, napapansin ko na palagi na lang siyang nagtatanong.

Gayundin, nakita ko ang aking asawa at kapatid na nasa mall at naglalaro sa kotse na hinuhulugan ng coins. Napapaisip na kasi ako, kaya sana ay masagot n’yo. Salamat!

Naghihintay,

Sarah Jane

Sa iyo, Sarah Jane,

Kahit naman sino ay mapapaisip sa mga kuwento mo na malimit magtanong ang iyong asawa tungkol sa kapatid mo. Pero ikaw ay mas mapapaisip talaga dahil napanaginipan mo na silang dalawa ay masayang magkasama sa mall. At kung idaragdag pa ang napanaginipan mo na mas maganda kaysa sa iyo ang iyong kapatid, mas malamang na buong araw ay magulong-magulo ang isip mo.

Kaya naman masasabing sa panahong ito ay pinaghaharian ka ng selos. Mainam na ang nagtatapat sa iyo dahil madalas, ang selos ay may katotohanan. Pero siyempre, hindi naman palaging ito ay tamang basehan.

Mas magandang obserbahan mo ang mga kilos at galaw ng asawa mo, gayundin ang inyong relasyon, kung siya ba ay nagbago o may mga pagbabago ba sa kanya.

At kung mas tumindi ang selos mo dahil sa resulta ng iyong pag-oobserba, narito ang puwede mong gawin:

• Huwag mo nang patirahin sa inyo ang kapatid mo kung sakaling siya ay kasama n’yo sa bahay.

• Huwag mong kalimutan na ang pinagseselosan ay wala namang kasalanan, maliban na lang kung siya mismo ang umakit sa asawa mo. Ibig sabihin, tanungin mo ang iyong sarili, mahilig ba talaga ang mister mo, kumbaga, siya ba ay babaero? Dito sa huli, wala kang dapat sisihin kundi ang iyong sarili dahil bakit siya pa ang pinili mong mapangasawa kung babaero pala siya? Pero ang isa sa lihim na katotohanan sa mga pag-aasawa ay hindi dapat sumobra sa kanyang mga kasalanan ang mister. Ito ay dahil posibleng magrebelde ang misis kung saan puwede siyang magkaroon ng lihim na karelasyon.

• Siyempre, masama ang ganu’n kaya huwag mong gagawin. Pero kapag nagkabistuhan na kayo, tiyak na siya ang magsisisi.

Kaya ang payo ay huwag mo nang hintayin pang lumala ang sitwasyon. Ang dapat at magandang gawin ay mapaglayo mo ang dalawa — ang iyong kapatid at mister dahil kung hindi ito mangyayari, tiyak na masisira ang buhay n’yong mag-asawa.

Hanggang sa muli,

Professor Seigusmundo del Mundo