Pahiwatig na totoo ang sinabi ng namatay na BFF sa panaginip

ni Seigusmundo Del Mundo - @Panaginip, salamin ng inyong buhay | October 30, 2020

Salaminin natin ang panaginip ni Mary Rose na ipinadala sa Facebook Messenger.

Dear Professor,

Napanaginipan ko ‘yung best friend ko at ang sabi niya, hindi kami bagay ng boyfriend ko. Pero sa totoong buhay, ang best friend ko ay 2 years nang patay.

Mahal ko ang boyfriend ko, pero napakalapit niya sa mga babae at nagseselos ako pero hindi ko lang ipinahahalata sa kanya. Ano ang masasabi n’yo sa panaginip ko?

Naghihintay,

Mary Rose

Sa iyo, Mary Rose,

Alam mo, ang mga patay ay buhay, kumbaga, buhay na buhay sila at madalas ay nagbibigay ng mensahe sa mga nasa lupa o mahal nila na buhay pa.

Kamakailan, laman ng mga balita ang isang namatay na binata at gagawing santo dahil may napagaling siya at ang nakakatuwa, isa na lang na pagpapagaling sa may sakit ay gagawin na siyang ganap na santo.

Ibig sabihin, ang gumaling sa sakit ay nagdasal sa nasabing binata at ang prayer sa kanya ay kanyang pinakinggan at ngayon ay wala nang sakit ang nagdasal sa kanya.

Bago maging ganap na santo, kailangan na dalawa o higit pa ang gumaling sa sakit na nagdasal sa namatay na.

Medyo masalimuot ang paliwanag, pero sapat na ang mga lumabas sa balita na ang mga patay ay buhay pa at puwedeng makapagpagaling sa may sakit na buhay o narito pa sa lupa.

Kaya ‘yung panaginip na sinabi ng best friend mo na hindi kayo bagay ng boyfriend mo ay malaki ang tsansa na totoo. Ito ay dahil may isa pang katotohanan tungkol sa mga kaluluwa ng mga namatay at sila ay hindi nagsisinungaling.

Noong buhay pa sila o nasa lupa kasama ng mga mahal nila sa buhay, sila ay maaaring sinungaling dahil lahat naman ng tao ay nagsisinungaling, pero kapag namatay na ang mga tao, ang kanyang kaluluwa ay hindi na nagsisinungaling.

Kaya muli, totoo ang sinasabi ng iyong best friend na hindi kayo bagay ng boyfriend mo.

Hanggang sa muli,

Professor Seigusmundo del Mundo

Binaha ang kuwarto at nalunod, pahiwatig na babahain ng magagandang oportunidad

ni Seigusmundo Del Mundo - @Panaginip, salamin ng inyong buhay | October 29, 2020

Salaminin natin ang panaginip ni Lovely na ipinadala sa Facebook Messenger.

Dear Professor,

Natakot ako sa panaginip ko dahil bumaha sa amin, tapos pumasok sa bahay ‘yung tubig at umakyat sa kuwarto ko. Nalunod at nagsisigaw ako, tapos ‘yung tubig baha ay biglang nawala.

Sa totoo lang, laging bumabaha rito sa ‘min kahit tinaasan na ‘yung kalsada. Ano ang ibig sabihin ng panaginip ko?

Naghihintay,

Lovely

Sa iyo, Lovely,

Alam mo, wala namang solusyon ang mamamayan sa pagbaha sa kanilang lugar, partikular sa kani-kanilang bakuran o bahay. Dahil ang solusyon na ginagawa ng mga lokal na pamahalaan ay ang taasan ang kalsada, kaya naman ang mga bakuran o kabahayan ay naiiwanan. Kumbaga, ang mga kalye ay hindi na babahain dahil tinaasan na, pero hindi naman tumaas ang mga bakuran kaya baha pa rin at ang masaklap, sa bawat pagtaas ng kalye, mas tumataas ang baha sa mga kabayahan.

Nakakalungkot pero ito ay isang katotohanan na nararanasan ng mamamayan. Pero ang iyong panaginip naman ay nagbabalita na dapat kang magsaya dahil ang buhay mo ay babahain ng magagandang oportunidad kung saan ang bawat iyong mapipili ay magbibigay sa iyo ng magandang buhay.

Kaya ang payo ay maging positibo ka dahil sa pagiging positibo, ang tao ay mabilis na umaasenso.

Hanggang sa muli,

Professor Seigusmundo del Mundo

Nanilaw ang katawan at nag-palpitate, babala na maoospital ang nanaginip o mahal sa buhay

ni Seigusmundo Del Mundo - @Panaginip, salamin ng inyong buhay | October 27, 2020

Salaminin natin ang panaginip ni Ayesha na ipinadala sa Facebook Messenger.

Dear Professor,

Ano’ng kahulugan ng panaginip ko na nasa ospital ako, tapos biglang nanilaw ang buo kong katawan at nag-palpitate ako?

Naghihintay,

Ayesha

Sa iyo, Ahesha,

Ang isa sa mga sintomas ng sakit sa liver o atay ay ang paninilaw ng katawan. Minsan naman, kaya nanilaw ay nasobrahan sa pag-inom ng vitamins, pero ang ganitong paninilaw ay hindi ikinokonsiderang sakit dahil mabilis din namang bumabalik sa dating kulay ang balat.

May isa pang sanhi ng paninilaw ng balat at ito ay ang nasobrahan sa pagkain ng papaya. Ang nakatutuwa na nakagugulat dito ay ang taong nanilaw dahil sa pagkain ng papaya ay nagiging kulay dilaw din ang anumang bagay na mahawakan ng kanilang kamay.

Sa iyong panaginip, ang nakitang dahilan ay maaring pagkakamali ng doktor, nurse o bantay at hindi tama ang napainom na gamot sa iyo. Idagdag pa ang pagpalpitate mo na isa ring senyales ng hindi tamang pagpasok sa katawan ng maling gamot.

Dahil dito, iha, ang panaginip mo ay nagbababala na kapag nagkasakit ka, dapat ay alam mo kung ano ang gamot na ipaiinom sa iyo. Karapatan ng bawat pasyente na malaman kung ano ang pinaiinom o ginagawa sa kanya ng doktor.

May pagkakataon na ang babala na nasabi ay hindi para sa iyo dahil puwedeng ito rin ay para sa mahal mo sa buhay na magkakasakit at madadala sa hospital.

Hanggang sa muli,

Professor Seigusmundo del Mundo