Malungkot na love life at kakayahang makita ang future

ni Seigusmundo Del Mundo - @Panaginip, salamin ng inyong buhay | November 16 , 2020

Salaminin natin ang panaginip ni Kim Sirvey na ipinadala sa Facebook Messenger.

Dear Professor,

Nanaginip ako last last week na may lalaking nag-propose o nag-surprise sa akin, tapos tanggap ako ng pamilya niya, pero hindi pamilyar ‘yung mukha niya.

Kamakailan, nagpabinyag ‘yung kaibigan ko, tapos nakita ko ‘yung lalaki sa panaginip ko dahil ninong din siya nu’ng bata. Ano ang ibig sabihin nito?

Naghihintay,

Kim

Sa iyo Kim,

Ang napanaginipan mo ang lalaki na kalaunan ay nakita mo nang personal ay panaginip na nagbabalita ng magaganap pa lang. Ibig sabihin, may kakayahan ka sa pamamagitan ng mga panaginip kung saan maaga mong malalaman ang mangyayari. Gayundin, hindi lang ang iyong love life ang mapapanaginipan mo kundi ang iba pang mga bagay na muli ay magaganap pa lang.

Pero ang tanong, bakit naman tungkol sa love life ang napanaginipan mo? Ang sagot ay nagsasabing kaya ganu’n ang iyong panaginip ay dahil malungkot ang love life mo sa kasalukuyan, kumbaga, naghahanap ka ng ligaya dahil aminin mo man o hindi, hindi naman totoong masaya ang love life mo.

Sinasabi ng panaginip mo na ang lalaking napanaginipan mo ang magiging karelasyon mo at siya na rin ang makatutuluyan mo at ito ay “as of now”, ibig sabihin, puwede pa ring magbago ang takbo ng mga pangyayari, pero ang nakatutuwa ay bago maiba ang magaganap, mapapanaginipan mo rin ang magiging pagbabago.

Ito ay sa dahilang muli, may kakayahan kang mapanaginipan ang mangyayari pa lamang.

Hanggang sa muli,

Professor Seigusmundo del Mundo

Papunta ng palengke at nakapulot ng p100, babala na ‘wag huminto sa pagsisikap kahit yumaman

ni Seigusmundo Del Mundo - @Panaginip, salamin ng inyong buhay | November 15, 2020

Salaminin natin ang panaginip ni Helen na ipinadala sa Facebook Messenger.

Dear Professor,

Nakapulot ako ng maraming pera sa kalsada. Naglalakad ako papunta sa palengke para bumili ng bigas at ulam nang biglang may nakita akong P100. Tapos, habang naglalakad ako, may napupulot ulit akong P100 hanggang sa umabot sa P800 ang nakuha ko. Umuwi ako at hindi na bumili ng bigas at ulam. Ano ang ibig sabihin ng panaginip ko?

Naghihintay,

Helen

Sa iyo, Helen,

Nagpapayo ang mga panaginip at ang payo ng panaginip ay tapat at totoo. Hindi tulad ng ibang payo na hindi tapat dahil may ibang nakatagong dahilan at ang ibang payo ay hindi naman totoo kung saan madalas ay pagkunsinti lang sa pinapayuhan.

Sabi ng iyong panaginip, huwag kang susuko sa pagtahak mo sa landas ng buhay kung saan nasa sa dulo ang katuparan ng iyong mga pangarap. Gayundin, pinanghihinaan ka ng loob dahil ayon sa iyo, wala kang pera o mahirap ka lang kaya wala kang pag-asa na matupad ang mga pangarap mo sa buhay.

Ipinapayo rin ng iyong panaginip na ipagpatuloy mo ang pagsisikap mo dahil hindi ka pababayaan ng langit at tatanggap ka ng mga biyaya. Gayundin, gaganda ang buhay mo habang tinatahak mo ang landas ng iyong pangarap.

Ayon sa iyong panaginip, malaki ang tsansa na dahil sa pagganda ang buhay mo, makalilimutan mo ang tunay mong pangarap at hindi ito dapat mangyari sa iyo dahil ang katuparan ng pangarap mo ay nasa dulo at wala sa unahan o kalagitnaan.

Kaya kung hihinto ka dahil sa pagganda ng buhay, maaaring hindi mo paniwalaan na ikaw ay mapabibilang pa rin sa mga taong bigo sa kanilang mga pangarap.

Hanggang sa muli,

Professor Seigusmundo del Mundo

Babala na ‘di pa panahon para magpakasal

ni Seigusmundo Del Mundo - @Panaginip, salamin ng inyong buhay | November 14, 2020

Salaminin natin ang panaginip ni Tere ng Teresa Santos na ipinadala sa Facebook Messenger.

Dear Professor,

Ayaw akong papasukin sa palengke. Sabi ng bantay, bawal mamili dahil sarado ‘yung palengke, pero nakita ko na bukas dahil may mga namimili. Ano ang ibig sabihin nitong panaginip ko, may kaugnayan ba ito sa COVID-19?

Naghihintay,

Tere

Sa iyo, Tere,

Totoong marami ang mapa-praning kapag nagtagal pa ang lockdown dahil hindi kayang sustentuhan ng gobyerno ang pagkain ng lahat ng tao. Kahit ang tao ay may pagkain, ang buhay ay nakakapraning din dahil ang tao ay hindi lang sa tinapay nabubuhay kundi sa iba pang mga bagay.

Tulad ng dapat ay nagbabago ang kanyang kapaligiran dahil kapag ang kanyang paligid ay hindi nagbabago, mapapaisip siya kung siya ay nakakulong at ang pagkakakulong ay talagang nakakapraning.

Kapag ang tao ay puro de-lata ang kinakain, maaaring magkasakit sa balat at ang sakit na ito ay nakakapraning din. Kasama sa relief goods ang mga noodles, pero nakalimutan yata ng mga namamahala rito na hindi ipinapayo na kumain ng noodles ang mga tao, lalo na kung halos araw-araw itong kakainin.

May kaibigan akong abogado at nakita ko sa FB niya na dapat daw ay samahan ng seeds o buto ng mga gulay o halaman ang mga ipinamimigay na relief goods nang sa gayun ay may gulay na maitanim at makain ang tao. Tulad ng masarap at masustansiya na petchay kung saan sa loob ng 14 days ay may aanihin na at puwede pang maibenta sa mga kapitbahay. Ang iba pang mga tanim na gulay ay maaari namang mapakinabangan sa loob ng dalawa hanggang tatlong buwan.

Ang iyong panaginip ay bagama’t, may senaryo nang bawal mamalengke dahil sa COVID-19 ay nagsasabing kung binabalak mong mag-asawa o magpakasal ngayong taon, sabi ng iyong panaginip ay hindi ito matutuloy, as in, hindi ngayon ang best time for marriage para sa iyo.

Hanggang sa muli,

Professor Seigusmundo del Mundo