Babala na maraming inggit sa paligid

ni Seigusmundo Del Mundo - @Panaginip, salamin ng inyong buhay | November 24 , 2020

Salaminin natin ang panaginip ni Bhea na ipinadala sa Facebook Messenger.

Dear Professor,

Ano ang ibig sabihin ng nakatakas ako sa pagkakakulong sa akin ng mga witch? Ikinulong nila ako at nu’ng nalaman ko na ako naman ang papatayin nila, hinanap ko sa pasikut-sikot ‘yung pinto palabas, pero puro pader ang nandu’n at nakita ko lang nu’ng itinuro sa ‘kin nu’ng isang witch ‘yung lihim na pinto at lock sa ilalim ng pihitan ng vault.

Kapag pinihit ‘yun, magkakaroon ng uwang ‘yung pader. Tinulungan ko kasi ‘yung anak niya na muntik kagatin ng aso, kaya itinuro niya sa akin ang daan palabas. Paglabas ko sa madamong lugar, maraming karinderya akong nadaanan na puro lalaki ang tao at masama ang tingin sa akin dahil hindi ako taga-roon. Nang may lalaking biglang lumapit sa akin at hinawakan ang kamay ko, niyaya niya ako palayo at dinala sa bahay nila, tapos nagising na ako at parang totoong-totoo ang panaginip ko.

Naghihintay,

Bhea

Sa iyo, Bhea,

Sa buhay ng tao, maraming kontrabida at sa panaginip mo, ang mga witch na nagkulong sa iyo ay ang mga taong lihim na galit sa iyo, kumbaga, itinatago nila ang tunay na damdamin nila at sila ay lihim na galit sa iyo.

Pero bakit nga pala ang mga witch ay pangit o sobrang pangit? Alam mo, iha, kaya sila mapapangit ay dahil sila ay nabubuhay sa galit, at kaya sila ay galit dahil ang kanilang kinagagalitan ay maganda hanggang o sobrang maganda.

Hindi ba ang sabi, hindi lang sa gubat may ahas dahil may ahas din sa siyudad, ganundin, hindi lang sa gubat may witches dahil nandu’n din sila sa siyudad. Kumbaga, kahit saan, may ahas at witches dahil ang galit at inggit ay walang pinipiling lugar.

Ayon sa panaginip mo, maraming witches ngayon sa paligid mo na inggit na inggit sa iyo, kaya ikaw ay binabalaan at pinag-iingat ng iyong panaginip.

Pero ano ang panlaban sa galit, ano pa nga ba kundi ang pag-ibig. Totoo kaya ito? Parang mahirap sundin dahil paano mo mamahalin ang taong walang ginawa kundi pangarapin na pumangit ang iyong kapalaran? Mahirap gawin, pero ang totoong panlaban sa galit tulad ng nasabi na ay pag-ibig.

Sa panaginip, ito ba ay totoo? Oo, dahil ang witch na tinulungan mo ay siyang tumulong din sa iyo. Sa tunay na buhay, ganundin, gawan mo ng mabuti ang kapwa mo at gagawan ka rin niya ng mabuti.

Lagi mong isabuhay ang sinasabi na mabuti ang panlaban sa masama at palaging tinatalo ng mabuti ang masama. Kaya kahit alam mong maraming naiinggit sa iyo, ipakita mo pa rin sa kapwa ang pagmamahal na nasa puso.

Dahil bukod sa pangit ang mga witches, ang isa pang kahulugan nito ay wala sa kanilang nagmamahal at sila ang kadalasang mga bigo sa love life.

At dahil sa pag-ibig na ito na ipamamalas mo sa iyong kapwa at sa mga taong naiinggit sa iyo, ang mga witches na ito ay siguradong matatalo mo.

Hanggang sa muli,

Professor Seigusmundo del Mundo

Maling paraan ng pagpapapayat, pahiwatig ng panaginip na ayaw tumigil sa pagkain

ni Seigusmundo Del Mundo - @Panaginip, salamin ng inyong buhay | November 23 , 2020

Salaminin natin ang panaginip ni Cathy na ipinadala sa Facebook Messenger.

Dear Professor,

Nitong nakaraang quarantine, nagtataka ako sa panaginip ko dahil ang lakas-lakas kong kumain at parang hindi ako nagsasawa sa kakakain. Tapos, nang maubos ‘yung pagkain ko, nagluto at kumain ako ulit. Hindi ako makapaniwala sa panaginip ko dahil sa kasalukuyan ay nagda-diet ako, pero sa panaginip, lumaki ang baywang ko at nagkakabilbil din ako. Tapos, dating 26 ang waistline ko, pero naging 30 na. Ano ang kahulugan at masasabi n’yo sa panaginip ko?

Naghihintay,

Cathy

Sa iyo, Cathy,

May paalala ang panaginip mo na sana ay iyong pakinggan. Ang sabi, masama ang ginagawa mo na nagda-diet ka o hindi tama ang paraan ng pagpapapayat mo. Kapag hindi kumakain ang tao, hihina ang kanyang katawan at siya ay puwedeng magkasakit. Kapag ang tao ay kulang sa pagkain, ibig sabihin, kumakain din pero hindi maayos ang kanyang kinakain, siya rin ay puwedeng magkasakit. Kapag nasanay ang katawan sa isang regular na aktibidad, tapos biglang binago ang kanyang lifestyle, siya rin ay puwedeng magkasakit.

Marami ngayon ang nagda-diet dahil uso ang pagiging obese. Mahirap kasing iwasan ang kultura o nakagawian ng marami na kasabay ng kasiyahan o selebrasyon ay kain nang kain at walang kontrol.

Sa panahon namang ito ng pandemya, dahil nasa bahay lang, kapag walang magawa ay kain din nang kain. Kumbaga, puwede kaya na kapag magsasaya tayo, huwag na tayong maghahanda ng kung anu-anong pagkain, lalo na ng matatamis at matatabang pagkain, tulad ng sa masarap na lutuin na karne, baboy, baka at kung anu-ano pang laman-hayop?

Ang isa pang hindi maganda sa nakasanayan natin ay masarap na nga ang lutuin, dadagdagan pa ng pampagana tulad ng sili, paminta, betsin at mga sangkap na lalong nagpapasarap dito. At isa pa, hindi lang simpleng paghahaulin ang naimbento natin dahil uso rin ang isda na babalutin ng dahon ng saging at ang mga karne ay tutuhugin at kahit ang mga gulay ay lalagyan pa rin ng mga mamahaling pampasarap.

Pero hindi sa ganyan natatapos ang pagluluto dahil uso rin ang paghahain kung saan nilalagyan din ng mga dekorasyon ang pagkain na para bang mga alay sa hapag-kainan. Kaya sa panahon ngayon, mabilis tumataba, hindi lamang ang kabataan kundi pati ang matatanda.

Sa totoo lang, ang nakaugalian natin na ganyan ay hindi maganda, pero may isa pang mas hindi maganda at ito ay bigla tayong magre-reduce o magda-diet.

At dahil ayon sa panaginip mo na mali ang biglaang pagpapayat mo, mas maganda na dahan-dahan lang ang gawin mo, kumbaga, hindi puwede ang biglaan. Kunsabagay, kahit ikaw din ay sasabihin mo na sa lahat ng bagay, ang biglaan ay masama. Kahit sa pag-eehersisyo, hindi maganda na nabibigla ang katawan.

Sabi rin ng iyong panaginip, kumain ka, ibig sabihin, hindi puwedeng hindi ka kumain. Kaya ang paraan ng pagpapapayat na nagpapayo na huwag kakain ay huwag mong susundin. Sa halip, kumain ka. Muli, ito ang sabi ng panaginip mo, kumain ka ng masasarap, dahan-dahan lang o huwag sobrang marami tulad ng ginawa mo sa nagdaang mga araw bago ka pa mag-diet.

Tandaan mo rin na kapag hindi ka nakinig sa babala ng iyong panaginip, muli, puwede kang magkasakit.

Hanggang sa muli,

Professor Seigusmundo del Mundo

Berdeng ahas, simbolo ng pagyaman sa pagnenegosyo

ni Seigusmundo Del Mundo - @Panaginip, salamin ng inyong buhay | November 20 , 2020

Salaminin natin ang panaginip ni Irish na ipinadala sa Facebook Messenger.

Dear Professor,

Napanaginipan kong namamasyal ako sa isang magandang hardin na maraming bulaklak na iba’t iba ang mga kulay. Palakad-lakad ako at sa paglalakad ko, may nakita akong ahas na kulay green, tapos natakot ako at tumakbo pero bumalik ulit ako dahil naiisip ko kung bakit kulay green ang ahas, eh, ang alam ko brown ang kulay nu’n.

Tinitigan ko ‘yung ahas, tapos kumikislap ang balat niya at maamo ang kanyang mga mata na green din. Gumagalaw-galaw lang siya at mabait naman. Ano ang ibig sabihin ng panaginip kong ito?

Naghihintay,

Irish

Sa iyo, Irish,

Akala ng marami, ang ahas ay simbolo ng tukso. May iba naman na naniniwalang ang ahas ay isang traydor na tao. May mga naniniwala rin na ang ahas ay simbolo ng paggaling sa sakit na dinadanas.

Lahat ng ito ay mga kahulugan ng ahas, pero may isang medyo kakaiba na hindi kadalasang naipakikita at ito ay kapag ang ahas ay kulay green, ito ay ahas na tagapagbantay ng hidden treasures.

Pero ang hidden treasure na iniuugnay sa ahas na ito ay hindi ang tradisyunal na kayamanang nakabaon sa lupa kundi ang tagong pagyaman sa pamamagitan ng pagnenegosyo dahil ang green ay kulay ng pera o salapi.

Kaya, ang payo ng iyong panaginip ay magnegosyo ka dahil may tagong galing at husay ka sa pagnenegosyo. Gawin mo, dahil ito mismo ang mensahe ng iyong panaginip.

Hanggang sa muli,

Professor Seigusmundo del Mundo