Pinagbawalan ng yumaong ama, pahiwatig na ‘wag ituloy ang balak na puwedeng magpahamak sa nanaginip

ni Seigusmundo Del Mundo - @Panaginip, salamin ng inyong buhay | November 28 , 2020

Salaminin natin ang panaginip ni Annalyn na ipinadala sa Facebook Messenger.

Dear Professor,

Ano ang ibig sabihin ng panaginip ko na may isa kaming bahay at pinuntahan ko ito? Isang madilim na lugar at ‘yung bahay ay sobrang dilim din. Nakabukas ‘yung gate ng bahay, tapos papasok na ako pero biglang isinara ng papa ko ‘yung gate. Sabi niya, walang papasok doon kahit na sino. Nagtataka ako kung bakit hindi niya ako pinapasok, eh, anak naman niya ako. Umalis ako agad dahil natakot ako, pero sa totoong buhay, patay na ‘yung papa ko. Bakit ganu’n, patay na siya pero napanaginipan ko pa rin siya? Sana ay masagot n’yo ang kahulugan ng panaginip ko. Maraming salamat!

Naghihintay,

Annalyn

Sa iyo, Annalyn,

Ang sabi, “Mother knows best,” tama, ‘di ba? Pero may mga anak na sa totoo lang ay alam din nila na ang kanilang ina ay hindi okey. Kasi may mga nanay na mas matino ang anak, may maganda ang ugali at may alam kung ano ang mabuti at hindi.

Alam mo, ‘yung sinasabing “Mother knows best,” ay sa totoo lang, hindi lang para sa mga ina dahil ang sinasabing “Father knows best” ay totoo rin. Dahil ang simpleng ibig sabihin nito ay hindi tayo ipapahamak ng ating mga magulang.

Madalas, ang sinasabing “knows best” ay ginagamit ng matatanda dahil marami na silang naranasan, pinagdaanan at nilagpasang mga pagsubok sa buhay. Kumbaga, alam na niya kung ano ang puwedeng mangyari sa mga mahal nila sa buhay at kung itutuloy nila ang katigasan ng kanilang ulo, kaya ito rin ay nagsasabing “Elders know best.”

Marami na sa kabataan at iba pa na hindi nakinig sa sinabi ng magulang at nakatatanda, kaya sila ay napahamak, nabigo at nasaktan. Para hindi ka mapabilang sa mga “nabigo, nasaktan, kumain nang kumain at tumaba” o iba pang kahawig na salita, mas mabuting sundin mo ang mensahe ng iyong ama.

Sa panaginip mo, ang ipinagbabawal ni papa mo para sa iyo ay ang tinatawag na “curiosity”, ‘yun bang natutukso ang tao na alamin ang hindi niya alam o maranasan ang hindi pa niya naranasan. Sa kasaysayan ng mundo, “curiosity” ang tunay na may kasalanan kung bakit napalayas sa Paraiso sina Adam at Eve.

Isipin mo, iha, kung hindi natangay ng curiosity sina Adam at Eve, sana tayong lahat ay nabubuhay sa Paraiso. Ikaw, ‘di ba, ang gusto mo kaya ka nagsisikap ay ang magkaroon ka ng magandang buhay?

Hindi na sana tayo mahihirapan pa dahil sa Paraiso ay papasyal-pasyal lang ang tao at ang nararanasan nila ay walang iba kundi ang sobrang masarap na kalagayan. Pero ngayon, ano na ang nangyari? Kailangang maghirap muna ang tao para siya ay kumain. ‘Yung iba nga, hirap na hirap sa katatrabaho, kapos pa rin sa pambili ng pagkain.

Sayang, ‘di ba? Sana ay nabubuhay tayo sa Paraiso.

Curiosity din ang may sala kung bakit sa matandang kuwento tungkol sa “Gamo-gamo at Lampara,” nasunog ang pakpak ng gamo-gamo. Kasi natukso siyang lapitan ang maganda at nakaaakit na liwanag ng lampara, kaya nasunog ang pakpak ng batang gamo-gamo.

Sundin mo ang payo ng iyong panaginip, sabihin mo sa sarili mo na ang curiosity ay hindi magbubunga ng maganda. Kaya kung natutukso ka na alamin ang hindi mo pa alam, mararanasan mo ang hindi mo pa naranasan at tuklasin mo ang mga akala mong magbibigay sa iyo ng kaligayahan, pero naiisip mo ang mga ayaw ng papa mo na mangyari sa iyo, labanan mo ang curiosity.

Paano ba ‘yun? Siguro, ‘yan mismo ang tanong mo. Ang sagot— kapag ang tao ay nahaharap sa puwedeng magpahamak sa kanya, sure na maaalala niya na ang kanyang mga magulang at ilang malalapit at nagmamahal sa kanya na bawal at hindi maganda na gawin niya ang isang nakakatuksong bagay.

Hanggang sa muli,

Professor Seigusmundo del Mundo

Panaginip tungkol sa demonyo at impiyerno, pahiwatig na magtiwala sa sarili

ni Seigusmundo Del Mundo - @Panaginip, salamin ng inyong buhay | November 27 , 2020

Salaminin natin ang panaginip ni Jamil na ipinadala sa Facebook Messenger.

Dear Professor,

Nanaginip ako ng bundok at bulkan. Sa bulkan, parang impiyerno na may apoy at lava na kumukulo. Nakita ko ang isang nilalang at sa tingin ko ay isang demonyo dahil may sungay at maitim na mapula ang hitsura niya, tapos kumakain siya ng puso at atay ng tao at ibinibigay niya sa akin ang kanyang kinakain.

Takot na takot ako, tapos nagdasal ako at lumitaw ang isang anghel, tapos kinuha ako at dinala sa bundok kung saan sa tingin ko naman ay langit at sabi sa akin ng anghel, “Dito, hindi ka makukuha ng demonyong ‘yun dahil hindi sya makapapasok dito!”

Napalingon ako sa impiyernong pinanggalingan ko at nakita ko na naging bulkan na nagbubuga ng lava at apoy, tapos bigla akong nagising. Sana ay maipaliwanag n’yo ang ibig sabihin ng panaginip ko. Salamat!

Naghihintay,

Jamil

Sa iyo, Jamil,

Alam mo, ang napanaginipan mong demonyo at impiyerno ay napanagnipan din ni Carl Jung. Si Carl Jung ang nagtayo ng pagamutang pang-psychology o School of Thought na kung tawagin ay Analytical Psychology.

Ganito ang naranasan ni Mr. Jung kung saan napanaginipan niya ang demonyo, may sungay at nangangain ng tao at gusto rin siyang kainin nito. Sa una, natakot din siya, pero naalala niya na ang mga hayop na may sungay at hindi naman kumakain ng karne, kaya hindi totoong kakainin siya ng demonyo.

Sabi niya sa demonyo, “Vegetarian ka, ‘no?” Kasi ang pangunahing pagkain ng mga may sungay ay mga halaman at gulay. Biniro pa nga niya ang demonyo at sabi niya, “Oo, kumakain ka ng puso, pero puso ‘yun ng saging kasi ang saging ay halaman. Oo, kumakain ka ng atay pero atay ‘yun ng malalaking katawan ng punong kahoy, kasi ‘yung pinakagitna ng punong kahoy, ang tawag du’n ay atay din.”

Tapos, ayon kay Mr. Jung, nawala na ang demonyo kasi napahiya dahil hindi tumalab ang pananakot niya.

Dahil dito, huwag kang matakot dahil ang napanaginipan mo ay demonyo na may sungay, hindi ka kakainin nito. Ibig sabihin, tinatakot ka lang ng demonyo at kaya ka tinatakot ay dahil sa mga araw na siya ay iyong napanaginipan, nawawala o nababawasan ang iyong pananampalataya.

Pero dahil ang salitang “pananampalataya” ay panrelihiyon, mas maganda na ang gamitin natin ngayon at para sa iyo ang salitang “tiwala.” Kaya ayon sa panaginip mo, mukhang nawawalan ka ng tiwala sa sarili mo, as in, naduduwag ka sa mga hamon ng iyong kapalaran.

Kaya ang payo, magtiwala ka sa sarili mo, kumbaga, ‘yung usong-uso ngayon na madalas nating marinig, “Tiwala lang,” oo, iha, tiwala lang sa sarili ang kailangan mo. Kapag may tiwala ang tao sa kanyang sarili, ang mga imposibleng bagay ay magiging posible at ang mahihirap na parang hindi niya kakayanin ay tiyak na kakayanin niya.

“Tiwala lang,” subukan mo at gaganda ang iyong kapalaran dahil kapag may tiwala ang tao sa kanyang sarili, siya ay masasabing may tapang at lakas ng loob na harapin ang anumang pagsubok at hamon ng buhay, lalo na sa panahong ito ng pandemya.

Hanggang sa muli,

Professor Seigusmundo del Mundo

Pahiwatig na pagdugtungin ang nakaraan at hinaharap gamit ang mga ngiti, biro at harot

ni Seigusmundo Del Mundo - @Panaginip, salamin ng inyong buhay | November 25 , 2020

Salaminin natin ang panaginip ni Tess na ipinadala sa Facebook Messenger.

Dear Professor,

Ano ibig sabihin ng panaginip ko na tumawid ako sa hanging bridge, nakababa na ako habang hinihintay kong makababa ‘yung tatlong matandang babae?

Naghihintay,

Tess

Sa iyo, Tess,

Ang tulay ay nagdurugtong ng dalawang lugar na magkahiwalay kung saan para makapunta sa kabila, kailangang tumawid sa tulay. Kaya kapag walang tulay, hindi makakapunta sa kabila o sa susunod na pupuntahan o daraanan. Kaya ang tulay ay tagapagdugtong ng dalawang lugar.

Kapag may mga bagay na “air type” sa mga panaginip tulad ng hanging bridge, ang nanaginip ay ikokonsiderang “air type” na nilalang. Ibig sabihin, hangin o air ang udyok ng buhay na sumasakanya. Ang isa pang kahulugan, hangin ang magbibigay sa kanya ng magagandang kapalaran at magsisilbing susi para maabot niya ang kanyang mga pangarap.

Dahil dito, ayon sa panaginip mo, para mapagdugtong mo ang iyong nakaraan at hinaharap, saya ang iyong kailangan dahil ito ay para sa mga air type na nilalang.

Gayundin, ang isa pang kahulugan, kailangang lagyan nila ng saya ang bawat gagawin nila. Kahit ang pinakamahirap na trabaho ay dapat may saya sila. Kaya anuman ang iyong gusto sa buhay, huwag mong kalilimutan na saya ang magdadala sa iyo sa tagumpay.

Ito rin ay nagsasabing kahit dumadaan ka sa problema, haluan mo ng saya. Kahit pinahihirapan ka ng mga hamon ng kapalaran, ang saya ay dapat nasa iyo pa rin. Paano? Kung pagod ka, ngumiti ka dahil ito ay nakakapawi ng pagod. Kung iniinis ka ng mga tao sa paligid mo, ngitian mo lang sila dahil muli, ang ngiti ay para sa mga air type.

Kung nababagot ka, magharot ka dahil tulad ng ngiti, ang harot ay para sa mga tulad mo. Kung sa kasalukuyan ay naghihirap at nagdudusa ka sa kalungkutan at kabiguan, magbiro ka dahil ang ngiti, harot at biro ay para sa mga tulad mo.

Pero kahit wala kang kasama, ngumiti, magharot at magbiro ka sa iyong sarili. Gawin mo at huwag mong kalilimutan ang mga ito sa lahat ng sandali dahil ang mga ito ang magdurugtong ng iyong nakaraan at hinaharap.

At kung nawala ang ngiti, harot at biro sa iyong buhay, hindi ka na makakaalis sa iyong nakaraan at ang taong nabubuhay na lang sa kanyang nakaraan ay malabong makamtan ang kaligayahan.

Ang tatlong matandang babae sa panaginip mo ay ang iyong matatandang karanasan kung saan sinasabi ng panaginip mo na sa mga ito ka kumuha ng mga aral na magagamit mo sa iyong hinaharap.

Kaya sila ay matatanda na dahil ang mga karanasang ito ay nangyari noong bata ka pa. Kumbaga, sobrang bata ka pa noon at nakaranas ka ng mga pangyayari at may mapupulot kang aral sa buhay.

Kapag naunawaan ng tao ang kanyang mga panaginip, para na ring sinabing hindi na siya mabibigo sa kanyang buhay dahil nakikinig siya sa mga gabay na ibinibigay ng kanyang mga panaginip.

Hanggang sa muli,

Professor Seigusmundo del Mundo