Pahiwatig na mag-ingat, bukas ang third eye at kailangang makipagsapalaran sa pag-ibig

ni Seigusmundo Del Mundo - @Panaginip, salamin ng inyong buhay | December 8, 2020

Salaminin natin ang panaginip ni Vangie na ipinadala sa Facebook Messenger.

Dear Professor,

Gusto kong malaman ang ibig sabihin ng mga panaginip ko.

1. Napanaginipan ko nang dalawang beses na nanlaban ako dahil pinagtangkaan akong pagsamantalahan, pero parehong hindi natuloy. Sa isang panaginip ko, umabot sa punto na naghahanap ako ng tulong para kasuhan ‘yung taong gumawa nu’n. Hindi ko matandaan kung sino at ano’ng itsura nu’ng nagtangka sa akin, pero sa panaginip ko ay parang kilala ko siya.

2. Napanaginipan ko rin ‘yung bunso kong kapatid na babae na lumangoy sa malaking aquarium na may kasamang octopus. Pero nang inaalala ko ‘yung panaginip ko, hindi naman mukhang octopus ang nakita ko. Mukha lang maraming retaso ng tela na kulay gray.

3. Napanaginipan ko ‘yung ex-boyfriend ko na biglang dumating. Napaka-sweet niya sa akin, tapos mahahaba ang kuko niya at puti na ang buhok. Bigla niyang tinanggal ang wig niya para ipakitang napapanot na siya. Mukha siyang nagpabaya sa sarili at sinabi niya na ‘yung mga minahal niya, eh, hindi siya mapagupitan ng kuko. Nangutang siya sa akin ng P5,000 at pinautang ko naman. Nakapagtataka lang dahil napakakuripot ko, pero sa panaginip ko, hindi ako nag-alinlangan na ibigay ‘yung inuutang na.

Sana ay matulungan n’yo akong maintindihan ang mga panaginip kong ito. Maraming salamat!

Naghihintay,

Vangie

Sa iyo, Vangie,

Ang una mong panaginip ay nagsasabing mag-ingat ka dahil puwedeng ikaw ay pagtangkaang pagsamantalahan. Huwag mong kakalimutan na mas mabuti ang mag-ingat kaysa kampante at may tiwala sa sarili dahil sa pag-iingat ay nakakaiwas. Tandaan mo rin na ang hindi nag-iingat, ang sarili mismo ang sinisisi.

Sa pangalawa mong panaginip ay nagsasabing ngayon ay lumalakas ang kutob mo at ang iyong tinatawag na “third eye” ay mas madalas na nakabukas.

Sa pangatlong panaginip naman, ang payo ay buksan mo ang puso mo sa posibilidad na ikaw ay lumigaya sa pag-ibig, ibig sabihin, makipagsapalaran ka.

Alam mo, iha, hindi lang sa sugal nakikipagsapalaran ang tao at hindi lang sa pagnenegosyo nakikipagsapalaran at hindi lang sa pag-a-abroad dahil sa bawat larangan na gustong lumigaya ng tao, siya ay dapat makipagsapalaran.

Dahil ang hindi nakikipagsapalaran ay tanggap na siya ay bigo, talunan at wala nang magagawa para matupad ang kanyang mga kagustuhan. Hindi maganda para sa iyo ang ganu’ng pananaw na para bang huminto ka nang mabuhay pa.

Dahil din dito, pakinggan mo ang payo ng iyong ikatlong panaginip na muli, ito ay nagsasabing makipagsapalaran ka sa langaran ng pag-ibig. Sa ganyang paraan, ikaw magtatagumpay at habambuhay na magiging maligaya.

Hanggang sa muli,

Professor Seigusmundo del Mundo

Kabaong, pahiwatig na ilibing ang pangit na karanasan at kaugalian

ni Seigusmundo Del Mundo - @Panaginip, salamin ng inyong buhay | December 7, 2020

Salaminin natin ang panaginip ni Lannie na ipinadala sa Facebook Messenger.

Dear Professor,

Nanaginip ako na may nagyaya sa akin na lalaking hindi ko kilala. Binigyan niya ako ng P500, tapos bibili ako ng damit para may masuot akong pang-alis, tapos ibinili niya ako ng tatlong blouse at pinasakay sa kabaong. Sabi ko, “Bakit kabaong? Ayaw ko rito.”

Ano ang kahulugan ng panaginip kong ito? Natatakot ako sa kabaong.

Naghihintay,

Lannie

Sa iyo, Lannie,

Nakakatakot talaga ang kabaong. Ang totoo nga, sa panaginip, hindi gaanong nakakatakot mapanaginipan ang patay o kaluluwa, pero kapag kabaong na ang napanaginipan, agad kang makadarama ng takot.

Hindi ba, sa kabaong nakalagay ang patay na ililibing? Kaya ang kabaong ay nagpapahiwatig ng kamatayan, pero sa panaginip, ang kamatayan ay hindi aktuwal na pagkawala ng buhay o talagang patay o namatay na.

Dahil ang kabaong sa panaginip ay nagsasabing ang mga dapat patayin ay ang mga ugali mong pangit o ang mga ito ay kailangan mo nang ilibing sa limot. Ang “limot” ay hindi simpleng paglimot kundi ililibing nang tuluyan o buburahin mo na sa iyong alaala at pagkatapos ay mabubuhay ka nang payapa, tahimik at may panatag at matiwasay na kalooban.

Minsan, iha, bilang pagtatapat sa iyo, sa panaginip, ang kabaong ay nagsasabi rin na ang ililibing o ibabaon sa limot ay ang mga karanasan mo na pagkapangit-pangit, masasaklap at mga pahirap sa kalooban. Gayundin, kabilang sa mga ito ang kabiguan.

Hindi kasi puwedeng magpatuloy ang tao na nasa kanya ang masasaklap na alaala ng lumipas at ang masasakit na kabiguan sa nakaraan dahil kapag dala-dala ang mga ito, hindi siya liligaya at magkakaroon ng kaganapan o ‘yung sinasabi ng marami na “move on!”

Dahil paano ka nga ba makaka-move-on kung patuloy mong niyayakap ang lungkot? Tunay ngang malabong maka-abante sa buhay ang taong pasan-pasan pa rin ang kanyang kabiguan sa nakaraan, kumbaga, ang pagsulong ay makakamit lamang kung ang tao ay malaya at maginhawang lalakad sa bagong landas ng buhay na kanyang tatahakin.

Napansin mo ba ang sinabi ko na “bago” sa bagong landas ng buhay? Ito mismo ang postibong kahulugan ng kabaong kung saan para mas malinaw, ito ay nagsasabing ang kabaong ay nagbabalita ng darating na bagong buhay. Ito ay makakamit lamang kapag ganap mong nalimot ang mga pangit na karanasan, ganundin sa sandaling naibaon mo na sa limot at tuluyang binura ang mga pangit mong katangian, kahinaan at bulok na nakaugalian.

Hanggang sa muli,

Professor Seigusmundo del Mundo

Pahiwatig na makakabalikan ang ex at itatama ang mga mali

ni Seigusmundo Del Mundo - @Panaginip, salamin ng inyong buhay | December 06 , 2020

Salaminin natin ang panaginip ni Adelfa na ipinadala sa Facebook Messenger.

Dear Professor,

Nanaginip ako tungkol sa ex ko na nagkikita at nag-uusap kami, tapos naglalambing pa ako sa kanya habang sumasakay ng sasakyan. Magkatabi kami at nag-uusap na ipagpatuloy namin ang aming relasyon.

Pero ang sabi ko sa kanya, paano na lang ang bago niyang girlfriend, “Hihiwalayan mo na ba?” Pero ‘di siya nagsasalita, tinitigan niya lang ako hanggang bumaba na kami at naglakad sa bago kong pinasukan na paaralan at nakita ko ang mga kaibigan, schoolmate at kaklase ko na nag-uusap, habang dumaan kami at nakakapit pa rin ako sa braso niya.

Nang dumaan kami, narinig ko ang mga sinasabi ng schoolmate ko na boyfriend ko raw ba siya, pero hindi ako nagsasalita dahil naghihintay ako na magsalita siya. Habang patuloy pa rin kami sa paglalakad, hindi namin namalayan na sobra na ang kapit ko sa kanya, tinatanong ko pa rin siya kung hihiwalayan na niya ang girlfriend niya at ipagpatuloy nalang namin ang aming relasyon.

Tsaka hindi naman kami naghihiwalay, pero tiningnan niya lang ako, tapos naglalakad na kami at nang dumating kami sa aming paroroonan, bigla akong bumitaw at nagsalita siya na maghintay lang ako dahil may kakausapin siyang kaibigan, pero pagkatalikod niya ay bigla na lang tumulo ang luha ko.

Kapag tumitingin siya sa akin, pinipigilan ko ang pagtulo ng luha ko hanggang tumalikod na ako at umupo sa bench, kapag titingnan ko siya, nakita ko siyang nakikipaglaro sa mga kaibigan niya na masaya habang ako naman ay umiiyak sa bench.

Gusto kong malaman kung ano ang ibig sabihin ng aking panaginip dahil alam ko naman na may sarili na kaming karelasyon.

Naghihintay,

Adelfa

Sa iyo, Adelfa,

Madalas ikatwiran, lalo ng mga babae na kapag may karelasyon silang bago, wala nang pag-asa na magkabalikan pa sila ng ex nila. Pero ang katwirang nasabi ay alam din naman nilang mababaw na dahilan at ang isa pang alam nila ay puwede pa ring magkabalikan ang dalawang dating nagmahalan.

Kaya masasabing ang mga babae ay mahirap maunawaan, pero kahit naman sarili nila, alam din naman nilang nahihirapan silang maunawaan ang sarili o buhay nila. Mahirap din kasing tanggapin ang katotohanan na “The heart has its own reason, and that reason cannot be understand.”

Ang totoo nga, pero mahirap ding maunawaan ang mga babae na nagsabing may karelasyon na sila, kaya hindi na sila makikipagbalikan ay sila pa ang nakakaranas ng pagkakabalikan sa kanilang mga ex.

Pero bakit kaya ganu’n? Dahil hindi naman nagbibigay ng garantiya na maligaya ang magkarelasyon. Hindi rin ibig sabihing hindi na nagkakahiwalay ang magkarelasyon. Ang mag-asawa nga naghihiwalay, ang magkakarelasyon pa kaya?

Ang panaginip mo ay isang babala na ang pakikipagbalikan sa ex mo ay nalalapit na, pero ito ay babala lang naman na sa biglang tingin dahil ang totoo, ito ay balita, kumbaga, nagbabalita ang iyong panaginip na kayo ng ex mo ay muling magmamahalan at magsasalo sa mas matamis na relasyon at ang mga pagkakamali sa nakaraan ay sisikapin ninyong hindi na muling maulit pa.

Kaya masasabing ang muling pakikipagbalikan sa ex mo ay hindi simpleng balita at ito ay isang pagkasaya-sayang balita para sa inyong dalawa.

Good luck!

Hanggang sa muli,

Professor Seigusmundo del Mundo