Paalalang makinig sa babala para ‘di mapahamak

ni Seigusmundo Del Mundo - @Panaginip, salamin ng inyong buhay | December 16, 2020

Salaminin natin ang panaginip ni Maricris na ipinadala sa Facebook Messenger.

Dear Professor,

Ang tanong ko ay tungkol sa panaginip ng asawa ko. May kaibigan siya na namayapa na noong November 14. Nasa ibang bansa ang asawa ko ngayon, tapos napaniginpan niya ‘yung kaibigan niya na niyakap siya at sinabing sa January 22, babalian siya ng buto. Bumaba lang daw siya para sabihin sa kanya ‘yun.

Ano ang ipinapahiwatig ng panaginip niyang ito? Sana ay masagot n’yo ako dahil nag-aalala ako kasi nasa ibang bansa ang asawa ko.

Naghihintay,

Maricris

Sa iyo, Maricris,

Una, dapat mag-ingat ang asawa mo, lalo na sa araw na sinabi ng kaibigan niya sa kanyang panaginip at huwag kang gaanong mag-alala dahil ang ilang panaginip tulad ng tinutukoy mo ay isang babala.

Pero talaga rin namang hindi maiiwasang ikaw ay mag-alala dahil siya ay iyong asawa at nasa malayong lugar. Gayunman, muli, ang panaginip na ito ay isang babala. May mga nag-aakala na dahil napanaginipan ay agad-agad na magkakatotoo dahil ang panaginip minsan ay napagkakamalang hula.

Ano ba ang kaibahan ng babala sa hula?

Ang babala ay puwedeng hindi mangyayari dahil ito ay isang babala lamang, pero ang hula ay tiyak na mangyayari. Minsan, ang babala ay magiging katuparan ng hula dahil kung hindi pakikinggan ng tao ang babala, tiyak na mangyayari ito.

Napansin mo ba ang mga nakalagay na babala sa mga kalsada, “Mag-ingat! Marami na ang namatay dito” o kaya “Bawal tumawid! Gamitin ang footbridge!”

Kung hindi makikinig ang tao, mapabibilang siya sa mga naaksidente, pero kung susundin niya ang babala, ‘di ba, hindi naman siya mapapahamak?

Dahil dito, bukod sa mismong petsa na January 22, ang iyong asawa ay pinag-iingat din sa mga petsang kung tawagin ay “Numero Kuwatro” tulad ng ika-4, 13, 22, at 31 at siya rin ay pinag-iingat sa mga petsang ika-8, 16 at 26 o mga “Numerong Otso”.

Minsan, ang mga numero ay nag-aanyong tao. Oo, iha, kahit hindi aktuwal na petsa o numero, may tinatawag na Taong Kuwatro at Taong Otso, kaya dapat ding pag-ingatan ng asawa mo ang mga ganu’ng klaseng mga tao.

Muli, iha, ang hindi nakikinig sa mga babala ay maaaring mapahamak at ang babala, kapag binalewala, ito rin ay magiging isang hula na anumang sandali ay maaaring matupad at magkatotoo.

Hanggang sa muli,

Professor Seigusmundo del Mundo

Nakita ang yumaong lolo, senyales na pinaghaharian ng negatibong pananaw

ni Seigusmundo Del Mundo - @Panaginip, salamin ng inyong buhay | December 15, 2020

Salaminin natin ang panaginip ni Doris na ipinadala sa Facebook Messenger.

Dear Professor,

Nakita ko ‘yung lolo ko, pero matagal na siyang patay, nakita ko siya na kulay gray. Tapos ‘yung sa dating lugar namin sa likod ng casino sa Clark, may malalaking usok na paparating at kulay itim. Kapag nakalapit, parang naging insekto, tapos napapatay naman, tapos natulog kami kasama ang mister ko at lumindol ng palakas nang palakas at nawala rin.

Masama ba ‘yun? Noon kasi, nakapanginip ako ng kabaong, tapos nagkasunud-sunod ang patay dito malapit sa lugar namin. Salamat!

Naghihintay,

Doris

Sa iyo, Doris,

Alam mo, pangkaraniwan lang naman, lalo na ngayong marami ang namamatay. Pero walang kinalaman ang mga patayan at namatay sa iyong panaginip kahit minsan ay nakapanaginip ka ng kabaong ay nagkasunud-sunod ang patay sa inyo. Gayunman, ang iyong panaginip tungkol sa lolo mo na patay na ay nagsasabing ngayon ay pinaghaharian ka ng negatibong pananaw.

Masasabing sobrang lungkot kung saan ang maaaring dahilan ay iniisip mo na parang walang pag-asa na matupad o gumanda pa ang iyong buhay. Dahil dito, narito ang ilang pananaw na maaaring makatulong sa iyo.

Dapat panatilihin mong buhay na buhay ang ningas ng iyong pag-asa kahit gaano pa kaliit ang ningas na ‘yun. Mangarap ka dahil mahalaga sa tao ang nangangarap o may pangarap. Subukan mo at makikita mong hindi ka na makakapanaginip ng kabaong at mga patay na.

Ang mga napapanaginipan mo na ay ang magagandang bagay na may kaugnayan sa iyong mga pangarap na nagsasabing ipinauuna ng mapapanaginipan na malaki ang tsansa na maabot mo ang iyong mga pangarap.

Samantala, ang taong walang pangarap ay wala ring mararating, kumbaga, mabubuhay na lang siya sa kasalukuyan kung saan magtitiis siya sa kahirapan at kalungkutan. Hindi ito magandang mangyari sa tao dahil tao lamang sa lahat ng may buhay sa mundo ang binigyan ng pagkakataon na iguhit sa kanyang mundo ang kanyang kinabukasan.

Pagmasdan mo ang mga hayop, hindi ba, kain-tulog lang sila? Ang mga halaman, kahit pa may magagandang bulaklak, masasabing hanggang doon na lang sila. Ibang-iba ang tao dahil sila ay may tinatawag na “Gift of Dreaming” —sila lang ang may pangarap.

Huwag mong sayangin ang regalong ito ng Dakilang Manlilikha, kaya mangarap ka nang mangarap. Ikaw ay tao at hindi ka hayop o halaman at sa mga pangarap mong ito magsisimula ang napakaganda at maligayang buhay.

Hanggang sa muli,

Professor Seigusmundo del Mundo

Mga bagay na kulay pula at berde, kailangang tingnan para manumbalik ang sigla

ni Seigusmundo Del Mundo - @Panaginip, salamin ng inyong buhay | December 14, 2020

Salaminin natin ang panaginip ni Lyn na ipinadala sa Facebook Messenger.

Dear Professor,

May nagbigay sa akin ng halaman na puro green ang dahon at may bunga na isang malaking green bell pepper, tapos marami at kakaiba ang dahon dahil nakasabit ang paso at nakalaylay ang mga dahon. Tapos may nag-abot sa akin ng bunga ng sili na pula na tatlong piraso at bawat isa ay may tapyas.

Nakapanaginip din ako ng nasa isang lugar ako na maraming matataas na puno at puro green din ang dahon, tapos ang dami ng puno ng buko na sobrang taas at kakaiba rin ang mga dahon dahil kahit umulan, hindi ako nababasa dahil parang bubong ang mga dahon ng puno.

Nagawi ako sa isang lugar na may kakaiba ring puno na mataba at nakaukit na mukha ng bear. Sobrang laki ng puno na ‘yun at putol na dahil ginawang mukha ng bear. Sana ay masagot n’yo ang mga katanungan ko. Maraming salamat!

Naghihintay,

Lyn

Sa iyo, Lyn,

Pagmasdan mo, kapag tag-ulan, green na green ang mga halaman at ang gagandang tingnan. Ang totoo nga, kapag palaging tinitingnan ang mga green na halaman ay gumaganda rin ang pakiramdam at kapag maganda ang pakiramdam, maganda rin ang kapalaran.

Ang kulay pula naman, ‘di ba, nakapagbibigay ng sigla at tapang?

Akala ng iba, ang mga kulay ay walang kabuluhan at may mga nagsasabi na ang mga kulay ay pandekorasyon lang, pero siyempre, hindi naman ‘yan totoo dahil kahit ang mga dalubhasa sa sikolohiya at doktor sa medisina ang nagsasabing malaki ang epekto ng mga kulay sa tao.

Pero bakit nga ba napapanaginipan ang mga kulay, lalo na ang green at red?

Ayon sa iyong panaginip, aminin mo man o hindi, ang buhay mo ngayon ay tulad ng isang halaman na nananamlay. Kaya masasalamin na ikaw ay pinapayuhan ng iyong panaginip na pagmasdan ang mga berdeng halaman nang gumanda ang iyong pakiramdam.

Gayundin, pagmasdan at titigan mo ang mga bagay na kulay pula nang manumbalik ang iyong sigla. Lalong maganda kung magsusuot ka ng green at red dahil ito rin ay mahigpit na inirerekomenda ng iyong panaginip.

Subukan mo, iha, as in, sundin mo ang sinasabi ng panaginip mo. Wala namang mawawala sa iyo kung gagawin mo ito dahil talaga namang nagsusuot ka ng damit, kumbaga, kahit hindi ka gaanong naniniwala sa mga sinasabi ko, muli, subukan mo ang kulay na green at red at makikita mo na magkakaroon ng malaking suwerte at pagbabago sa iyong buhay.

Hanggang sa muli,

Professor Seigusmundo del Mundo