Kahulugan ng sinurpresa ng mister

ni Seigusmundo Del Mundo - @Panaginip, salamin ng inyong buhay | December 22, 2020

Dear Professor,

Sa ngayon, wala rito ang asawa ko at hiwalay na kami, pero napanaginipan ko siya na sinurpresa kami at biglang nandito na siya sa bahay. Tapos naligo siya, at habang hinihintay ko, binigyan niya ng pera ang mga kasamahan niya sa trabaho o ang mga iba pang tao na hindi ko kakilala. Tapos ako naman ay binigyan niya ng dollar, tapos ‘yung mga kamag-anak naman niya ay pinagbibigyan niya ng teddy bear. Tapos sabi ko, “Bakit sa amin, wala siyang ibinigay?” Tapos nagising na ako. Ano ang ibig sabihin ng panaginip kong ito?

Naghihintay,

Cathy

Sa iyo, Cathy,

Masasalamin sa panaginip mo na sa kasalukuyan ay miss na miss mo na ang asawa mo, at masasalamin din na matagal na siyang wala sa buhay n’yo. Ito rin ay nagsasabing ikaw ay very lonely ngayon at siya ay iyo pa ring inaasahan na muling bumalik sa inyo.

Gayunman, bilang pagtatapat sa iyo, malabo nang maging kayo ulit dahil ayon din sa panaginip mo, mas gusto ng asawa mo na maghanap ka na ng bagong magbibigay sa iyo ng ligaya.

Mahirap tanggapin ang ganitong katotohanan, pero anumang hirap, sa huli ay maaayos mo rin ang iyong buhay sa sarili mong pagsisikap at kaya lang naman mahirap dahil kahit paano ay umaasa ka pa na baka maging kayo muli.

Pero kapag nakahanap ka na ng bagong ligaya, ganap na ring makalilimutan mo ang iyong asawa. Dahil dito, narito ang ilang bagay na inirerekomenda para sa iyo:

Buksan mo ang iyong puso para makapasok ang bagong pag-ibig. Oo, mahirap ba ‘yun? Ang totoo, ang ganitong payo ay madali lang sabihin at ito ang kadalasang ipinapayo sa mga nabigo sa love life. Kaya lang, paano nga ba bubuksan ang pusong nagsara dahil sobrang nasaktan?

Ngumiti ka palagi, sapagkat ‘yan ang unang hakbang. Oo, ngiti ang susi para mabuksan ang nakasarang puso. Subukan mo. Wala namang mawawala sa iyo kung ngingiti ka palagi, ‘di ba?

Ang totoo pa, ngiti at hindi tawa ang nagpapasaya sa tao at ngiti ang humihila sa mga suwerteng nasa tabi-tabi lang. Kaya lang naman sinasabing “tawa” ang pinakamabisang gamot ay dahil ito ay nagmula sa ngiti.

Dahil bago matawa, ang mga labi ay ngingiti muna at kapag ang labi ay hindi nagawang ngumiti, ang tawa ay isang imposibleng bagay.

Sa tawa, malabong ma-in love sa iyo ang isang lalaki o tao. Ang totoo nga, baka layuan ka pa dahil sa pagtawa mo. Pero muli, subukan mong ngumiti at magugulat ka sa magiging resulta. Hindi matatapos ang Paskong ito, masusumpungan mo ang sarili mo na yakap-yakap ang kaligayahan dulot ng isang mas masaya at matamis na pag-ibig.

Hanggang sa muli,

Professor Seigusmundo del Mundo

Naliligo sa ulan, pahiwatig na ‘di masaya o zero ang love life

ni Seigusmundo Del Mundo - @Panaginip, salamin ng inyong buhay | December 21, 2020

Salaminin natin ang panaginip ni Eva na ipinadala sa Facebook Messenger.

Dear Professor,

Napanaginipan ko na naliligo ako sa ulan. Tuwang-tuwa ako at kahit tinatawag ako ng nanay ko, hindi ko siya pinapansin at hindi ko pinakinggan dahil ayon sa panaginip ko, nasasarapan ako sa paliligo sa ulan.

Ano ang koneksiyon nito sa buhay ko at kung mayroon, ano ang ibig sabihin ng panaginip na naliligo sa ulan?

Naghihintay,

Eva

Sa iyo, Eva,

Simple lang naman ang pag-aanalisa ng mga panaginip. Kung ano ang iyong napanaginipan, ‘yun mismo ang kailangan mo sa buhay.

Sa ganitong katotohanan, ayon sa iyong panaginip, Eva, ang kailangan mo ay saya at ligaya. Kaya hindi mo man aminin ngayon, ang iyong buhay ay malungkot, kumbaga, lonely ka.

Pero ang tanong, saan o ano ba iyong ikinalulungot? Problema ba sa pamilya? Ang sagot ay hindi? Sa work, may problema ka ba? Ang sagot, hindi rin. Pera ba ang iyong problema? Ang sagot ay hindi pa rin.

Saan? Saan pa nga ba kundi sa love life dahil ang naliligo sa panaginip ay nagpapahiwatig na ang nanaginip ay hindi masaya sa kanyang buhay pag-ibig. Ang totoo nga, mas malamang pa nito na zero ang iyong love life ngayon, kaya ang payo, pag-aralan mong magmahal.

Puwede ring may love life ka ngayon, kaya lang, ganundin, masasabing para kang walang saya at ligaya dahil sa iba’t ibang kadahilanan. Una, malayo sa iyo ang karelasyon mo, kaya pangungulila ang kapiling mo ngayon.

Puwede rin na wala sa malayo ang karelasyon mo, kaya lang, sa takbo ng love life n’yo, parang wala ka rin namang karelasyon.

Puwede ring nagsasawa ka na sa paulit-ulit na nangyayari sa inyo araw-araw, kaya nagsasawa ka na sa relasyon n’yo. Puwede ring palagi kayong nakararanas ng hindi pagkakaunawaan kung saan iniisip mo na parang hindi na magbabago ang ganitong sitwasyon n’yo.

Pag-aralan mo ang takbo ng iyong love life dahil baka sakaling maayos pa ang mga problema. Pero kung sakaling sa kabila ng pagtatangka mong bumuti ang inyong relasyon, wala ka rin namang magagawa kundi tanggapin ang isa pang katotohanan mula sa panaginip kung saan ang nanaginip na naliligo ay nagbabalitang, siya ay magkakaroon ng bagong love life. At sa pag-ibig na ito, may oportunidad siyang matikman ang tunay na ligaya.

Ibig sabihin, puwedeng isaalang-alang ang opsyon na magpalit ka na ng karelasyon, dahil ang isa pang katotohanan, hindi puwede sa isang tao ang masyadong matagal nabubuhay sa kalungkutan.

Hanggang sa muli,

Professor Seigusmundo del Mundo

Senyales na dapat nang mag-asawa

ni Seigusmundo Del Mundo - @Panaginip, salamin ng inyong buhay | December 20, 2020

Salaminin natin ang panaginip ni Jasmine na ipinadala sa Facebook Messenger.

Dear Professor,

Nakapanaginip ako ng baby na gumagapang sa sahig, tapos gumapang siya sa aking braso. Baby girl siya at damang-dama niya na panatag siya at parang sarap na sarap siya sa mga kamay ko. Ano ang ibig sabihin ng panaginip kong ito?

Naghihintay,

Jasmine

Sa iyo, Jasmine,

Ang mga bagay na ating napapanaginipan ay kadalasan ay inilalarawan ang ating mga sarili. Sa ganitong katotohanan, ang baby girl sa panaginip mo ay ikaw.

Ikaw ba ay nag-iisa o ayon sa iyo, parang nag-iisa ka sa buhay? ‘Yung kahit may mga taong malalapit sa iyo, may nagmamahal sa iyo na mga kamag-anak at kaibigan mo, nadarama mo pa rin sa sarili mo na ikaw ay parang nag-iisa.

May boyfriend ka na ba? Sabi ng panaginip mo, mukhang wala kang boyfriend ngayon dahil kung may boyfriend ka na nagmamahal sa iyo, hindi mo mapapanaginipan ang baby girl na sumisimbolo ng sarili mo na gumapang at nasa braso mo, gayundin, parang masaya siya at nasasarapan sa kandungan ng iyong kamay.

Dahil dito, sa katotohanang kasasabi lang, ayon sa panaginip mo, kung sakaling may boyfriend ka ngayon, iisa lang ang kahulugan at ibig sabihin, ikaw ay hindi masaya at nag-iisa pa rin sa buhay.

Ikaw ba talaga ay nag-iisa? Ika nga ba ay alone and lonely?

Ang payo ng panaginip mo, magmahal ka at ang hanapin mo ay ‘yung totoong magmamahal sa iyo. Umiwas ka sa mga kunwari ay nagmamahal sa iyo, pero makasarili na ang ibig sabihin ay mas mahal nila ang kanilang sarili kaysa sa kanilang karelasyon na para bang ginagamit ka lang niya.

Ganito ang sabi sa awiting minsang narinig ko sa simbahan, “Walang nabubuhay sa sarili lamang,” hindi ibig sabihin, mamamatay ang tao kapag nag-iisa sa buhay dahil ang simpleng ibig sabihin ng mga salitang ito ay kailangan ng tao ang tunay na magmamahal sa kanya, ‘yung makakasama, makakaagapay, makakatuwang at makakasalo niya sa saya at ligaya.

Ito rin ay hindi simpleng pakikipag-boyfriend lamang, hindi rin ito ang pakikipagrelasyon na masabi lang na may karelasyon, at lalong hindi ito ang pagsasama ng dalawang tao dahil sa mga pakinabang nila sa isa’t isa, dahil ito mismo ay tumutukoy sa payo na, “Ikaw ay dapat nang mag-asawa upang habambuhay kang may makasama, lalo na sa panahong ito ng Kapaskuhan at papalamig nang papalamig ang panahon.”

Hanggang sa muli,

Professor Seigusmundo del Mundo