Kahulugan ng marami ang buhok sa kilikili

ni Seigusmundo Del Mundo - @Panaginip, salamin ng inyong buhay | December 26, 2020

Salaminin natin ang panaginip ni Randy na ipinadala sa Facebook Messenger.

Dear Professor,

Puwede bang malaman ang ibig sabihin ng panaginip ko na ang dami ng buhok ng kilikili ko, tapos ang hahaba ng mga buhok nito?

Naghihintay,

Randy

Sa iyo, Randy,

Ayon sa iyong panaginip, masyado kang busy sa kasalukuyan. Puwedeng sa hanapbuhay o kaya naman ay puwede ring sa work. Puwede rin sa nagbi-bisihan ka lang at puwede ring masyado mong tinutukan ang mga wala namang kuwentang bagay nitong nakalipas na mga araw tulad ng bakit ka ba nalulungkot, eh, ang dapat ay okey ka lang.

Sa madaling sabi, mukhang napababayaan mo ang sarili mo. Kumbaga, hindi mo na naaalagaan ang iyong sarili o hindi mo na napapansin ang mga personal mong pangangailangan.

Ganito ang sabi, “Aanhin mo ang lahat ng yaman sa lupa…” may karugtong pa ‘yan, pero para sa panrelihiyong aspeto. Pero para sa iyo, ganito dapat, “Aanhin mo ang lahat ng yaman sa lupa kung mapanabayaan mo naman ang iyong sarili.”

Ganito ang sabi , “Ang niyayakap ang kalungkutan, wala nang pag-asa pang gumanda ang kapalaran.” Ang totoo nga, ayon sa mga sikolohista, ang maliit na kalungkutan, kapag lumala ay magiging isang sakit o karamdaman at ang tawag dito ay depresyon.

Okey lang sana kung simlpeng depresyon lang ang aabutin mo, pero paano kapag ang depresyon ay lumala o sabihin na lang nating paano kung nawawala na sa ayos ang buhay ng isang tao? Hindi na niya naasikaso pa ang kanyang sarili, minsan, pero madalas din naman, hindi na niya pinahahalagahan ang kanyang personal hygiene o kalinisan sa katawa.

Pansinin mo ang mga inaatake ng depresyon at makikita mo, nagsisihaba ang kanilang buhok. Dahil nga sa hindi na nila naaalala pa na ang kailangan ng tao ay grooming. Humahaba rin ang kanyang mga kuko o nails dahil napapabayaan na niya ang kanyang magandang porma.

Marami pang nangyayari sa kanya na hindi sana dapat mangyari sa isang taong inaatake ng depresyon.

Nagbababala ang iyong panaginip na ang pagpapabaya mo sa iyong sarili ay makasasama sa buhay mo. Dahil dito, narito ang ilang tips para makabalik ka sa sarili mo.

• Nilikha ang tao na kawangis ni God, kaya dapat ma-maintain niya ang kanyang beauty.

• Ang mga sakit nag-aabang lang sa paligid kaya ang tao dapat ay maging malinis, lalo na sa ngayong panahon ng pandemic.

• Tandaan din naman na kapag maganda ang porma ng isang tao, mas lumalakas ang kanyang loob at ang mga oportunidad sa kanyang harapan ay kaya niyang sunggaban.

• Hindi nabubuhay ang tao sa kanyang sarili lang. Siya ay may kapwa, kaibigan, mahal sa buhay at mga tao dapat niyang pakisamahan. Ang bawat kilos niya ay nakakaepekto rin sa lipunan, sapagkat ang isa pang katotohanan, ang lahat ay magkakaugnay.

Pagandahin mo ang sarili mo at gaganda na muli ang buhay mo at gaganda rin ang mundong iyong ginagalawan. Ito ang mensahe ng iyong panaginip.

Hanggang sa muli,

Professor Seigusmundo del Mundo

Pahiwatig na may magandang future ang anak at bagong mapapangasawa

ni Seigusmundo Del Mundo - @Panaginip, salamin ng inyong buhay | December 24, 2020

Salaminin natin ang panaginip ni Flory na ipinadala sa Facebook Messenger.

Dear Professor,

Nanaginip ako na nanganak ako, tapos sirena kaming dalawa, tapos lumangoy kami sa ilalim ng tulay sa ilog na medyo malabo. ‘Yung kulay ng tubig ay brown, tapos kaya kami lumangoy du’n dahil iniiwasan o inilalayo ko ang baby ko sa tatay niya. Ano ang ibig sabihin ng panaginip kong ito?

Naghihintay,

Flory

Sa iyo, Flory,

Sa panahon ngayon, sobrang moderno na ng mundo at marami ang hindi naniniwala sa sirena. Kumbaga, para sa kanila, wala naman talagang sirena, kaya lang, bahagi na ng ating kasaysayan ang mga kuwento tungkol sa mga sirena.

Ang kasaysayan ng Pasig River ay punumpuno ng mga kuwentong may kaugnayan sa mga sirena. Kaya ang mga tinatawag na “taal” na mga anak ng Pasig ay naniniwala na may mga sirena. Ang salitang “taal” ay tumutukoy sa mga naninirahan sa tabi ng ilog Pasig kung saan doon sila isinilang at sila rin ang mga tinatawag na native na taga-Pasig o orihinal na mga anak ng Pasig.

Kung saan ang kanilang mga ninuno ay talagang taga-Pasig, kaya ang mga sirena ay bahagi na ng buhay nila kahit saan sila mapunta.

Narito ang tipikal na kuwento tungkol sa mga sirena:

May isang binata na nasa pampang ng ilog Pasig, nakirinig siya ng isang pagkaganda-ganda ng awit at nakita ng kanyang mga mata ang isa napakagandang sirena. Araw-araw, palagi siyang nagpupunta sa kung saan ay doon niya nakikita ang magandang sirena. Araw-araw, inaawitan siya ng magandang awit ng nasabing sirena.

Pero minsan, sa hindi niya malamang dahilan, hindi na niya nakita ang kanyang sirena. Kaya sa matinding kalungkutan, sumisid siya sa ilog Pasig at hindi na siya nakita kahit kailan. Ayon sa mga tao, kinuha siya ng sirena at dinala sa kaharian ng mga sirena kung saan sinasabing, “They live, happily ever after.”

Paulit- ulit ang mga kuwentong tungkol sa sirena at sa mga taong may malalim na lungkot kung saan may malalim na lungkot at gustong takasan ang reyalidad ng buhay na ito na sa huli, sila ay bumigay dahil ayaw na nilang mabuhay sa reyalidad.

Siyempre, mahirap paniwalaan ang mga kuwento na nabanggit at lalong mahirap paniwalaan ang sinabing pagtakas sa reyalidad. Gayunman, kitang-kita sa panaginip mo na gusto mong takasan ang ama ng anak mo.

Ito rin ay nagsasabing ayon sa iyo, wala nang pag-asa na magbago pa ang ama ng anak mo, kaya wala kang naiiisip kundi siya ay layuan na lamang, alang-alang sa kinabukasan ng iyong mahal na anak.

Pero ‘wag kang matakot, hindi ka kukuhanin ng mga sirena dahil bukod sa mga kuwento sa itaas, tungkol sa sirena, may isa pang lihim na kuwento ng mga sirena, na sa kanila ay puwedeng magsabi ng mga request. At ito ay ang mga kahilingang may pagkaimposoble na puwedeng pagbigyan ng mga sirena ang anumang hihilingin mo sa kanila.

Dahil dito, gusto kong ibalita sa iyo na ang sirena na nabuhay sa iyong panaginip ay nagbabadya o naghahayag na sa malapit na hinaharap, magkaroon ka ng magandang future kasama ang iyong anak at bagong asawa.

Hanggang sa muli,

Professor Seigusmundo del Mundo

Pahiwatig na pinanghihinaan ng loob dahil sa mga pagsubok

ni Seigusmundo Del Mundo - @Panaginip, salamin ng inyong buhay | December 23, 2020

Salaminin natin ang panaginip ni Sheila na ipinadala sa Facebook Messenger.

Dear Professor,

Nais kong isangguni sa inyo ang panaginip ng kapatid ko. Ayon sa kanya, niyaya siya ng kaibigan niya paakyat sa 21st floor, pero hindi na raw niya maalala kung sino ang kaibigan na ‘yun. Mayroon silang kasama na ilang matatanda sa elevator, tapos noong paakyat na ang elevator, bigla itong nag-error. Habang bumabagsak ang elevator, sabi ng kapatid ko sa isip niya, “Pang-ilang beses ko nang muntik mamatay! Tingnan natin kung this time, matuluyan na talaga ako.” Hanggang sa namatay na nga siya, tapos ‘yung mga kasama niyang matatanda ay buhay. Pero ayon sa kanya, nakakausap pa rin ng kaluluwa niya ‘yung bunsong kapatid na babae namin. Inilibing daw siya sa American Heroes Cemetery.

Ano ang ibig sabihin ng lahat ng pangyayari sa panaginip ng kapatid ko? Isa siyang abogado, may kinalaman ba ito sa mga pangarap niya sa buhay o sa alinmang aspeto ng buhay niya?

Sana masagot n’yo ang katanungan kong ito. Maraming salamat!

Naghihintay,

Shiela

Sa iyo, Sheila,

Sa kuwento mo, mukhang namatay na nga ang kapatid n’yong abogado dahil ang sabi mo, inilibing na siya sa American Heroes Cemetery.

Be that as it may, ang panaginip ng kapatid mo ay nagpapaalala na ang mga namatay, sa totoo lang ay mga buhay pa. Mahirap paniwalaan ang katohahanang ito dahil ang isa pang wala ring kamatayan, isa pang bagay dito sa mundo ay mula noon at hanggang ngayon, buhay na buhay ang debate kung buhay nga ba ang mga kaluluwa ng mga pumanaw na.

Para sa mga nakaranas na nakakita ng mga multo, siyempre, ang paniniwala nila ay buhay ang mga kaluluwa. Para sa mga hindi naniniwala, okey lang din na hindi sila naniniwala. Simple lang naman kasi kung paano maniniwala at bakit hindi naniniwala sa mga multo.

Alam mo, ang mga maniniwala sa una ay hindi rin naniniwala dahil ang patay ay patay na. Ang totoo nga, sila rin ay napakahigpit na nakikipaglaban na hindi totoo ang mga multo, pero nang masaksihan nila o maranasan ang pangyayaring may multo pala, naniwala na sila.

Kaya ganundin sa mga hindi pa naniniwala kapag nakaranas silang pinagmultahan, eh, ‘di sila na ang magtatanggol sa paniniwala na buhay pa ang mga kaluluwa ng mga pumanaw na.

At dahil buhay pa sila, sa tuwing sila ay mapapanaginipan, may mga mensahe sila na para sa nanaginip na kadalasan ay nagsasabing “Huwag kang matakot, aking mahal, lakasan mo ang loob mo dahil palagi akong nakasubaybay sa iyo.” Pero bakit kaya ganu’n ang kanilang mensahe?

Dahil sa tuwing nananaginip ng tungkol sa namatay na mahal sa buhay, ang nanaginip sa mga araw o panahong ‘yun ay pinaniniwalaang pinanghihinaan ng loob, naduduwag at natakot sa mga pagsubok na kanyang kinakaharap.

Hanggang sa muli,

Professor Seigusmundo del Mundo