Dumi ng tao, simbolo ng ginintuang kapalaran

ni Seigusmundo Del Mundo - @Panaginip, salamin ng inyong buhay | December 29, 2020

Salaminin natin ang panaginip ni Dindo na ipinadala sa Facebook Messenger.

Dear Professor,

Nais kong magtanong sa inyo hinggil sa aking panaginip dahil ang aking asawa at ako ay madalas managinip ng dumi ng tao sa loob ng bahay namin. Naikuwento ko sa aking misis ang panaginip ko at siya pala ay ganundin ang kanyang napapanaginipan.

May eksena na paglabas ko ng kuwarto namin ay puno ng dumi ng tao ang salas namin, gayundin, may senaryong nagkalat ang dumi sa lapag ng banyo namin.

Ano ang ibig sabihin ng ganitong panaginip? Sana ay maging masagana ang ating mga buhay ngayong nalalapit na Bagong Taon. Maraming salamat!

Naghihintay,

Dindo

Sa iyo, Dindo,

Alam mo, ang lantay na ginto o pure gold ay kawangis ng dumi ng tao. Ang totoo nga, ang ginto ay tinatawag din na “Bowels of the Earth”.

Dahil dito, ang dumi ng tao ay sinisimbolo ng ginintuang kapalaran na ang isa pang ibig sabihin ay ang pagkakaroon ng kayamanan.

Oo, ito ay isang pagkaganda-gandang balita para sa mga nanaginip ng dumi ng tao, pero kailangan n’yo ring malaman na ang ginto ay hindi madaling kunin o hindi simpleng makukuha. Kumbaga, mahirap magkaroon ng ginintuang kapalaran dahil kakaiba ang paraan para magkaroon nito. Dahil dito, para magkaroon ng gintong kapalaran, ang payo ay nagsasabing ibang paraan ang iyong gawin sa inyong buhay.

Ito rin ay nagsasabing kung kayo ay nagnenegosyo, iba ang dapat maging style n’yo kaysa sa inyong mga kakumpitensiya. Sa mundo ng negosyo, sadyang maraming kakaibang paraan na makikita natin ngayon.

Tulad ng “buy one, take two,” minsan, “buy and have a chance to be millionaire.” Mayroon pa ngang puwede kang manalo ng “trip around the world.”

Sa ngayon, nakagugulat ang mga bagong produkto na halos lahat na yata ay 3-in-1, as in, tatlo ang laman sa iisang produkto at minsan, may mga produktong 5-in-1 at 7-in-1 pa.

Ngayong papasok ng Bagong Taon, makikita mong nagkalat ang mga paninda na may kasama pang ibang produkto para bumili ka. ‘Yun ay ang isa pang gimmick na kung tawagin ay “free”.

Ito ay sa dahilang likas na mayaman ang kaisipan ng mga Pinoy at dahil ikaw ay isang Pinoy, tiyak na mayaman din ang iyong imahinasyon, kaya hindi ka mauubusan ng naggagandahang ideya na puwedeng sa huli ay mapasaiyo ang gintong kapalaran.

At hindi lang naman sa larangan ng negosyo nagagamit ang kakaibang paraan. Kahit sa buhay, puwede rin naman tulad ng ikaw ay nasanay sa paggamit ng kanang kamay, bakit hindi mo subukan na gamitin muna ang iyong kaliwang kamay kaysa sa kanan?

Puwede ring sa halip na sa kusina kayo kumain, parang okey muna na sa salas kayo magsikain. Kung may backdoor kayo, roon muna kayo pumasok sa halip na front door at mag-isip ka pa ng kakaibang style o paraan para mabago ang takbo ng buhay n’yo.

Narito naman ang inirerekomenda ko sa iyo na kakaiba at ito ay nagsasabing ang tatayaan mo ay ang mga numero ng mga kaaway mo dahil ito rin ang isang kakaibang pormula upang suwertehin ang mga taong matagal nang tumataya, ngunit hindi pa nananalo.

Subukan mo dahil wala namang mawawala sa iyo kung gagawin mo. Ang totoo nga, sasaya ka at may kakaibang sigla na madarama dahil ang isa pang totoo sa buhay ng tao, hindi lang sa panaginip kundi sa aktuwal din nating buhay na ito, may nararanasang kakaibang sarap at ligaya sa paglabas ng dumi ng tao.

Hanggang sa muli,

Professor Seigusmundo del Mundo

Pagsasaya at pakikipagkuwentuhan, kailangan para muling sumigla

ni Seigusmundo Del Mundo - @Panaginip, salamin ng inyong buhay | December 28, 2020

Salaminin natin ang panaginip ni Ivan na ipinadala sa Facebook Messenger.

Dear Professor,

Ang panaginip ko ay tungkol sa isang ahas na tumuklaw sa likod ng tuhod ko. Gusto kong tanggalin, pero hindi ko matanggal-tanggal, ngunit noong pinatanggal ko sa kapitbahay namin, natanggal nila ‘yung ahas. Sana ay mabigyan n’yo ng kahulugan ang panaginip ko.

Naghihintay,

Ivan

Sa iyo, Ivan,

Alam mo, iho, may mga bahagi ng katawan na pinanggagalingan ng kiliti. Hindi na natin iisa-isahin pa dahil maaaring alam mo na kung saang parte ng katawan ang mga ito, pero may isang bahagi ng katawan na sobrang nakakikiliti at ito ay hindi alam ng karamihan.

Bago ka mag-iisip ng kung anu-ano, maaaring makikiliti ka na rin, pero hindi ito ang maiisip mong nakapagpangiti sa iyo dahil ang bahaging ito ng katawan ay ang alak-alakan.

Kaya alak-alakan ang tawag dito ay dahil dito naiipon ang kaunting tubig at ang tubig na nasa bahaging ito ay maasim tulad ng asim na nasa wine o alak.

Pero walang kinalaman ang kanyang pangalang alak-alakan sa ating nakakikiliting usapan. Kaya naman ang bahaging ito ay sobrang nakakikiliti dahil ang balat nito ay sobrang manipis na malambot at ang lambot ay kapareho ng lambot ng maselang bahagi ng katawan.

Sa India kung saan naroon ang Hinduism, na isang relihiyong pinanggalingan ng kilalang-kilala ng lahat na aklat ng Kama Sutra, sobrang pinangangalaagan nila ang alak-alakan dahil maselan din ang bahaging ito kapag ang usapan ay tungkol sa love making.

Mababasa sa Kama Sutra na ang mga halik sa alak-alakan ay nagreresulta sa mabilis na pagkakaroon ng libido. Sasabihin ko sana sa iyo na subukan mo, pero ‘wag na lang dahil hindi naman magandang subukan ang mga paraan na may kaugnayan sa pagkakaroon ng libido.

Kaya balikan natin ang iyong napanaginipan na ang mensahe ay nagsasabing, kulang na kulang ang buhay mo sa sigla at sigasig. Maaaring ngayon ay nananamlay ang iyong kapalaran na para bang walang paggalaw, kaya aakalain mo na hindi umuusad ang iyong buhay.

At ang solusyon ayon sa panaginip mo ay kulang ka lang sa “kiliti ng buhay.” Ano ba ang tinatawag na kiliti ng buhay? Ito ay ang mga kakaibang pagkilos na nagreresulta sa pagsaya ng tao.

Ayon sa iyong panaginip, makibahagi ka sa pagsasaya ng mga tao, makihalubilo ka sa mga kabataan at puwede rin sa matatanda. Kumbaga, ang pagsasaya ay nakukuha sa lipunan na iyong ginagalawan at ang tawag dito ng mga sikolohista ay pakikipagsosyalan.

At sa pakikipagsosyalan, kasama rin ang pagkukuwentuhan at sa pagkukuwentuhan, hindi maiiwasan ang tsimisan tungkol sa mga kapitbahay at iba’t ibang anyo ng buhay. At ibinabalita rin ng iyong panaginip ang isa pang mahirap paniwalaang katotohanan na ang tsismis ay isa rin sa epektibong pangkiliti ng buhay.

Hanggang sa muli,

Professor Seigusmundo del Mundo

Kahulugan ng kinagat ng mga insekto

ni Seigusmundo Del Mundo - @Panaginip, salamin ng inyong buhay | December 27, 2020

Salaminin natin ang panaginip ni Room na ipinadala sa Facebook Messenger.

Dear Professor,

Pakibasa ang panaginip ng anak ko dahil iniisip ko na baka may bumabarang sa kanya.

Nanaginip daw siya ng marami at iba’t ibang klase ng insekto na nasa kanyang katawan. Kinakagat daw siya ng mga insekto, tapos dumugo ang balat niya. Lumalala ‘yung kinagat nila at sobrang sakit, makati at maraming dugo. Tapos, nagpalit siya ng damit, pero mayroon pa ring mga insekto.

Nanaginip din siya ng ine-enroll sa iskul, tapos may itinatayong bagong school at kaunti lang ang mga estudyante. Baku-bako ‘yung daan papunta ru’n.

Tapos, nanaginip siya na may mga sinaunang tao. Gayundin, may dagat na hindi naman gaaanong maalon, pero hindi rin kalmado, eksakto lang. May maliliit na alon, tapos may barko sa gitna.

Naiisip ko na baka may banta sa buhay ng anak ko at nananalangin ako na sana ay maproteksiyunan siya.

Naghihintay,

Shierly

Sa iyo, Shierly,

Nabarang? Mambabarang? Insekto? Sakit? Ito ba ay totoo?

Oo, totoo na may mambabarang, kaya totoo rin na may nababarang at totoo rin na insekto ang kadalasang gamit sa pambabarang.Totoo rin na kumakati ang balat at ang laman o loob ng katawan kapag nababarang.

Pero ang panaginip na kinagat ng mga insekto ay hindi nangangahulugan ng nabarang.

Ang panaginip ng anak mo ay nagsasabing siya ngayon ay nangangailangan ng vitamins at mineral dahil kinakapos na siya sa sustansiya, kaya siya ay pinapayuhan na kumain ng mga prutas o pagkaing mayaman sa phosphorus. Kaya ang mahigpit na inirerekomenda ay kumonsulta rin siya sa mga espeyalistang doktor at hindi rin inirerekomendang kumonsulta siya sa albularyo.

Ang mga sariwang gulay ay makabubuti rin sa kanya. Puwedeng-puwede ang mga pagkain ng mga bunga ng halaman na nahuhukay sa lupa tulad ng kamote, gabi, ube at iba pa.

Ang pamamasyal sa magagandang tanawin ay malaki ang maitutulong sa kanya. Gayundin ang pakikinig sa masasayang musika at panonood ng mga palabas na nakapagpapasaya.

Ipinapayo rin na ikonsidera ang paglipat ng mas magandang manirahan kung saan dapat kaunti lang ang mga kapitbahay.

Ang isa pang epektibong paraan ay ang pagkakaroon ng masaya at maligayang love life.

Hanggang sa muli,

Professor Seigusmundo del Mundo