Binuhusan ng tubig ang babaeng kostumer, pahiwatig na pag-ibig ang iganti sa kapwa

ni Seigusmundo Del Mundo - @Panaginip, salamin ng inyong buhay | January 2, 2021

Salaminin natin ang panaginip ni Jenny na ipinadala sa Facebook Messenger.

Dear Professor,

Ano ang ibig sabihin ng may biglang lumapit sa akin na isang kostumer na babae at binuhusan ako ng tubig, tapos gumanti ako ng pagbuhos at nagbuhusan kami ng tubig?

Naghihintay,

Jenny

Sa iyo, Jenny,

Naalala mo ba ang sikat na sikat na quotation ni Lord Jesus Christ na, “Kapag binato ka ng bato, batuhin mo ng tinapay.” Kaya “bato” ang ginamit na salita dahil solid matter ang ginamit.

Samantala, muni-muniin natin ang ganito: Siguro kapag hangin ang salita, ihip ang gamitin, kaya kapag hinipan ka ng malakas na hangin, hipan mo ng mahina o banayad na hangin. Siguro kapag apoy ang gamit ay “pukol,” kumbaga, kapag pinukol ka ng nag-aalab na bolang apoy, pukulin mo ng apoy na malamig. Pero mayroon bang “apoy na malamig”? Wala yata, pero sa mundo ng sining ng literatura, ang “malamig na apoy” ay ang pag-ibig na malamig.

Sa sinabi ng Kristo na “Kapag binato, batuhin mo rin.” Kaya parang mali ‘yung hindi ka gaganti. Baka naman isipin mo, okey pala ang ginawa mo sa iyong panaginip na ang bumato sa iyo ay ginantihan mo. Mali ka kapag ganu’n ang inisip mo.

Mahirap talagang maunawaan ang mga aral ni Kristo, kaya siguro sobrang dami ng relihiyon at mukhang paparami pa nang paparami dahil nga bakit mahirap unawain ng mga aral ni Lord? Kung diretsa na lang sana niyang sinabi kung ano ang gusto niyang mangyari, sana ay wala nang mga pagtatalo.

Para madali nating maunawaan ang “batuhan” na pinagagawa ni Lord, magbalik-tanaw tayo sa nasusulat sa Banal na Aklat, at ito ang mga aral, hindi lang ng mga banal kundi ng lahat ng mga lumitaw sa mangangaral sa mundo na “Ang katapat ng Galit ay Pag-ibig.”

Kaya, Jenny ang mensahe ng panaginip mo, lalo na ngayong Bagong Taon ay nagsasabing pag-ibig ang iganti mo sa gagawa sa iyo ng hindi mabuti.

Muli, mahirap maunawaan, pero pag-ibig ang katapat ng galit. Para malaman mo kung totoo, suriin mo ang ilang pagmamahalan na sa una ay nagalit, pero sa huli ay umibig. Marami nang nakaranas ng ganyang kuwento ng pag-iibigan dahil totoong-totoo na ang galit ay pag-ibig.

Kaya nga sa pagmamahalan o pakikipagrelasyon, hindi nawawala ang pagkakagalit dahil pagkatapos ng galit ay maalab na pag-ibig. Mararanasan mo ito kapag na-in love ka kung saan magagalit ka dahil ang kinagagalitan mo ay mahal mo. At kapag sobra ang galit mo, ibig sabihin ay sobrang in love ka talaga sa taong ito.

Maganda sanang isipin at masaya sanang pangarapin na ang bawat pagmamahalan dahil “love” ang pinag-uusapan ay wala kahit katiting na galit. Okey na okey sana kung ganu’n, kaya lang, walang bahid ng katotohanan sa mundo ng reyalidad na sa pagmamahalan ay walang kagalitan.

Maaring mayroon kang makita ngayon na hindi nagkakagalit, pero ngayon lang ‘yun dahil maaaring bukas ay wala na sila, kumbaga, break na sila dahil kapag walang galit, wala ring pag-ibig, kaya magkakahiwalay dahil hindi naman pala talaga umiibig ang hindi nagagalit. Pero bakit kapwa mo babae ang nakabangga mo sa iyong panaginip? Ayon kay Carl Jung, siya ang “Father ng School of Thought” sa Psychology of Analytical Psychology kung saan sinabi niyang sa bawat lalaki, may personalidad ng isang babae. Kaya ang katangian ng bumato sa iyo ay babae, pero siya ay lalaki, kaya pagkatapos mong mapanaginipan ito, may makakagalit kang lalaki, na kitang-kita ang ilang katangian ng isang babae.

Hanggang sa muli,

Professor Seigusmundo del Mundo

Kahulugan ng itim na ahas, kabaong at si crush

ni Seigusmundo Del Mundo - @Panaginip, salamin ng inyong buhay | December 31, 2020

Salaminin natin ang panaginip ni Edward na ipinadala sa Facebook Messenger.

Dear Professor,

Marami akong napapanaginipan na parang hindi tumutugma sa iba. May mga oras na hinahabol ako ng itim na ahas, pero sa panaginip ko, naiwasan ko siya. Mayroon din akong panaginip na kabaong at sa panaginip kong ‘yun, napadaan ako sa kapitbahay, tapos may nakita akong kabaong na walang laman sa labas ng bahay nila, pero walang mga nakikiramay.

Tapos minsan, nananaginip din ako ng lumilipad na kapantay ang mga ulap, pero bigla at paunti-unti rin akong nahuhulog. Tapos, kamakailan, may gusto akong babae. Napanaginipan ko siya at sa panaginip ko, nakatambay ako, tapos bigla siyang lumabas ng bahay nila at binati niya ako. Ito ang pagkakasabi niya, “Uy, Edward,” pero hindi niya naman ako nilingon. Ano ang ibig sabihin ng mga panaginip kong ito? Maraming salamat!

Naghihintay,

Edward

Sa iyo, Edward,

Ang ahas na itim ay nagsasabing lalabas o lilitaw ang hindi mabuting ikaw. Bago maging palaisipan sa iyo ang nasabing mga salita, gustong ipaalam sa iyo na ayon kay Lord Buddha, ang tao ay may dalawang personalidad, ang una ay ang “Mabuting ikaw” at ang isa ay “Masamang ikaw.”

Sa biglang tingin, nakagugulat ang katotohanang ito, pero sa huli, lahat naman ay aamin na ganito talaga ang bawat tao. Huwag mong hayaan na lumabas ang “Masamang ikaw,” sa halip, panatilihin mong naghahari sa iyo ang “Mabuting ikaw.”

Kaya ang kasunod na payo ay mabuhay ka nang may pag-ibig sa kapwa. Pero bago ka magkamali ng interpretasyon, magandang maipaalala sa iyo na ang pag-ibig na tinutukoy ay hindi “erotic love”, na tulad ng pagmamahalan ng babae at lalaki. Ang pag-ibig sa itaas ay pag-ibig sa tao na gagawa ng mabuti sa kapwa mo tao.

Ang kabaong sa panaginip mo ay nagpapayo na ibaon mo sa limot ang mga pangit mong karanasan at pangyayaring nagbigay sa iyo ng kalungkutan. Ganito talaga ang payo upang ang tao ay madaling maka-move on.

Ang napanaginipan mo ang gusto mong babae ay ito na mismo ang nabanggit sa unahan na erotic love. Sabi ng panaginip mo, siya rin ay may gusto sa iyo. Kaya kung lalakasan mo ang loob mo, hindi magtatagal ay magiging kayo, as in, kayo ay magiging magkarelasyon.

Good luck at Happy New Year sa iyo!

Hanggang sa muli,

Professor Seigusmundo del Mundo

Babala na magkakasakit at ‘di masaya si ex-mister sa bagong pamilya

ni Seigusmundo Del Mundo - @Panaginip, salamin ng inyong buhay | December 30, 2020

Salaminin natin ang panaginip ni Maritess na ipinadala sa Facebook Messenger.

Dear Professor,

Narito ang panaginip ko na nais kong bigyan n’yo ng kahulugan. ‘Yung una, umuwi ang mister ko at umiiyak, tapos gusto na niyang bumalik sa amin at biglang nagsaya ang mga kapatid at magulang niya. Hiwalay na kami at may bago na siyang pamilya.

Noong sumunod na araw, nanaginip naman ako na may nalaglag na kuto at garapata sa ulo ko, at pangatlong gabi naman, nanaginip ako na ikakasal ako at nakasuot ako ng puting gown at belo, na hindi naman nakatakip sa mukha ko. Tapos ‘yung mister ko ang maghahatid sa akin sa altar, pero hindi ko nakita sa simbahan ang ex-mister at groom ko dahil puro mga kaibigan at pamilya lang ang nakita ko roon. Ano ang ibig sabihin ng mga panaginip kong ito?

Naghihintay,

Maritess

Sa iyo, Maritess,

Ang una mong panaginip na umuwi sa inyo ang mister mo at iyak siya nang iyak ay nagsasabi na hindi siya masaya sa kanyang bagong pamilya.

Dahil dito, makikitang kahit hiwalay na kayo ay mahal mo pa rin siya, pero hindi ito nangangahulugan na anumang araw ay magkakabalikan kayo kahit ang mga kapamilya niya ay hangad na muling mabuo ang iyong pamilya.

Ang panaginip mo na nalaglag ang kuto at garapata mula sa ulo mo ay nagbababala na puwede kang magkasakit, pero ‘wag kang mag-alala dahil kusa ka rin namang gagaling matapos mong magkasakit.

Ang ikatlong panaginip mo na ikakasal ka ay nagbabalitang magkakaroon ka ng bagong kapalaran kung saan liligaya ka na. Hindi tulad ngayon na nagkukunwari ka lang na masaya, pero deep inside ay sobrang lungkot mo.

Dahil dito, dapat mong malaman na kapag nagpapalit ang mga panahon, ang mga tao ay sinasalubong ang pagdating ng Bagong Taon tulad ngayon, kaya ang payo para sa iyo ay “Let’s celebrate life”.

At dahil ilang araw na lang bago ang 2021, mas magandang maghanda ka sa New Year, kahit hindi bongga dahil ang mahalaga lang naman ay alam mong magkakaroon ka ng bagong kapalaran na muli ay mapupuno ka ng ligaya.

Huwag mo ring kalilimutan na bumili ng bagong damit o personal na gamit, hindi rin mahalaga kung mura lang dahil ang importante ay nakasuot ng bagong gamit, na sumisimbolo rin ng bagong buhay.

Pero higit sa lahat, ang pinakaimportante na payo ay ang usung-usong sinasabi ng mga millennial na “Move forward, so that you will have ay happy life!”

Hanggang sa muli,

Professor Seigusmundo del Mundo