Kahulugan ng rebulto ni Mama Mary

ni Seigusmundo Del Mundo - @Panaginip, salamin ng inyong buhay | January 5, 2021

Salaminin natin ang panaginip ni Fely na ipinadala sa Facebook Messenger.

Dear Professor,

Napanaginipan ko ang rebulto ni Mama Mary na biglang umilaw sa bandang korona at pumila ako dahil gusto kong lumapit sa rebulto. Noong siya ay aking makatabi, niyakap ko siya nang mahigpit at tinatawag ang kanyang pangalan at ako ay umiiyak. Pagkatapos nu’n, nagising na ako. Ano ang ibig sabihin ng panaginip kong ito?

Naghihintay,

Fely

Sa iyo, Fely,

Kadalasan, nangangako ang tao pero hindi naman niya ginagawa ang kanyang pangako. Kahit hindi pa natutupad, nangangako muli, kaya ang mga tao, sa totoo lang ay nabubuhay sa mga pangako.

Dahil nasanay na sa pangako, pati ang mga obligasyon sa kapwa ay hindi na rin ginagawa. Kasi nga, kung ang pangako sa sarili ay hindi nagawa, paano pa tutuparin ang pangako sa kapwa?

Kaya sa Bagong Taong ito, sana ay matupad natin, hindi lamang ang ating New Year’s resolution o ang mga pangako natin sa ating sarili kundi pilitin din nating matupad ang pangako natin sa ating kapwa, lalo na sa ating mga mahal sa buhay.

Samantala, ang masaklap pa nga nito, ‘yung iba ay nangangako rin kay God, tapos hindi rin matutupad. Nangako na magsisimba sa Our Lady of Mercy, magno-novena sa Baclaran, magsisimba sa Quiapo, pero hindi naman magawa. Kaya nga ang sabi ng panaginip mo, hinihintay ka ni Mama Mary na gawin mo ang mga ipinangako mo. Kahit isang beses lang, ang pangako mo ay gawin mo.

Kapag nagawa ng tao ang kanyang pangako kahit isang beses at kahit ito ay walang kinalaman sa kanyang relihiyon, malaki ang ipagbabago ng kanyang buhay. Dahil ang isang beses na nakatupad sa pangako ay masasabing “She or he breaks the ice”.

At ang sabi ng mga life coaches, marami pang ice ang kanyang mabi-break, kaya siya ay magiging iba sa dating siya at mas malaki na ang tsansa na ang malaki rin niyang pangarap ay matupad at ito ang pangarap na yumaman.

Alam mo, hindi naman nagagalit sa iyo si Mama Mary, mahaba ang kanyang pang-unawa dahil ganu’n ang pag-ibig ni Mama Mary sa mga tao, kaya ayaw ni Mama Mary na ang tao ay mabuhay sa kawalan ng pag-asenso at puro pangako.

Kaya, magsimba ka at tuparin mo ang sinabi mo sa iyong sarili na mag-aalay ka ng dasal na rosary kay Mama Mary. Sa biglang tingin, ito ay isang pangrelihiyon na aktibidad, pero sa maniwala ka o hindi, ang mas mahalaga ay kaya mo palang tuparin ang mga pangako mo sa iyong sarili.

Ang totoo, ang isa sa pinakaunang susi ng success at pagyaman ay ang kakayahang matupad ng tao ang sinasabi. Doon siya hahangaan ng kanyang kapwa at ang sarili niya mismo ay hahanga at ang mabuting balita ay nagsasabing hangang-hanga ang langit sa taong ginagawa ang kanyang sinasabi, lalo na si Mama Mary.

Hanggang sa muli,

Professor Seigusmundo del Mundo

Dalawang kahulugan ng gagamba na hindi namamatay

ni Seigusmundo Del Mundo - @Panaginip, salamin ng inyong buhay | January 4, 2021

Salaminin natin ang panaginip ni Guianelly na ipinadala sa Facebook Messenger.

Dear Professor,

May itatanong ako sa inyo dahil nanaginip ako ng gagamba. Ngayon, kahit anong patay namin ng pinsan ko ay hindi ito mamatay-matay, sa halip, paulit-ulit lang itong nabubuhay. Patayin at durugin man namin, maya-maya ay buhay na naman ito at hinahabol kami. Hanggang sa nagising na lang ako. Kinakabahan ako sa panaginip ko, ano ang ibig sabihin nito?

Naghihintay,

Guianelly

Sa iyo, Guianelly,

Alam mo, iha, sa buhay ng tao, lalo na’t Bagong Taon ngayon, alam mo bang maraming kahit anong gawin ay naroon pa rin? Halimbawa nito ang napanaginipan mo na kahit patayin nang patayin at durugin nang durugin ang gagamba, ito ay buhay pa rin.

Sinasabing kabilang dito ang mga negatibo at masasama mong ugali na gusto mo nang baguhin, lalo na ngayong Bagong Taon. Kailangang “mabago” mo ang masasamang ugaling ito sa pamamagitan ng pagdisiplina sa iyong sarili upang ang “hindi mamatay-matay na gagamba” sa panaginip mo ay tuluyan nang mamatay o matudla.

Pangalawang ibig sabihin na mas matindi ang kahulugan ng panaginip mong gagamba na hindi mamatay-matay ay ganito: Kapag matindi ang pag-ibig ng isang tao sa kanyang minamahal, kahit pa mabasted siya nang mabasted, patuloy at buhay na buhay ang kanyang pag-ibig. Marami nang nakaranas na kung anu-ano ang sinabing masasakit na salita, pero patuloy pa rin na nagmamahal ang sinasaktan ang kalooban.

Sila ay may karamihan din ang bilang na kahit wala nang pag-asa o talagang patay na ang ningas ng pag-asa ay buhay na buhay pa rin ang pagmamahal. May iba pa ngang namatay na ang pag-asa, pero sa tuwing makikita ang minamahal, muling nabubuhay ang nararamdaman.

Sa iyong panaginip, ang gagamba ay sumisimbolo sa pagnanasa at bilang paglilinaw sa iyo, ang “pagnanasa” ay hindi pagmamahal o pag-ibig. Dito sa huli, sa pagmamahal, “love” ang katumbas pero sa una o pagnanasa, hindi love ang katumbas kundi “lust”.

Ang lust ay isang malakas na puwersa na naghahari sa tao, at dahil ito ay may kakaibang puwersa, talagang hindi ito basta-basta namamatay.

Ayon sa iyong panaginip, ikaw o ang pinsan mo ay pinagnanasahan. Kaya higit kailanman, ngayon n’yo kailangang magiging matibay at matatag dahil muli, ang “lust” ay malakas na puwersang naghahari o kumukubabaw sa isang tao.

Hindi naman mahirap tukuyin ang taong kinukubabawan ng lust at narito ang ilan sa mga palatandaan nila:

• Kapag siya ay kausap, hindi niya maiwasang magsalita ng kalaswaan.

• Kapag siya ay iyong nakatabi, ginagamit niya ang kanyang kamay at hinahawakan ang kanyang pinagnanasahan. Minsan, hindi kamay kundi idinidikit niya ang kanyang katawan sa kanyang “object of desire.”

• Siya ay may kakaibang titig na tagos sa mga mata ng tinitigan, na ang tawag ay malalim na titig.

• Hindi rin niya maiwasang tumingin o tumitig sa maseselang bahagi ng katawan ng kanyang pinagnanasahan. Ganundin sa ibang bahagi ng katawan tulad ng labi, pisngi, leeg at hita.

Ibayong pag-iingat ang kailangan para hindi siya magtagumpay at dapat tandaan na ang nahulog sa tukso ay nasisira ang buhay at hindi lamang ang buhay kundi ang mismong pagkatao.

Ito ang kahulugan ng inyong napanaginipan na gagambang hindi mamatay-matay.

Hanggang sa muli,

Professor Seigusmundo del Mundo

Kahulugan ng hinahabol ng nag-uumpugang bato at nahulog sa ilog

ni Seigusmundo Del Mundo - @Panaginip, salamin ng inyong buhay | January 3, 2021

Salaminin natin ang panaginip ni Connie na ipinadala sa Facebook Messenger.

Dear Professor,

Bakit noong bata ako, madalas kong napapanaginipan na nahuhulog ako sa ilog at kusa rin akong nakakaakyat at minsan naman ay hinahabol ako ng dalawang nag-uumpugang bato?

Ang isa pang ipinagtataka ko ay bakit ‘yung panganay kong anak ay ganundin ang panaginip? Ano ang ibig iparating sa amin ng panaginip na ito?

Naghihintay,

Connie

Sa iyo, Connie,

Noong bata ka, ipinauuna ng iyong panaginip na sa paglaki mo ay mahihirapan kang magdesisyon sa buhay. Bakit? Dahil ang isip at puso ay maitutulad sa dalawang bato na nag-uumpugan, kumbaga, hindi mo malalaman kung ano ang ipapasya sa maseselang aspeto ng iyong buhay.

Ang nahuhulog ka sa ilog ay nagbabala na may takot ka na walang makasama sa iyong pagtanda. Pero dahil nakakaakyat ka sa iyong panaginip, ito ay nagsasabing sa totoo lang, kaya mong mag-isa sa buhay. At dahil ang hinahabol ng dalawang nag-uumpugang bato ay napapanaginipan din ng anak mong panganay, ito ay nagsasabing siya ay ganundin ang mararanasan sa buhay kung saan naglalaban ang puso at isipan.

Ito ang solusyon kapag naharap ka sa mabigat na sitwasyon tulad ng nag-aaway ang isip at puso mo:

Mahalaga sa tao na siya ay may kaibigan o best friend. Ang totoo, ang best friend ay higit na kailangan kaysa sa mga kapamilya. Siyempre, kailangan din natin ang ating pamilya, pero sa pagpapasya, lalo na sa personal na bagay, higit na matimbang ang payo ng ating bestfriend.

Mapapansin mo na may mga taong sa totoo lang ay walang kaibigan. Siguro, sasabihin nila na hindi totoo dahil ang lahat ng tao ay may kaibigan, pero talagang may tao na walang kaibigan at siya ang taong sarili lang ang kanyang sinisunod.

Ang totoo pa nito, sa biglang tingin lang naman siya may kaibigan, pero kung susuriin mong mabuti ang kanyang buhay, ang mga “kaibigan na sinasabi niya ay hindi naman niya talaga sinusunod dahil ang mga kaibigang ito ay tagasunod niya, na walang karapatang magpayo at hindi rin niya pakikinggan kung anuman ang ipayo nito sa kanya.

Malungkot ang buhay ng taong walang kaibigan dahil ang “kaibigan” sa tingin niya ay mga tauhan, aalalay at nakakasama lang niya, pero walang gaanong lalim o sustansiya ang kanilang samahan. Ito ay alam niya dahil hindi naman siya talaga nakikinig sa mga kaibigan niya. Under niya, kumbaga, ang akala ay mga kaibigan niya.

Ang tunay na kahulugan ng salitang “magkaibigan” ay pantay lang ang dalawang magkaibigan, kumbaga, tanggap ng bawat isa na walang mas magaling dahil kapag may isang magaling at ang isa pa ay alalay o tauhan lang, walang mangyayari sa isang panig.

Dahil dito, ipinapayo ng inyong panaginip na kayo ng anak mo ay dapat na may matalik na kaibigan, na siyang inyong pakikinggan kapag ang isip at puso ay nagbabanggaan.

Hanggang sa muli,

Professor Seigusmundo del Mundo